16
Mon, Jul

Ramdang Thilri Phung Ning Lawngin Kawlram Luhpi Khawh A Si

Business

TCP-Hakha|September 11| Ramdang abikin India chuak Tipung, thilsuknak seh, eidin kikternak (refrigerator) le adangdang cu Cozah ngunkhuai zung le ramchung ramleng chaw letthalnak (Custom & Border trade) zungah Kawlram ramleng thil lut le kuatnak (Import/ Export) upadi phungin ngunkhuai pek lawngah luhpi le chuahpi khawh a si tiah Hakha hrambunh ramkomh ngunkhuai zung (akoh khun) lei in thawng kan theih. 

“Ramkomh aiawh ngunkhuai zung hi Rih le Thantlang caah Hakha ah zung pakhat lawng a um. Kan rian nganbik cu cu chawletthalnak pahnih ningcang tein an kal khawhnak caah tawlrel hi a si” tiah ramkomh aiawh Chin ramkulh bawizik Kyaw Zeya nih The Chinland Post ah a chim. 

 

Hi Hakha ngunkhuai zung le ramchung ramleng chaw letthalnak zung lawng silo in Thantlang hrambunh Ramchung ramleng chaw letthalnak zung (border trade office) zong May 1, 2013 ah pumpak chawletthalnak card ( Individual Trading Card_ ITC) i tuah in a herhmi ngunkhuai pek hnu ah India asilo ah Kawlram thilri duh paoh in luhpi chuahpi khawh a si tiah Thantlang ramri chawletthalnak zung lutlai Director Myo Oo nih The Chinland Post ah a chim. 

“ ITC card tuah duh ahcun hmahpuntin copy, mah umnak khuabawi le palek nih theihpinak, chungkhar milu cazin(inntaungsuh cazin), asi khawh ahcun chawletbu pakhat ah itelnak copy le hmanthlak passport pathum in Thantlang ramri chawlet zungah sawk khawh a si. Myanmah siipuaizii bank ah Ks.50,000 liam in kumkhat chung rithaisii le hriam dah tilo ngunkhuai pek in phorh khawh dih ngot a si. Eidin he a pehtlaimi asi belte ahcun siizung lei nih hngalhpinak (FDA) ca ahau lai.  Thantlang ah ITC card ngei pahnih lawng an um.” tiah abiapeh ah a chim. 

“Thantlang ramri chawletthalnak cu an hunnak kum (3) leng a si cang nain phung ningin chawlettu le zuartu hna nih ngunkhuai pekning theihhngalh a silo ca le India thil phorh cu tlaihkhih khawh a si ti ruah a si caah Thantlang palek nih zikhnawh in halmi paoh pek a rak si. Haimual Jeep pawl hi India thil phorh ah zarhkhat ah pathum li cu a kal peng. Thantlang palek nih kan hnu August 28 zan hmanh tiang motor pakhat atlawmbik Ks.50,000 phung ninglo in an hal peng cu mu. Cu vialte phaisa cu phungning in ngunkhuai ipe sehlaw Ramkomh phaisa ah Chin ram Thantlang in ramri pehtlainak (Border trade) hmuhmi phaisa cu ihngalpi ngai awk a si hnga i Ramkomh Cozah zong nih  Chin ramkulh ca thanchonak zong tampi tuah duhnak le ramri pehtlaihnak abiapit ve ning tha a pek hnga” tiah Fidi Foundation Operations Director Salai Bawi Uk Thang nih The Chinland Post ah a chim. 

“Thein Sein Cozah hmanh nih athami cozah le a thiangmi cozah (Good governance and Clean Governance) tiah a ati khawh tawk i a rak aupi ve i atulio NLD cozah chan ah zikhnawhnak lei silo in mipi nih an hngalh rihlomi le tuah awk an tuahlomi hi phungningin nitin kan hmuh pengmi hna Palek le nitin mipi he a pehtlaimi cozah rianngei ko nihhin zeitin dah nihhin lam a kan hmuh sak awk a si cang. Ngunkhuai in Cozah nih ram thanchonak a sersiam tihi kan i fian cio a herh ko” tiah a biapeh ah a chim. 

Ramchung ramleng luhpi chuahpinak upadi (Import & Export) chapter 5 article (10) ning ahcun ramleng thil phungning lo in aluhpi tu asilo ah tha a petu (zikhnawh tbk) cu kumthum thongtlak le phaisa dantatnak tuar khawh a si. Chin ramkulh ah Kawlram ramri chawletthalnak (Border Trade Office) zung cu Rih le Thantlang lawngah a um rih tiah theih a si.+++

 

BLOG COMMENTS POWERED BY DISQUS