27
Fri, Apr

Pu No Than Kap Telh In Chin Ramkhel Party Lutlai Pathum He Chikkhat Tonbiaruahnak

Topic

Salai Ngun San Aung| 2017 Feb 28| TCP: Avoi khatnak Panglong tonpumhnak lio ah aa telmi ramkomh kawlram in tu hnu kum 10 ah chuah a duhmi cu chuah khawh a si lai timi (secession right) kha Chin National Dialogue ah kumzabu 21 panglong tonpumhnak ah Chin Miphun nih chuahpi than dingin Chin Progressive Party nih an chuahpi tiah kan theih. Hihi zeiruang bik ah dah nan chuahpinak a si?

 

Pu No Than Kap-CPP Chairman:  Rampi ruahnak petu Daw Aung San Suu Kyi nih avoikhatnak panglong thinlung he kumzabu 21 panglong tonpumhnak kan tuah lai a ti. A duhmi paoh ramkomh in i then khawhnak timi cu panglong biahren ah aa telmi a si. Cutikah cu panglong ah a duhmi i thenkhawhnak kan telh lo ahcun panglong sullam thawtnam a um ti sual lai lo ti ka ruahmi a si. Cun a duhmi ramkomh in chuahkhawhnak phungphai timi hi kan rampi thencheunak hmanh in pakhat le pakhat tlukruang tein i pehtlaihnak, i hngalhpinak, biaknak, nunphung le holh hna aa khat lomi hi kan hmuh thiamnak dingah catar pakhat bantuk in ka hmuh, ralrin petu darkhing bantuk a si. Khat le khat kha aa tluk tein kan i zoh lo ahcun Shan le Kachin an si zongah ramkomh in chuah an duh ko lai. Cucaah thencheunak phung hi onh si ko sehlaw chuahduhnak lungthin ngeilo in ramkomh pi lungput he kan ram ser ding ah kan lungthin a funtomtu si deuh seh ti ka ruah caah a si. 

TCP: Hihi CND nih fehter in kumzabu 21 panglong tonpumhnak ah chuahpi sisehlaw cozah nih an cohlang hnga tiah na ruat maw?

Pu No Than Kap: Kawl cozah ti tikah Ralkap nih cun U Ne Win uknak a lak sin 1962 sin tein an um duh lo. Asinain ramkomh chungin chuahnak nawl timi nak in kannih cu Kawlram ramkomh ah khual bantuk kan si, tinvo kan ngei lo, namneh kan si tibantuk lungfahnak nih khan thencheunak a chuahpi deuh tiah ka hmuh. 

TCP: Nihin ah na chuahpi mi ramkomh in duhtik paoh ah chuahnak nawl  timi hi kan pe hna sehlaw chawlehthalnak  le zatlang nunnak caah zeitindah kan kalning a si lai?

Pu No Than Kap: Kum nga ruk cu kan har ko lai. Asinain kan ram in a chuakmi thil mansung hi a ei hmanh kan ei cawk lai lo. Kan ram ah zeihmanh leitang thil mansung a chuak lo timi hi keimah ka hngalh tawk ah a dik lo tiah ka ruah. Thantlang peng dah tilo ahcun leitang thil mansung tampi a chuak ko.

TCP: Uknak lei ah tah zeitindah kan ihruai hnga tiah na ruah? 

Pu No Than Kap: Kum 60 chung ramkhel in namneh kan sinak nih Chin miphun hi miphun dawtnak lei ah a kan sersiam i nutling patling ah a kan chiah cang tiah ka ruah. Ramkhel party kong hna ahcun party dang cio zong in kan dir ko hnga nain miphun dawtnak kongah cun kan i funtom ngai ko cuh. Uknak cu CNF zong nih kanmah nih kan tlaih in kan hruai dih lai timi cu an i timhmi zong a si ve bal lai lo.

TCP: Ramkomh thencheu ding an phan ruang ah kum 60 chung ralkap tuknak kan tuar ruang i thencheunak phung cu chim awk a silo tiah tlangcung miphun ramkhel upa hna nih an chim tawnmi cungah na hmuhning?

Pu No Than Kap: Hihi Kawlram ramkomh ah milurel a tam deuhmi Kawl nih an duhmi hoih in bia an chim a si tiah ka ruah ko.

TCP: CPP nih tutan ah ramkomh chungin chuah khawhnak nawl hal ding timi ruahnak an chuahpi hi CNDP party chairman le Chin miphun ramkhel ah pa pakhat dirhmun in zeitindah na hmuh?

Pu Zo Zam: Si, kan miphun kong ah kan duhmi chimrelnak caan a si i nawl kan ngeih lio zong a si caah kan hal awk a si ko. Cucu thilthar kan kawl chom in kan halmi siloin kan pa le nih hnatlaknak he min an rak thut cangmi a voikhatnak panglong biahren asi. Cucaah cu thil kan hal ruang ah buainak a chuak lai tibantuk zong kan tih awk a si lo tiah ka hmuh.

Pu Ngai Sak: Kei cu tu hi a caan a si rih lo tiah ka ruah. Tlangcung miphun hna nih kan covo cu a si ko nain Kawlram tuanbia kan zoh tikah Ralkap nih uknak an lak tikah an laknak a chan an chimmi cu rampi thencheu lai kan phan caah a si an ti lengmang. Cucu an lungput a si ti kan hngalh cang caah miphun hme hna nih kan ruah awk a simi cu, cu thinphannak an ngeih caah ramkomh in kan chuak hrimhrim lai lo tiah biakamnak kan pek hna. Cu tikah kan cungah Kawl nih an ngeihmi lungput fiang tein kan hngalh khawh lai. Cucaah tu lio i ramkomhpi daihnak kan kalpi lioah cun hi kong cu kan ceih awk a si rih lo tiah ka hmuh. +++