17
Sun, Dec

Chin Ramkulh Chawletthal Phu Le Sehlei Riantuantu Phu Nih Hakha Ah Zung Hunnak An Tuah

CSCCI zung hunnak tuah lio

Business

Chinland Post| 2017 November 19| Chin Ramkulh Chawletthal Phu Le Sehlei Riantuantu Phu (Chin State Chambers of Commerce and Industry_ CSCCI) nih Chin ramkulh khualipi Hakha ah Chin ramkulh Chief Minister telpinak in November 19 zanlei ah zung hunnak an tuah.

 


Hi CSCCI zung le signboard catarmi hunnak cu Chin ramkulh Chief Minister Salai Lian Luai nih hunnak a tuah i Rev. Uk Luai nih thlacam apnak a ngeih. Zung hunnak program an dih hnu ah Carson hall ah zanriah dumtinak an ngei kho. Hi zanriah dumtinak ah Chin ramkulh Chief Minister nih a lunglawmhnak le hmailei riantuantinak kong chimphuannak a ngeih. Cun, Kawlram Chawphumnak Commission in General Secretary zong nih biachimnak le forhfialnak a ngeih. Cun, CSCCI General Secretary Pu Kap Khen Pau nih CSCCI kong tawi chimphuannak a ngeih.

CSCCI General Secretary Pu Kap Khen Pau nih, “Hi CSCCI cu 2017 June 3 ah kan dirh. Committee zong felfaite in kan ser. Hakha zong ah tuanvo ngeitu upa thimnak le tuanvo pek an si. Nihin ah zung thar hunnak kan tuah khawh caah kan i lawm. Kan zunghrampi taktak cu Yangon a si. CSCCI nih aa tinhmi cu Chin ramkulh thanchonak ding le rian tampi ser khawhnak ding hi a si. Hi Chin Ramkulh Chawletthal Phu Le Sehlei Riantuantu Phu nih Chinram thanchonak ding aa tinhmi le a chunman a tlamtlin khawhnak ding ah Chin mizapi le Chin cozah nih dirkamh kan herh. Kanmah Chin mizapi ta a si timi lungput kan ngeih cio si cun, dingfel deuh le hi nak tha deuh in Chinram a thangcho ko lai” tiah The Chinland Post ah a chim.

 

CSCCI zung cu Pyidawtha sang, bogoke lamkam, CB bank kam te ah a si. November 19 chun suimilam 3:30 ah zung hunnak cu an tuah.

Hi zung hunnak ah Chin ramkulh cozah bu in Chief Minister Salai Lian Luai, Minister Pau Lun Min Thang, Minister Pu Vui Kaw, Minister Pu Mang Hen Dal, Upadi bawizik le cazi bawizik pin ah Chinram zungkip upa cheukhat zong an i tel kho. Cun, Yangon lei in CSCCI tuanvo ngeitu upa le Hakha lei committee zong an i tel kho.

CSCCI ahhin bochanmi Lai mifim le thiamsang tampi an i tel. Atu lio CSCCI chairman cu Dr. Cing Lian Mang a si i General Secretary cu Pu Kap Khen Pau a si tiah kan theih.

BLOG COMMENTS POWERED BY DISQUS