18
Sun, Feb

Hlasak Thiam Justin Bieber Tlonlen Khawhlonak Hmun 6

News

TCP-Hakha| 2017 June 15| Minthang pop hlasak thiam Justin Bieber cu a tuahsernak a chiat tuk ruang ah vawleicung ah tlonlen le kal khawhlo ding in an phihkharmi hmun 6 kan hun langhter lai.

 

1. Argentina: Vawleicung ah Justin Bieber a hua bik cazin laak sisehlaw Argentina ram tluk in a hua mi ram an um ti lai lo. Justin Bieber cu Argentina ram nih a ram tlawnkainak nawl a phih, a onh lo.  Argentina thantar (flag) thlanglamhnak le ningcanglo zohchia in a tuah ruang ah Justin Bieber cu Argentina rammi nih an huat tuk. Cu ruang ah Argentina ram nih a ram luh an phihnak hi a si. 

2. Nichuah Laifang: Justin Bieber hla album cover ah angki aa phoihnak le a taang ah vailamtah tattoo aa tuah ruang ah nichuah laifang ram nih an ram tlawnnak nawl an phihkhar. Biaknak le nunphung a tanh tukmi Mordor khua hoihna ahcun Justin Bieber hlaphel hmanh zuar khawh a si lo, an phih. 

3. England Ram TV Program:  Bieber hi TV program ah i telnak nawl a ngei i aa tel theu. Asinain Bieber cu Skin Care thilri serchuahnak an fakthanh i a faak ve ko nain san a tlai hlei lo. Bieber cu England rammi a si caah lo England thilri serchuahmi a fak tikah England mi nih an uar hlei lo.  Cu ruang ah 2012 thawk in Justin Bieber cu England TV fakthanhnak program nih an phihkhar. 

4. Las Vegas Indoor Skydiving: Las Vegas khualipi i Indoor Skydiving nih Biber cu a chanchung tlawnkai khawhnak nawl an phihkhar. 

5. Australia Ram Passage Club: Australia ram khualipi pakhat ah a ummi Passage club nih Bieber cu tu hnu rat ti lo ding in an phihkhar. Passage club nih Bieber a rat lio ah an don. An don lio record a latu, hman a thlatu phone, camera vialte Bieber hnuzultu pawl nih an hrawhpiak dih hna. Cu ruang ah an phihnak hi a si.  

6. Mayan Khualipi Hlun: Mexico ram ah a ummi Mayan khualipi hlun ah Bieber le a hawile pawl an ra i inncung ah an tli, an kai, an tum bu in beer an ding.  Bieber le a hawile cu kalnak nawl an onhlomi biakinn cung ah an kai, zuu an ding pah. Cun Bieber nih biakinn cung ah aa tawhrolh aa phoih i a tlaitak. Hihi Mayan hna nih an biakmi Pathian thlanglamh le phungbuar a si an ti. Cu ruang ah Bieber cu zeitik hmanh ah rat le luhter ti lo ding in an phihkhar. 

Ref: Sunthit Myanmar 

 

BLOG COMMENTS POWERED BY DISQUS