17
Sun, Dec

US Ngandamnak Minister Nih Ruahlopi In A Rian A Chuahtak

Politics

TCP-Hakha| 2017 September 30| American ram ah man fak ngaingaimi vanlawng pawl phunglut in khualtlawnnak caah an hmanmi kong he pehtlai in Ngandamnak Minister Tom Price nih a rian a chuahtak riangmang. 

 

A luancia May thla thawk in private vanlawng hna he khual voi 26 tlawnnak ah mizapi ngunkhuai dollar 400,000 a dihmi he pehtlai in Mrs. Price nih a hramthawk ah nawlnak bia a chim.

Mr. Price nih a dihmi vialte cu American ngunkhuai zung ah check min a thut i ka cham than lai tiah September 28 ahkhan a chim.

Rampi runvennak kongkau a tlaitu dah ti lo nih American cozah tuanvo ngeitu pumpak dirhmun in riantuan khualtlawnnak caah mizapi a phortu vanlawng lawng hmannak nawl an ngei. 

Politco timi ramkhel thawngpang website i hlathlainak pakhat ahcun Mr. Price khualtlawnnak (TA) nih dollar nuaikhat ringlo a dih tiah hmuh a si.

Cu a dihmi chung ah hlanhmi vanlawng pawl caah a dihmi hi dollar 400,000 he ramleng khualtlawnnak caah ralkap vanlawng pawl a hmanmi TA zong a telchih. 

Mr. Price nih a khualtlawnnak ah a hmanmi le a dihmi hi a tamtuk caah zeitin hmanh in thuhnawh awk a tha lomi buainak nganpi pakhat a hung si. 

Thimnak lemsoinak tuah lio ahcun Mr. Trump nih keimah hruaimi cozah a kai ahcun man ngeilo le vaivuanh in hman dingmi pawl kan thumh lai i semrelte in ka hman lai timi biakamnak he mee lemsoinak a rak tuah. Asinain, atu ahcun cu lio i biakamnak a rak tuahmi cu a lingtalet cang. 

President Trump cozah i minister pathum zong khualtlawnnak caah hlanhmi vanlawng pawl an hmanmi caah soiselnak an rak tong bal cang. Cun, President Trump i high level ruahnak petu Kellyanne Conway zong Mr. Price vanlawng khuallam pakhat i a rak zulh bal caah hi buainak hi White House tiang a hnorsuan khawhmi a si tiah thawng a chuak.

American ram ah mizapi ngunkhuai hi ningcanglo le tamtuk a hmangmi hi an rian in phuah khawhnak tiang sualnak a si tiah BBC thawnglatu Anthony Zurcher nih a ruahdamh.  

Ref: BBC Burmese 

 

BLOG COMMENTS POWERED BY DISQUS