27
Fri, Apr

Israel Khuapi Caah Jerusalem Fehtermi Kong Donald Trump Biachahmi Cung Ah Ramkip Bialehnak

Politics

Aung Aung| 2017 December 7| Jerusalem cu Israel khuahlipi ca ah fehter in Israel i US palai zung zong Tel Aviv khuapi in Jerusalem ah thial ding an timhtuah cang nak kong Cawnnili, December 7 ah Donald Trump nih vawleipi theih in a thanh mi cu ram kip in bialehnak an ngeih cio.


Alhnial awk a um ngai mi US Cozah dirhmun nih Arabs le Israel ram chung ah buainak hmual a fahter chin khawh leng ah Arabs le Israel kar remdaihnak um kho dingin US nih aa zuam tawnmi a rawk kho tiah ralrin pek a si lengmang ko bu ah tu bantuk in Donald Trump nih a thanh mi a si.
President Donald Trump thil tuah mi duhlo langhternak caah “Days of Rage” timi “Thinhunnak nih a khuhmi Ni” tiin nithum chung caan hman dingah Palestine pawl nih an hal colh.
“Asinain Donald Trump nih cun, hitihin thil tuah caan a si cang,” tiah a zumhnak kong US Inn Rangpi ah a chim.
“Cucaah tu caan hi Jerusalem cu Israel khuapi ah fehter ding caan cu a si tiah fehte in ka chimnak a si. Ahlan US President pawl zong nih thimnak caan ahcun Jerusalem hi Israel khuahlipi ah kan thial lai tiah an rak chim cio ko nain atak ah hohmanh nih an tuah lo. Nihin cu keimah nih ka tuah cang. Hiti ka tuahmi hi US hlawknak caah ka tuah mi a si. Cu leng ah Israel le Palestine kar remdaihnak zong pehzulh in ka tuan ko lai.”

“US nih tu bantuk in biachahnak a tuahmi hi tuanbia pakhat a si tiah Israel Prime Minister Benjamin Netanyahu nih a chim. Israel nih kan tuanbia le kan biaknak kong ah hngalhpinak thil ton tete kan ngei ko nain tu bantuk ni sunglawi cu kan tong bal lo,” tiah a ti.

Asinain Palestine President Mahmoud Abbas nih cun, “US nih kum caan saupi Palestine le Israel kar remdaihnak ser aa rak timh tawn mi a kaltak bantuk a si” tiah a ti ve.
Turkey President Recep Tayyip Erdogan le Jordan Siangpahrang Abdulla nih OIC timi Islamic funtomnak bu chung ram 57 cu lakhruak tonpumhnak Ankara ah an auh colh.
France President Emmanuel Macron zong nih “Donald Trump biachahnak cu ngaihchia ngai a si” a ti.

UN Secretary General Antonio Guterres nih cun, “Jerusalem buainak hi amah he dengteo in aa pehtlai mi ram hnih nih an ceih ding mi buainak a si. UN Humhimnak Council le General Assembly pi biachahnak cung ah i hngat in kan tawlrel lai. Tubantuk thinpang ngai a si mi dirhmun ah fiangte in ka chim ko lai. A dangte in a dir mi ramhnih nih an ceih mi dah ti lo remhchunnak lam a um lo. Hi hna ram hnih rem tein khua an sak i himnak caah khat le khat an i theihthiam piak ding in kan tawlrel lai. Israel cu Palestine le Israel ramhnih nih ngeih mi Khuahlipi dirhmun in kan chiah lai i anmah pahnih nih an i ceih i a phi an chuah khawh nakding kan tlangtlak hna lai,” tiah a chim.

Pope Francis nih cun Jerusalem hi tu hlan a sining bantuk tein umter ko i thisen luannak um lo, lungdai tein khua ruah le a phihma kawl a herhnak kong forhfialnak le a duhnak a langhter.+++

BLOG COMMENTS POWERED BY DISQUS