17
Tue, Jul

Caankarlak Thimnak (By-election) A Dih Hnu In MP Aa Cuhmi Pu Zo Peng, Pi Za Tlem le Pu Bawi Khing He Biaruahnak

Topic

Ramkomh Kawlram nih April 1, 2017 ah tuahmi caankarlak thimnak (By-election) cu Chin ramkulh huap in Thantlang peng lawng ah a um. Thantlang peng lawng ah thimnak tuah a sinak a ruang cu Thantlang peng in a tlingmi Pu Henry Van Thio cu Kawlram Vice President caah an thim. Amah hmun cu a lawng i thimnak an tuah cu a si.

Kawlram dihlak ah Thantlang peng thimnak hi aho paoh nih zoh bikmi le lung um bik hmun a si. A ruang cu Vice President a tuanmi Pu Henry Van Thio hmunhma ah aho dah a tling lai ti hi hngalh an duh cio. A tak ah NLD in Pu Bawi Khing cu MP a tling. Pu Bawi Khing MP a tlin hnu in thimnak an cuhmi USDP in Pu Zo Peng, CNDP in Pi Za Tlem le NDL in MP a tlingmi Pu Bawi Khing cu thimnak kong ah an hmuhning, an lung-um pawl The Chinland Post nih bia kan hun ruah hna.

Pu Zo Peng (USDP Candidate)

Na teinak lo ah lung-um bia (Feeling): Mipi nih duh thim tein an ka pek i ka ngahmi a si caah ka cohlan i ka lawm ko. Tutan thimnak buainak um lo le zauk phung covo ningin tein kan tuah khawh caah ka lungsi ko. Zuamnak cu tei le sungh phung a si. Kan sungh i lungfah tiphun ka ruahmi a si lo i ka sungh si zongah aho party paoh zong kan ram le kan miphun ruah in aa zuammi kan si caah mu. Kan itinhning in kan mipi caah kan tuan awk kan rian a si tihi ka hmuhmi a si. Mipi sin ah thatnak hun chim i MP kan tlin tikah mah le khua le ram ca lawng zoh in khuakhat ca lawng tuan ti cu a tha ti lo. By-Election ah kan izuam cio i zei party ti lo in khoika deuh dah tuan a herh tihi cu MP a tlingmi nih tha tein mah le miphun caah zawnruahnak ngeilo in tuan a herh. Mah khua le pengtlang hoih in tuan hlah seh tihi ka duh.

USDP cu Thanchonak nan aupi, Na Teilo ruangah Na siaherhmi, A teitu sin zong cah duhmi um maw?

Tutan cu Pumpak silo in Party zoh in kan kal tik ahhin kan cozah kalpimi le tutan a teitu pa zong nih kan ram, kan tlang caah a herhbikmi, a chambau deuhmi lam le sul, sianginn, ngandamnak lei le fimthiamnak lei hi fak deuh kan ruahpiak hna seh ti hi ka duh. Ramkhel (Politician) pawl nih  hi teinak hmu le cangka in mah ca lawng a tuanmi cu an tlawm ve lo. Kan politician pawl hi ram le miphun a daw i a tuan taktakmi si hna seh ti ka duh. Cun hun peh ko ning law MP kan teinak ahhin sipuaizii ruah in ramkhel a tuahmi kan tam ko. Mah le hmailei siipuaizi ruah in ramkhel a kalmi cu kan ram a kan hrawh deuh lai tiin ka ruah. Ramkhel minung nih company hna an hun dirh ti hna cu a dawh lo. Sipuaizii a tuahmi nihcun siipuaizii tuah bakding le ramkhel (politics) kan tuah seh ti ahcun ramkhel ah iphum dih lawlaw ding a si. Mah siipuaizii ruah ruang i ramkhel kan tuah ahcun kan ram hi a kan hrawh taktak lai tiah ka ruah. 

Na Teilonak A Ruang?

Tutan kan dernak cu kan peng (myone) EC pawl hi ka zoh tikah dernak kan ngei, kan ibawm kho lo. Tlangkip kan tlawn tik zongah EC kan ichiah ko nan. Ramkhel timi mifim nih an chim i Pumpululh chuih bantuk a si an ti ikopthiamnak(Teamwork) kan ngeilo a si i pakhat lawng celhnak in kan teibak lai ti cu a silo kho tihi tutan ka hmuhning a si. Mipi lei cu mawchiat awk ka ngei lo. Biatak in kan party riantuannak lei tu hi kan der tiin ka chimngammi a si. Kan pu le bel ramkomh, ramkulh dirhmun tu nihhin an kan bawmh i inntek ah kan i bawm kho tuk lo.

Tutan Thimfung Lemsoinak ah Thilri tete bawmhnak nan pek hna i Mee Lemsoinak ah nan hmanmi si lo maw?

Thimfung lemsoinak ah kan hmang bak lo. Kanmah kan i ruahmi cu peng khuakip kanmah party lawng silo in innkip pekcio ding tiin kan rak tuahmi a si. Khakha tuan deuh zong in kan phaw manh lo. khakha lemsoinak a si bak lo.

Zei ruangah thimfung thlak lai ah nan phawt? Mipi nih Thimfung lemsoi lai nan phawt tikah mipi nih lemsoinak ah an hmu i?

Kha cu an palh lai. Khakha cu lemsoinak a si lo. Nan duhnak ah thimfung thla ko u kan ti hna. Thimfung ca ti usih law an kan pek lai si. Khakha cu silo. Tei usih law mipi nih an kan soisel bak ko lai. Lemsoinak ca a si bak lo.

Nan teilo nain 2020 caah zei bantuk ruahchannak dah a um?

Ramkhel timi cu kan ram thanchonak caah timtuahmi a si tikah 2020 zong hi kan mipi le kan party nih an kan duh ahcun Party luh hnu ahcun ka phuak cang ti cu a phung a si ve lo i hmuh le thatho, hmuh lo le thader tihi cu ramkheltu a silo tiin ka hmu. cucaah kan sungh zongah teirial ahau. Tulio mipi nih kan NLD Cozah pi  kalpimi ahhin rengh dorh (check and balance) a tuah kho tu party cu an kan tanh awk a si ko. An cozah a hrawk tu kan silo. An cozah riantuanmi a dik a hman zohfeltu ahcun dohdaltu party kan thawn a hau. Cu lo ahcun anmah lawngte an si lai, atulio zong anmah lila an um ko i an cozah pi an ti kho tilo. Cucu kan tuah khawh ahcun kan ram athancho deuh lai. Kan daidup dih ko ahcun party pakhat hruainak hramhram uknak (dictatorship) tangah hruaimi kan lo lai. Cu silo in kan mipi nih nan kan pek lo ahcun thanchonak kan hmu lai lo timi biapi in an chim tikah khuate lei cu a kan sunghter dih ko. Cucu kan sungh phahnak a si rua ti zong in ka ruah. Kan mipi nih ramkhel lei umtuning kan ifiang lo.

Nan Dernak le nan sunghnak zeiruang si tiah na ruah?

Mipi nih ralkap party ah an kan hmuh pengmi hi a si. Biana ah nungak an kan duh lomi nih kan sualphawtnak a hun lak manh i a thinhung. A uar pahmi nih  zei a hun ti paoh ah a uar bantuk khin ka ruah. Zei kan chim zongah ralkap party an ti peng ko. Kan silo, a zalawngmi party kan si ko kan ti zongah. Nihin ni tiang Kan pi Suh hi an uar rih, kan chawlet kong zong an ruat rihlo tihi a si. USDP vote kan in pe hna lai a timi an tampi ko. Minung pumpak zoh lo in party in an kal caah kan sunghnak hi a si ka ti.

Media le Mipi biacah?

Laitlangah a tuning ahcun dernak kan ngei rih ko. The Chinland Post le Hakha Post lawng nan si tikah tam deuh zong um kho seh law ti saduhthahnak ka ngei. Media hi cu a ho tanhnak ngeilo in tuan kha atha in ka hmu. Nanmah hi mipi caah nihlawh peklo (volunteer) bak in a tuanmi nan si i mipi sin ah a dikmi nan chim atha. Mah duhmi Party lawng cachuahpiak i duhlomi party kong chuah duh lo timi hna um ahcun tlamtling lo a si. Rammi caah ramkhel rian a tuanmi bak nan si ve tiin kan hmu hna caah kan nau le tampi nan ummi hi ka lawm, kan fak hna. Mipi tu nihhin thazang peknak kan thiam deuh lo i mipi zong nih Media tanhnak le thazang pekthiamnak lei tuah usih tihi cah ka duh ko.

Pi Za Tlem

Na tei lonak cung ah na lung-um bia (Feeling): Kei hi Bawipa nih a ka dawt i ka teilo zongah Bawipa nih khua a khanmi a um tihi ka nunnak ahhin  a um. Atutan cu ka khuaruah ahar! Ka result a theihlan ahcun ka phur a rit ngai nain result a hun theihbak ahkhin ka phurrit a thumh bantuk khin ka tha a dam dih. David fapa thih bantuk khan kan ram boruak ruangah a si ko.

Na Teilonak A Ruang?

Tutan kan teilonak ruang ka thei set lo. Asinain keimah pumpak tlamtlin lo ruang si lai, kan party ruang zong si lai. Kan mipi puh ding zong a si lo. Bu riantuan kan ti cu kanmah tlamtlin lo bik hi a si. Pakhat te mipi lei in kan chambau rih rua tiah ka ruahmi cu miphun tanhnak le dawtnak lungthin a biapit zia kan thei deuh rih lonak hi a si.

Tutan By-Election Tei in Tlangcungmi kong, Remdaihnak le Federal Aupi nan timhmi ah Siaherh?

Kan sungh cu si ko nain Pu Bawi Khing zong kan ram le miphun caah a dir ko lai tiah ka ruah. Kanmah nak in tampi a thei ko lai. Keimah caah Kan ram caah Remdaihnak hi ka duhbikmi a si. Bawipa nih lamhruai in tuan khawhnak pe hram ko seh. Democracy lawng nihhin hmunhma la lo in Federal zong nihhin hmunhma lak ding izuam hna usih.

Thimfung Lemsoi ah Biakam Na Ngei Maw?

Biakam hi kan policy a si lo. Kan riantuannak ah 100% kan iphum lai tihi a si ko. UPC_Panglong ah Tlangcung kan kong kan chim lai ti cu kan aupimi a um. Pakhat bel chimchap ka duhmi cu kan ramcia ah Kawl party pi USDP le NLD nih hmunhma an lakmi cu khua kan ruah deuh ahau. Kan hmunhma ahcun Chin party nih hmunhma la dih seh tihi izuam cio ko usih.

Khuapi Nan Teinak le Khuate nan Sunghnak kongah Zeitin?

Khuapi hi cu nitin chimrel le tlawnkai a tam len ah Thantlang zongah miphun conference pi kan tuah, ram le miphun kong zongah an ra, nitin thawngpang media nih nan thlah, ca tampi an rel khawh tikah a tha deuh tiin ka hmu. Khua te lei nih Ramkhel kong kan ifiang deuh lo in ka thei. Hmailei ahcun khuate tampi ah carel awk kuatpiak le training tampi pekpiak kan hau.

Nan teilo Nain Mipi aw-an le Inntek Harnak Zeitin Nan Tawlrel Lai?

Kan tuanlio 2010-15 cu a chung le a leng he media he kan au. Kan sunghnak kumkhat cu a si i media sin ca kan thlah rih lo. A boruak kan zoh lio! Rampi nih bochanmi an si ve tikah dengteo in hun ti kha caan kan hun pe ve ta hna. Kannih zong kan um sawhsawh lai lo. Media zong he kan ti khawh tawk in kan tuan ko lai.

2020 Timtuahnak?

Kan sunghnak cu kan thazang thar ah ka ruah ko. 2020 Caan tampi kan ngei rih caah zeidah kan tuah lai ti cu caan nih lai a rel te lai.

Biacah Duhmi?

Lawmhnak chim awk lo ka ngei. A Pakhatnak Pathian sin, thimfung petu mipi dihlak, CNDP Bahu_EC_Thantlang le khuate dihlak, Rawlulh in thlacam bawmtu, media pawl, lemsoinak ah zulkhaltu, khuakip khuabawi, chawva bawmtu le adangdang bawmtu hna cungah ka lawmtuk hringhran. Teinak hmutu Pu Bawi Khing cung zongah ka lawm, Bawipa nih tuan khawhnak thazang pe chin ko seh!

Pu Bawi Khing

Na teinak cung ah lung-um bia (Feeling): Hi bantuk ka lungthli pel hmanh ka ruat lomi ka ngah cu a pakhatnak ah Pathian thawng a si, a pahnihnak ah thimfung a ka pe tu kan mipi dawtnak le zangfahnak thawng a si i lawmhnak tampi ka ngei. Leiba zong tampi ka ngei tiin ka ruah!

Teinak Na Hmu cu si I Zeidah Chin mipi caah hmasabik ah tuahding na tim?

Hluttaw cu phan ballo, ka voikhatnak a si i Hluttaw nih tuahding tuanding, chimrelding tampi a an ngei lai, a um I cucu ka hlathlai lai I Thantlang kan mipi caah a herhmi thil tampi kan hluttaw aw kan mipi aw ti bantuk in hluttaw kalning in cunglei kalpi khawh ka zuam lai. Thantlang peng chairman, Chin State NLD dinrep zohfeltu le NLD EC upa ka si tikah kan miphun ca a herhmi ka hlathlai lai, remdaihnak kan tuah cuahmahmi zong hluttaw ah tel khawh in chim khawhnak ding timtuahnak tampi ka ngei.

USDP nih Thanchonak An Aupi hi Zeitin nangmah kalpi na timh?

USDP nih 2010-15 an tuannak ah tampi an tuanchuak I an tuahmi cung zongah ka lunghmuih ngai. Kanmah NLD cozah kai hnu in zeitin dah kan kalpi lai tihi kan ngei dih. Keimah zong Chin ramkulh Cozah nih lam, cinthlak, thanchonak, pawngkam, ti le mei committee zongah chungtel ka si, Kawlram le Tuluk pehtlaihnak kongah Tuluk ka va kalve lio zongah tampi ka va hlathlai. Kan mipi tangka hmuhnak athatnak caah cinthlak zuatkhalhnak hi a biapi ngai. Kanmah Chinram kan herhbikmi cu pakhatnak ah lam, pawkhimnak, fimcawnnak, ngandamnak le cinthlak zuatkhalhnak hi a si. Hi pawl hi ningcang tein tuah kan tim. Ramri pehtlaihnak ca zong Thantlang Ramri Chawlet zungah thluachuahpi dingin tuan khawh kan zuam lai.

Kan lam le Sul kongah Tender Ngei Campany le Khuabawi nih Lamcawh a dih cang tiah tlamtling lo tampi khi teh?

Ahlan bantuk khan a si tilo. Atu cozah hi cu mah lamcawh riantuan a dih ti menmen khan a ngah tilo committee tha tein a zoh fel cang. Khuami zong nih nan khua lamcawhnak caah sing thong man, pe zeizat a phan tiin chim le an lungtling tein kalpi a si.

Kan fimcawnnak hi teh zeitin? Laica sianginn caan chung chimnak kong ah teh?

Kan fimcawnnak a tlaknak hi tanghra awnglo le awngka cachimning a thiam lo mi tampi kan lak hna tikah ca an teilo tikah kan fimcawnnak a tla taktak. Ahlan UNICEF nih a hlathlainak ah Chin ramkulh cu fimthiamnak sangbik kan si. Cu dirhmun kan phak khawhnak caah kan cachimtu te hi rian an luh le cangka in training pek colh hna seh. An thiammi ca lawng chimter hna seh. Siangngakchia le saya milu ret zong izat seh, a thiammi saya lawng nih chim hna seh, Private sianginn zong um ti hlah seh tihi ka tinhmi a si. Private ti tikah khuate I mah khuami thazang sawh in tuahmi khi a si. Inn tlawm tete zong nih private in sianglairun ee siangsangruun ee an ti tikah zeidah a cang ti ahcun cawnpiaktu saya an ngei lo i kumhnih thum a si hnu cun an vaivuanh dih. Yangon University khi ahlan ahcun second Cambridge University a si nain University tam a hun chuah tikah kan vaivuang i tu ahcun zeihmanh lo ah aa cang. Thantlang zong result a chiatuk kan ti nain Hakha, Falam, Maymyo tbk tanghra dih vialte kha Thantlang lawngte an si. Cucu kan sianginn, cachimhtu santlaihlo ah a tla. Kan Lai caholh zong tangli tiang cawng seh. Hmailei zong tanghra tiang cawng kho dingin kan izuam lai. Laica zong sianginn caan chungah cawn kho ding in kan izuam lai.

Cinthlaknak lei hi Na Huam Na thiammi a si tikah Zeitin dah Chinram Cinthlaknak kong na ruah?

June thla NLD in Kawlram Tuluk pehtlaihnak ca tiin kan tlawn lai ah Chin ramkulh thanchonak lei committee meeting kan thu I lamkong, pawngkam, cinthlaknak, meilei kong paper ka tial. Kan Chin ram ah lothlawh kan hman tikah kan ram a phawng dih cang. Thantlang lawng hi a hring rihmi a si. Cucaah rili cung pe 4000 cung lei paoh a phawngmi ahhin cinthlak le thing zung lei caah budget tampi chiahpiak in farkung cin dih, pe 3000 tanglei vialte hi tlor cin dihding ka ti. Tuluk ka kal ah phawng ka hmu lo. America ka kal ah farthing lawngte ka hmu. Cucaah Hluttaw ka si ahcun hi pawl hi ka tuah lai tiah ka ruahchanmi a si. Hmailei ahcun hi thing pawl nihhin a kan cawmte lai. US le Tuluk nih far le tlor cawk an duhtuk. Kan thilchuak (product) ah kan ser lai. US ka kalah an inn hi farthing lawngte a si. Tulio cu Gangaw le Kalay rawn vialte an hau dih cang hi lungfak a si. Cun lei cawh khawhnak phun vialte cu ti kan pek lai i lohlawh si tilo in hleicangdongh (hlekathih) in cin kan thla cang lai. Theithu, serthlum tampi kan cin lai. Cinthlaknak ah kan mipi lungthin zong thlen ahau.  Cucu Cozah he hluttaw biatakte in tanlaknak he kan i zuam lai.

Tulio CNDP nih Tlangcungmi kong, Federal le Remdaihnak kong an aupi, Zeitin dah na aupi ve lai?

Remdaihnak kan timi hi abiapi cu tlangcungmi party le cozah rian si lo. Tlangcungmi hriamtlai le Cozah riantu a sibik. Kei cu tlangcung party ka si ruangah remdaihnak ah cucu ka tuah lai tihi a si thlu lo. Cozahpi le Hriamtlai kalpimi a si. Cu kongah Remdaihnak Committee zong an ser cang i Hluttaw nih a kalpi cuahmah, Chin ramkulh in Daw Ni Sui Lian zong aa tel. Ralkap zong pahra an itel. Hriamtlai lei in Naing Han Ta le Cozah lei in Hla Maung Shwe te pawl an itel. NLD ka si ruangah ka tel ve hrimhrim awk a si ti a silo. Nizan Thantlang Chin National Dialogue kan tuahmi zong kha cu committee nihkhan Cozah le Hluttaw sinah an kalpi ding khi a si. Cucu kei ka fianning a si. CNDP siruang, CPP siruangah a si lo tiin ka fiang.

Chin National Day zungkharni sinak, Sianginn kai can chung Lai Cacawnnak tbk chim na tim maw?
Na ka hal I ka lawm. CNF le Cozah kahdaih hnatlak lio U Aung Min ratlio ah zungkhar ni ah nan kan tuahpiak lai ka ti bal, CNF zong nih a chim, mipi zong nih aupimi a si tikah ka nor rih lai. Laica cawnnak kong zongah chim rel ding zong ka rian a si.

CNF le Cozah Kahdaih Hnatlaknak kongah Chimrel duhmi um maw?

A um lo. Tutiang cu remdaihnak an kalpimi cungah ka cohlan. CNF zong miphun caah rian an tuanmi tha ka pek ngai hna.

Thimfung Lemsoi Nan Vahnak ah Mipi Bia nan Kammi a ummaw?

A um bak lo. Kan party hrim nih zeitik hmanh ah biakamnak nan pe hna lai lo tiah policy kan ngei.
Thimfung Lemsoinak Nan tuah lio ah Thimfung nan kan peklo ahcun Thanchonak kan in phihkarh hna lai tiin thawng kan theih. zeitin dah a si?
Kan chimmi a si lo i ka thei bak lo.

Ahlan zong atulio MP zong mipi aw-aan ngaihnak hi a tlawm ngai in kan thei. Nangteh zeitin dah na si lai?

Hluttaw rian cu mipi aw ngaihbak a si. Mah Ruahnak in Thangaw ah cucu khakha an herh ti a ngah lo. Mah pumpak kalin hmuhmi le mipi lei nih an halmi lawng cungah kan kalpi awk a si. Hluttaw nih a ceihmi le hnatlakmi zong khuakip kal in mipi sinah thawngthanh lengmang ahau. Mipi he naihniam tein um ahau. NLD Cozah a kai hnu ahcun media zalonnak a pek cang tikah Media pawl sin zongin tampi mipi aw ngaih khawh a si cang lai.

Party Thimfung Hmuhnak Khua le Hmuhlonak Khua Khi Thanchonak Tuahpiak ah Thleidan a um tawn, nang zeitin dah na ruah?

Thimfung a kan pemi le pe lomi tuaktan a herhmi herhlo timi hi fiang tein ka chim ahcun zumhngamhnak a kan ngeibikmi nih thimfung a kan pek, a kan zumlomi nih an kan pe lo. Khrihfa kan si I kan thleidang hna lai lo ti a si nain thimfung pek dingah biatak tein a kan zumh I thimfung a kan pekmi cu pa ka pek deuh bak ko hna lai. A kan pelomi zong kan hlawt hna lai ti a si lo, a pahnihnak papek ahcun ka ruah ko hna lai. Zohpah lo ahcun thimfung a kan petu an lung a fak lai.

Cu Bantuk Thleidannak nih Voinolh Thimnak A Dawnhlai Na Ruat Lo Maw?

Kan mipi an fim ngai cang le zohlaw kan sungh lai kan tinak hna an kan pek cu, khuapi hna in an kan pek cu. Biana ah Khuahrang ah inn 700 fai nih 2015 lio an kan pek. Hitluk thimfung a kan pemi cu kan ti I inn 300 te a simi cu Sianglairun kan pek ko hna cu. Sialam 70 zong nih sianglairuun an hmu cu mu. Leitak zong si ko. A kan dawmi cu hluttaw ah kan hei chimpiak ko hna cu. Asinain Hluttaw Palai ka si hnu cun a ka pemi zong ka mi, a ka pelomi zong ka mi an si cang caah khakha cu riri vava an ti hei zohthiam ahau. Hihi ka tuahpiak lo ahcun thimfung ka sung lai ti hna cu ka duh lo. A dikmi cu a dikning tein tuanding a si.

Thimfung A Sunghtu CNDP le USDP Sin Chim Na Duhmi Ummaw?

A um lo nain tutan an sungh hi an tlingtlak lo ruangah a si lo. An za tuk ko. an cung zongah zawnruahnak ka ngei. Kei cu zei party hmanh soisel ka duh lo. Ka lawmh ngaimi cu nizan ka result hmanh aa thei rihlo nain thimfung ka tam deuh le cangka in CNDP in Chairman Pu Zo Zam, Pi Za Tlem le riantuantu upa hna, USDP in Pu Zo Peng te nuva zong nih zungah an hun ka leng i panh ziarmar tein kan ichon bia hna I ka lawmtuk. Hi bantuk i pakhat le pakhat I doh le isoisel silo in kutsih bu le kutsih bu in rian kan tuanti lai tihi chim ka duh. Annih zong ram ca riantuanmi an si. Mipi nih kan herhmi zong USDP in Dr. Hmuh Thang le Pu Van Thawng an um. Company pawl zong zikhnawh in riantuan angah tilo. HLuttaw palai pawl nih minthut piak lawng ah a ngahmi a si I kan tha chin lengmang cang lai tihi chim ka duh.

Tu na chimmi Kutsih bu in kan tuanti lai ti cu zeitin dah si lai?

Aw cucu kei zong nih kut ka va tlaih rih hna lai. An sin le an inn ah ka va leng hna lai. Kan tuanti lai, kei cu a tu lawng a tuanding ka si. Nan sinah hngalhtheihnak (experiences) tampi a um. Ruahnak hna nan ka cheuh lai, kan tuanti lai tiah ka va ti hna lai.

Biacah duhmi na ngei maw?

Kan hnu zongah Chin Digest interview nan ka tuah i ka lawm. Media nihhin tanh hleimi ngeilo le fianghlang tein rian kan tuanpiak chin ko u. Nan ca hi khuapi lawng silo in budget nan ngei ahcun khuate kip zong thawng kan zamhpiak kho ulaw ka duh. Nan biapi taktak I kan zuampiak rih ko u. Ka chim sualmi zong a um ko lai. Hluttaw ka va phak tik tu ah tling deuh tein kan ichim chawn than te lai. Mipi sin ah ka lawmtuk hringhran. Ka lawmhnak hi media in ka aupi rih ko u tihi nawl kan duh hna.