27
Sat, May
104 New Articles

President Donald Trump Nih Pacific Chawlehthal Hnatlaknak Tuahmi In American Chuahding In Nawlpeknak Min A Thut

Politics

TCP-Hakha| 2017 January 24| -  American President Donald Trump nih thimnak i teinak a hmuh hnu ah a rak chim bantuk in Pacific chawlehthal hnatlaknak ngeihmi (Trans-Pacific Partnership _TPP) in American kan chuak lai timi nawlpeknak minthutmi a chuah.

Trump nih TPP hnatlaknak ngeihmi cu American caah rian hmuhnak a kan sunghter i American sipuazi zong a hnorsuan tiah mizapi theih zong in a chim.

Avoi 45nak American President Donald Trump nih rian a tlaihnak zarhkhat chung ah hi nawlpeknak cu pehtlai in min a thut. TPP kongkau kan chimnak hi a sau cang. Kan ram nih TPP in chuah ding hi American riantuantu hna caah a biapi tukmi kongkau a si tiah Trump nih White House i nawlpeknak min a thut lio ah a chim.

Atu ah American nih TPP in a chuahmi hi Pacific chawlehthal hnatlaknak ngeihmi a rawk kho. TPP hnatlaknak cu Australia, Brunei, Canada, Chile, Japan, Malaysia, Mexico, New Zealand, Peru, Singapore, Vietnam le American nih 2016 February 4 ah min an rak thut. Hi ram 12 nih chawlehthalnak an tuahmi zapi fonh hi vawlei cung sipuazi tuahmi zatuak 40% tuk a si.   

Trump nih 1994 kum i American, Canada le Mexico ramthum nih min an rak thutmi Chaklei America A Zalongmi Chawlehthal Hnatlaknak (North American Free Trade Agreement- NAFTA) zong ceihmainak ngeih than a timh tiah theih a si.

Ref: AFP, BBC

BLOG COMMENTS POWERED BY DISQUS