27
Fri, Apr

Mirum Bik Minung 8 Nih Vawlei Milurel Hnarcheu Ngeihzah Tluk An Ngeih

Business

TCP-Hakha| 2017 January 19| Vawleicung mirum (billionaire) bik minung 8 i an ngeihmi zapi fonh le vawlei cung minung hnarcheu ngeihmi zapi fonh he aa tluk. Hiti mirum sifak an i niamsan tukmi nih vawleicung zatlang mibu he an i hlat chin kho tiah Mi Bawmchantu Phu in Oxfam nih a chim.

Switzerland ram ah tuahmi Vawleicung Sipuazi Ceihmainak (World Economic Forum) tuah hlan deuh January 16 ah Oxfam nih a chim hi a si. Vawlei cung sifak bik milu 3.6 billion ngeihmi chawva le American riansang ngeitu 6, Spain le Mexico riansang ngeitu pahnih hna i an ngeihmi zapi fonh he aa tluk tiah Oxfam nihcun a chim.

Oxfam chimning ah India le Tuluk ram ah mirum le sifak an i niamsan ning a fak khun. A luancia 2016 kumkhat chung cazin ning ah vawleicung milu hnarcheu rumnak chawva cu vawleicung mirum bik minung 62 chawva he aa tluk. Sifak le mirum an i niamsan tukmi hi vawleicung sipuazi ceihmainak ah ramkhel le sipuazi lei hruaitu nih biapi ah chiah in an ceihmai ding kongkau a si. Vawleicung Sipuazi Ceihmainak cu 2017 January 17-20 tiang an tuah liopi a si. Ramkip le hmunkip in minung 3000 an kai. Vawleicung mirum 8 an ngeihmi chawva cu Sterling pound le billion lawngte in tah an si. 

Vawleicung Mirum Bik Minung 8 Cu;

1. Microsoft dirhtu Bill Gates (Sterling pound 61 billion)

2. Zara Thilpuan ngeitu Amancio Ortega (55 billion)

3. Chawphumtu Warren Buffett (49.9 billion)

4. Grupo-Carso sipuazi ngeitu Carlos Slim Helu (41 billion)

5. Amazon website ngeitu Jeff Bezos (Sterling pound 37 billion)

6. Facebook dirhtu Mark Zuckberberg (36.6 billiion)

7. Oracle company dirhtu Larry Ellison (35.8 billion

8. Tangka lei Services a tuahtu Michael Bloomberg (32.8 billion) an si.  

Ref: Oxfam, Reuters, Daily Mail/Dowon

 

BLOG COMMENTS POWERED BY DISQUS