19
Thu, Oct

TCP Channel le Dr. Lian Hmung Sakhong Biruahnak Part I

Dr. Lian Hmung Sakhong Konglam Tawi: Kawlram ramkhel, remdaihnak lamtluan kong ah Kawlram le Chinmi a hninhtu zoh tikah Dr. Lian Hmung Sakhong hi hrelh a tha bak lomi pakhat ah aa tel. President hlun U Thein cozah nih Kawlram daihnak serding khuakhannak a thawk in tlangcungmi lei in bochanmi le phunglam (policy) sertu tampi lak ah Dr. Lian Hmung Sakhong hi nihin tiang hruaitu le biapi bik pakhat ah aa tel lengmangtu a si.

2016 kum ah ramkhel lei a cawlcanghnak a langhnak tampi a hung um. Kum hrawmthawk ah tuahmi Chin National Front (CNF) ah Chairman - 2 rian khinh a si. Ramkomh remdaih sernak committee asimi UPJDC (Union Peace Joint Dialogue Committee) ah Secretary ah aa tel pin ah NLD cozah a kai hnu in August 31 thawk in tuahmi Union Peace Conference - 21st Century Panglong Conference tuahnak ah Secretary chungtel lawng si lo in chimhnak nawl ngeitu pakhat ah an thim. Cun ramkomh cozah le rampi kahdaih hnathlaknak (NCA) min a thutu tonpumhnak le remdaih ceihmainak ah tlangcungmi NCA min a thumi lei in hruaitu lakah pakhat a si zungzal. Kawlram Media tampi nih a biachimhmi an lak, TV tampi ah biachim an sawm bantuk in Kawlram media tampi nih tlangcungmi hruaitu tiin hngalh ngaimi a si.

Cu pin ah Center for Development and Ethnic Studies (CDES) timi a dirh i Executive Director a tuan. Tlangcung mi tampi sin ah Federal le ramkomh remdaihnak kong ah mipi he tonnak, chimhnak tampi rian a tuan kho. Cun thiamsang tampi hmang in Kawlram remdaihnak ah cozah lei thiamsang, ramkip thaimsang le tlangcungmi lei thiamsang hna funtom in biaruahnak, remdaih ceihmainak tampi a thawkpi hna. Hi nih Kawlram remdaihnak thil sining ramkip media sin ah Kawlram mizapi sin ah hmuhsaknak a tuah.

Atu bantuk a riantuannak le aa pekchanhnak ruang ah Chinmi tampi nih ramkhel lei in hruaitu upa upatmi lak ah aa tel. Kawlram tuanbia ah a voikhatnak Vice President a tlingmi Pu Henry Van Thio le Chief Minister thar Salai Lian Luai lunglawmh thlacamnak tuahpiak lio zong ah Chin mipi aiawh in bia roling a chim. Cun 21st Century Panglong Conference zong ah CNF ai-awh in bia roling a chim. Hi bantuk in a cawlcanghnak cu 2016 kum ah Chin miphun le Kawlram ramkhel tampi a hninh caah News Maker of the Year ah kan hun thimnak hi a si.