17
Tue, Jul

Pu Donald Trump Nih Ruahphak Loin Syria A Den

Politics

Zahan zaan (April 6) 8:40 p.m ah Pu Trump nih ruakphak loin Syria a den. Mediterranean rili i a ummi US raltuknak tilawng USS Rose le USS Porter kha order a pek hna i Tomahawk missile 59 in Syria ralkap lawngbual Shayrat timi cu sop cikcek in an phomh. Syria minung pakua an thi, fighter jet pakua an hrawh piak fawn hna. Syria cu Russia nih a ralkap he a um hnawh mi a si caah raal a ngan sual lai maw tiin ramhruaitu tampi thinphang thlalau in an um.

Russia President Putin nih cun Pu Donald Trump tuahsernak cu "illegal act of aggression" a ti i a thin a hung ngaingai. Rianrang in black sea ah a ummi a raltuknak tilawng Admiral Grigorovich a thlah i tuzing kha Syria rili a phaan ve. Cun, Syria ram cung ah Russia vanlawng le US vanlawng ruahphak loin pakhat le pakhat i khawndennak an ton sual nak hnga lo 2015 ah US ralkap le Russia ralkap karlak hnatlaknak zulhphung an rak ser mi zong ka cancel tiah a thanh. Syrian air space ţhawng chin in ka ven lai a ti fawn.

Pu Trump nih a dennak a ruang cu, tuzarh Tuesday April 4th ah Syria ralkap nih vanlawng hmang in tapung umnak area 'Khan Sheikhun' timi khua ah "sarin gas" cawh mi bomb an thlaak i nu le hngakchia telh in minung 87 an thih caah a si. Tuur sivai ruangah Turkey sizung ah a um liomi zong an um rih. Hi ruangah hin Pu Donald Trump cu a thin a hung i ruahphak loin a lungput aa thleng. Sualnak ngei lo hngakchia tete poison in an thah mi hna cu ka celh hrim lo, ka redline an lonh tuk tiah a ti. A liam cia zarh hnih tiangah khan cun Syria cozah tuk ding le ţhilh ding hi US nih priority ah kan chia ti lo tiah Foreign Secretary Rex Tillerson le UN Ambassador Nikki Heley nih an chim. North Korea tu kha first priority ah chiah deuh dawh in an lang. Nain, President lungput aa thlen caah ruahphak loin hriam an hman ţhannak cu a si. Vulei pi theih ding in Pu Trump nih a policy le a lungput a langher ti khawh a si.

Ngaite tiah cun, Syria hi chemical weapon a ngei ti lo tiah an ruah cangmi a si. Zeicaah tiah cun, 2013 ah Pu Obama redline cross in an rak hman bal caah US le Russia kaphnih hnatlaknak in Syria cu minsen an thut ter i a chemical weapon vialte an laak piak dih. Cu khawh cun Russia kha Syria chemical weapon vengtu 'guarantor' ah an chiah. Cuti cun, Oct 14, 2013 thok in Syria cu UN Chemical Weapon Convention signatory ah a hung cang. Chemical weapon serchuah, i chiah, hman ti vialte an khap dih. Cu bu cun a thli tein a rak i chiah i tutan ah a hun hman ţhan tikah Russia zong faak piin mawh an phurhternak a si.

Ruahphak loin Pu Trump nih President a ţuan ni 77 tlinnak ni ah a tu bantuk in Syria cungah hriam a hun hman tikah kan vulei pi khoika lei a hoih lai ti chim awk a ţha lo. Zei level tiang dah ţuan aa timh ti zong a fiang rih lo. Foreign Secretary Rex Tillerson belte nih cun Syria President Asad thlaak nak dingah step pakhatnak kan kal a si a ti. Zahan zaan Pu Trump hriam hmannak cu Britain, Canada, France, Germany, Turkey, Israel, Saudi Arabia nih dirkamhnak an langhter. Russia le a party pawl belte cu thinhung ngaiin an um ve.

Catialtu: Thiangi Pa

Editor Theihternak: Catialtu hnathlaknak lak hnu in Lai Forum ah a thlahmi kan langhter chinmi a si.

 

BLOG COMMENTS POWERED BY DISQUS