27
Fri, Apr

Ramkomh Kawlram President Le Tuluk President An I Tong, Hnatlaknak Phun 9 An Ngei

Photo: President Office

Politics

TCP-Delhi| 2017 April 11|  Tuluk President Xi Jinping sawmnak in Ramkomh Kawlram President Htin Kyaw cu ni 6 caam in Tuluk ram ah an nu (first lady) he an va tlawng i 2017 April 10 ni ah ram hnih President an i tong. Hi tonnak ah hin minthut in hnatlaknak phun 9 an ngei. 

Hnatlaknak phun 9 an ngeihmi ah hin Kachin ramkulh i Myitsone Dam tikham kong le Rakhine ramkulh i zinaan pipe line kong hi mizapi nih theih duh ngaimi a si. Tuluk minung, Kawlram minung pinah vawleicung ram tampi hna zong nih mah pahnih kong ah an mit ai fu dih hna. Hi phun 2 zong hnatlaknak phun 9 an ngeihmi ahcun aa tel ve i Myitsung kong i hnatlaknak an tuahmi cu Media sin ah fianghlang tein an chim lo i zinaan pipe line kong tu cu an chim. 

 

Zinaan Pipe Line Kong; 2009 lio in rak thok cangmi Rakhine ramkulh Kyaukpyu peng in Tuluk ram Kummi khua tiang vawlei tang zinaan pipe line zong a rannak in lim zau khawh a si naklai hnatlaknak kan tuah tiah Tuluk ramleng minister Liu Zhenmin nih a chim. 

“Tuluk-Myanmar kar zinaan pipe line cu ram hnih President an i ton hnu in hnatlaknak kan tuah chih. Kanmah Tuluk ram lei cun Kawlram in a van lut ding pipe line hi kan rak tuah chung cang hna. Tu cu pehzulh dingin min kan thut cang caah a rannak in rian kan tuan cang lai” tiah Liu Zhenmin nih cun a chim. 

Mah zinaan pipe line pi cu Kawlram Rakhine ramkulh in Tuluk ram tiang vawlei tang in a pemh dingmi a si tikah Kawlram chung i Rakhine ramkulh, Magwe le Mandalay ramthen pinah Shan ramkulh Lashu le Hmuse khua tiang a pemh ding pipe line zong a si. Pipe line tuahnak ding hmun i a ummi pawl cu thawl dih an si lai caah Kawlram minung tampi nih cun an duh lo. 

Zinaan pipe line cu Kawlram chung in khan 480 tluk a kal lai i Tuluk lei nih $ 1.5 Billion dih in tuah an timhmi a si. Tuluk nih zinaan cu Africa ram lei in an lakmi a si tikah Kawlram vawlei pemh in zinaan lak an timhmi nih hin Tuluk tangkaa budget zong tampi a zorpi (hleipi) hna. A sullam cu Kawlram nih siang hlah sehlaw Malaga rili chung in pipe line tuah an hauh lai caah $ Billion tampi a dih ding a si. 

Myitsone; Kachin ramkulh i Myitsone tikham kong a si. Kachin miphun nih an rak duh lo tuk tikah President Thein Sein cozah chan 2011 kum khan hi rian cu rak dinh rih a si. Tuluk lei nih $3.6 Billion dih in tuah an timhmi a si. Hi kong ah hin Tuluk ramleng minister Liu Zhenmin nih cun fiangte in a chim lo nain kap hnih ram ca hlawknak a chuahpi kho dingmi hnatlaknak kan tuah ti vial lawng a chim. 

Tuluk President Xi Jinping sawmnak in President Htin Kyaw cu ni 6 caam in Tuluk ram a tlawng chung ah hin Tuluk ram ministers pawl he zong tonnak an ngei hna. President Htin Kyaw cu President rian a tuan hnu in tutan hi a voi khatnak Tuluk ram a tlawn zong a si i May thla chung ah khin rampi ruahnak petu Daw Aung San Suu Kyi zong Tuluk ram a tlawng than te lai ti theih a si. Ref;VOA

 

 

BLOG COMMENTS POWERED BY DISQUS