27
Fri, Apr

Zophei Miss Zuamnak, USA Ah Pakhatnak Hmumi Leng Rem Hniang He Chikhat Biaruahnak

Topic

Min: Rem Hniang 
Kum: 21
Khua: Khuabung (Thantlang peng)
A san: 5’ x 2’
Muici duhmi : A sen
Huam Phun : Laam le Arhmul tuk, tihnung movie zoh hi ka huam ngai mi a si.
Cawnmi : Business Administration & Accounting Minor

TCP : Tu bantuk in biaruahnak caan na kan pek caah kan i lawm.
RH : The Chinland Post nih biaruahnak nan kan ngeihmi cungah kaa lawm.

TCP : Na konglam tawi?
RH : Ka min hi Rem Hniang a si. Dawtnak in Ahniang tiin an ka auh. Ka pa hi Pu Ngun Er si i ka nu hi Pi Thluai Chin Zaathang a si.Thantlang peng Khuabung ah chuak mi ka si. Unau 5 lakah a hniang bik ka si.

TCP : Tulio na cawn/kai mi na kan chim kho lai maw?
RH : Tulio ka cawn/kai mi cu Business Adminitration le accounting minor an si. Bethel College (Indianapolis) ah ka kai i tukum hi kum 4 nak ka kai a si.

TCP : Hmailei ah zeidah si kho ning ti saduh na that?
RH : Hmailei ah si ka duhmi cu ka cawn cuahmah Business Women si kho ning ti hi ka duhnak a si. Khua le khrihfabu nih bochan awktlak mi nu si ka duh.

TCP : Zei tikah USA hi na phak i khawika state dah nan um?
RH : 2006 ah kan chungkhar in Indianapolis USA kan phan i tu hi Indiana khua ah kan chungin kan um hna.

TCP : Zophei Family America (ZFA)le Indiana Zophei Youth Fellowship (IZYF) i miss zuamnak an tuahmi ah pakhatnak na hmuh ti kan theih, zeitindah na ngah ning a si?
RH : ZFA le IZYF ah miss pakhatnak ka ngah khawhnak hi a pakhatnak ah Pathian thawngin a si. Pahnihnak ah thazang a ka petu ka chungkhar, ka hawikom nih an ka dawtnak thawngin a si.

TCP : Miss aa zuam kho mi khua zeizat nan si?
RH : Zophei khua 15 aa zuam ding mi chungin khua 6 in minung 2 cio nih miss zuamnak ah kan i tel kho. Cu khua hna cu Aibur, Khuabung, Lawngtlang, Hriphi, Zaabung le Zeiphai khua hna kan si.

TCP : Miss zuamnak ah zeitindah an in thimh hna ning a si?
RH : Miss an kan thim ning cu beauty, intelligence, lam kal dan, mit hmai panh ma panh lo, confidence kan ngei ma ngei lo, kan lai thil tling tein kan i hruk maw ti bantuk te hna khi an kan zoh mi cu asi.

TCP : Lainu nih miphun dang pa vat hi a tha na ti maw? Na hmuh ning?
RH : Lai nu nih miphun dang pa vat hi a sual ti’n cun ka hmu lo nain si khawh ah cun kan Lai pa hi vat cu a tha deuh tuk tiah ka ruah

TCP :Duhmi thimhmi ta na ngei cang maw?
RH : Duhmi thimhmi hi cu ka ngei rih lo.

TCP : Careltu sinah biacah na duhmi um maw?
RH : Careltu sinah bia cah ka duhmi cu khawika ram kan phak hmanh ah kan Lai nun thlau hlah u sih. Cun Pathian i bochan zungzal usih ti hi asi. Careltu nan dih lak cungah lung lawmhnak tampi ka ngei.

TCP : Tu bantuk in kan biahalnak lungsau in na kan leh caah kan i lawm.
RH : The Chinland Post nih biahalnak nan ka tuahmi cungah kaa lawm tuk ve.

Biaruahtu  : Salai Pa Thawng (TCP)