17
Sun, Dec
59 New Articles

England Aiawh Chuihnak In Wayne Rooney A Din

Sport

Salai Tluangkipthang: 2017 August 24|England pumpululh phu (football team) ah captain simi Wayne Rooney nih vawleipi pumpululh chuih celhnak in ka din cang lai tiah a thanh.

August 23, cawn nithumni ah England ram ah kawlsut tammi lak ah a telmi le captain a si liomi Wayne Rooney nih England aiawh chuihnak in ka din cang lai tiah a chim. 

A dihnak kong ah, "Atuhi dinh caan a cu ko cang rua tiah ka ruah. Nain, England caah thazaang a chuah zungzaltu le thapetu ka si zungzal thiam lai" tiah a chim.

Premier celhzuamnak dinhcaan karlah i thialkamnak tuah lio ah, Manchester United in Everton ah a thial i, cu lio ah England coach (nipiah) Gareth Southgate nih Rooney cu World Cup luhnak (qualifier) caah celh ding ah a pehtlaih ko. Nain, kum 31 a simi Rooney nih, Rampi caah silo in, Club a celhnak ah thazaang chuah deuh a rak i timhnak a chim. 

England caah goal (kawlsutmi) 53 a ngei i, voi 119 tluk a celh hnu ah a tu bantuk in England le vawleipi pumpululh celhzuamnak in a dinh hi a si. 

England coach Gareth Southgate nih tu zarh chung ahkhan a hun ka pehtlaih ko. A rak ka chonh ko, keimah ka celh tawnnak hmun ah i celh than ding in, a ka auh ko nain, caan saupi chung ka rak ruah ciami le, har ngai in biakhiahnak ka tuah cangmi a si caah tu bantuk in dinh ding ah ka timi a si tiah AP sin ah a chim.

Biakhiahnak har;

"Ka caah biakhiahnak har taktak a si. Hi biakhiahnak ka tuah khawhnak hnga ding caah, ka chungkhar siseh, Everton i ka manager siseh, ka hawikom le naihniam vialte zong tha tein ruahnak ka hal dih hmasa hna. Cu hnu ah a tu bantuk in biakhiahnak ka tuahmi a si. England rampi aiawh in, England mizapi caah pumpulh celh hi ka caah a sunglawi tukmi a si zungzal. England caah chuih ding le captain siding ah thim ka si poahpoah ah ka lawm i, ka caah a sunglawi tukmi caan tha a hlei khun in ka tincomi si tiah ka lawmh zungzalmi a si. Hi bantuk ka si khawhnak ding ah a ka bawmchantu vialte cung ah ka lawm. 

Hiti England ram caah siseh, Manchester United caah siseh, a tulio Everton caah a celh cuahmahmi Wayne Rooney nih biakhiahnak a tuahmi kong ah England Captain saupi a rak tuanmi David Beckham nih hin tin a chim. 

 

"Kum 17 tluk a rak simi Wayne Rooney cu a voikhatnak a rampi caah aiawh in a rak chuih lio ahhin captain ka rak si. Culio ah, hi ngakchiapa nih caan saupi ram aiawh in rak i celh cang sehlaw ka lawhter. Cu lio caah, Rooney i a captain dirhmun ka rak si. Captain nih kan i timhmi cu a celhmi poahpoah nih tha tein an i celh khawh ding le, teinak kan hmuh khawh ding kha fakpi in, thazaang pek, nunchimh le a phunphun tuah a si. A celhnak tei khawhnak men lawng silo in, lungthin in teinak hmuh ding tbk. tiang thazaang pek a si. Cubang, England caah Captain a si i, a si khawh chung in tlamtlin le teinak hmuh ding ah a zuammi a si i, nihin ah teinak nganpi a simi minthatnak a hmumi a si i England nih sunhlawihmi 'three lions' angki tiang a hruk khomi" tiah Beckham nih chim.

Cun, "pumpak keimah ka sinak tein Rooney nih England caah celh tilo ding in biakhiahnak a tuahmi cung ah ka ngeih a chia ngaingai. Ahopaoh nih kan ngai theo lai dah, a zeipoah si ah, Rooney cu talent tha a ngeimi a si. Hmailei zong ah hlawntlinnak a hmuh thluahmah ko lai" tiah Beckham nih cun, a personal Instagram ah a tial. 

Nain, Rooney nih England football team a hruai chung ah teinak ngaingai an hmu kho lo. Thanchonak a rak tlawm i, World Cup ahcun, quarterfinal leng an pet kho ballo. Cucu, a hlawntlinlonak ah soisel a ton ve mi a si i, vawleipi hmai ah an ram caah teinak a hmu lomi tiah an ti phah. 

Amah Rooney zong nihcun, "ka ngaichiat tuknak pakhat cu England caah teinak ka hmuhpi khawhlomi le teinak hmumi England phu ah ka tel khawh lomi hi a si" tiah a ti. Nain, Gareth nipiah thar nih England caah a ti khomi, a chuih thiammi tampi he kar a hlanpi hna lai tiah zumhnak le ruahchannak ka ngei tiah a ti. 

Nikhat khat ahcun, kan chunmang cu a hung tlingte lai tiah ruahchannak ka ngei. Cucu, a hun tlinnak ding caah thazaang petu sinak in ka rak hngahhlang zungzal ko lai. ~ Wayne Rooney 

Ref. AP, CBC, David Beckham