19
Thu, Oct

Tulio Laimi Facebook Ah Lar Ngaimi 'Testony Apps' Ralrin A Herh

Theihtlei

TCP Hakha: 2017 September| Atulio Online/Internet le Facebook chung ah lar ngaimi Application pawl an hung tam ngaingai. Hi Apps. pawl nih an nun khawhnak hnga ding caah host tuahnak 'website' an hun herh. Cucu 'website' pawl hmang cun, a bik in Facebook ads., le post ah chiah tik ah khulrang in hmuh awk ah an hung lang.

An nung! Facebook a um hlan hrimhrim ah, hi bantuk Apps pawl hi an rak um cang, Google group pawl zong ah thlah le share a rak si theo. Cucu, an nun khawhnak ahcun, 'database' silo ah 'data center' an ser. Cu an sermi data center (thil fimnak) cu humhimnak tha tein tuahlo mi a si ahcun, cucu pumpak caah tihnung ngaingaimi tiang a phan kho. A bik in, tulio Internet ah a kai taktakmi pawl felfai tein an tuahlomi Apps. pawl hi an si. 

Tih a nun khunnak cu; tachunnak ah Facebook hun la ning law, mi cheukhat cu Facebook ah sining dikthlir tein tial a hmangmi um a si. Sining vialte dikthlir tein tial lawng silo in, pumpak lawng nih theih ding a simi, chuahni, bank no. tbk., sensitive (biapi) simi, fimtawl haumi le a thli in chiah dingmi pawl kha thlahthlam in a um kar ah fir khawh a si i, phungning in umlomi company pawl sin ah phanh khawh a si. A felfailo mi company lawng silo in, pumpak sin zong ah phanh khawh a si. 

Pumpak data fir duh ruang ah tuahmi zong an si kho i, cucu na luh sual ahcun, nangmah na pumpak information tck. ah passwords, chawlehnak he pehtlaihmi, bank he pehtlaimi, thilri ngeihmi he pehtlaihmi le a dangdang pumpak herhhai kha an lak khawh. A bik in, internet le online he pehtlah in  hmanmi poahpoah kha an fir khawh i an lak khawh. 

TestOny hi tahchunak ah hun zoh usih;

Facebook app pakhat simi TestOny hi tulio ah a lar ngaingai. A bik in, hihi Facebook hmangmi caah sermi Apps phun khat a si. Nuamnak menmen in tuahmi khi a si. Ahopoah nih fawite in ser khawhmi Apps khi a si ko. Cucu, "fun and entertainment purpose only" timi tang in an sermi a si. 

Apps nih cun, nichuak simi le khuaruahhar ngai simi bang khin, biahalnak le bialehnak a tuah. Pumpak sining he a naihniam ngai in bialehnak a phi a tuah nain a taktak pakhat hmanh an si lo. Hi bantuk Apps in hin pumpak Data firnak ding caah tihnung ngaimi le hacker pawl nih an hman duh ngaimi zong a si fawn. 

A tanglei ah, Apps an i celhnak in a chuahmi a bialehnak relnuam pawl an si. 

Hihi na tuah khawhnak ahhin zeidah na tuah herh ti si ahcun, App nih na Facebook ID luhding <login> an fial lai. Cucu, na pumpak Facebook account in na luh a herh. Cun, biahalnak kha na hmeh lai i, a bialehnak kha na kal than lai. Cuhnu, na Facebook profile kha analyse a tuah lai i, cu hnu ah a result a rak chuak lai. Hihi Computer thiamhleisang nih, "algorithm" in tuahmi a si an ti. 

Zeidah a cang? Zeidah a bau? Zeidah tihnung?

1. Facebook ah na lung an la ngaimi APP na hun hmuh.

2. Facebook ID luh ding ah an hal i, na lut.

3. Facebook ID na luh in, App kha na timeline cung ah post ding ah na onh.

4. Facebook timeline ah post ding na onh in timeline ah notification kai ding a tuah. 

5. Facebook na luh ah na pek chihmi hna cu, na pumpak Facebook luhnak ah na hmanmi na Password tbk. dikthlir (details) kha si. 

6. Zeidah cang lai timi lentecelhnak ahcun na nuam ngai ko nain, zei vialte dah a cang kho i, a rawk kho timi bel cu na ruat ti lo.

Zeihmanh ruahlo in, na tuah i, na theihlo in na tuah sualmi si ahcun, zei ti tha! Nain, hmailei ahcun, na ralrin a herh. A bik in ramleng ah ummi, Online le Internet in pehtlaihnak hmangmi le thilcawknak tbk. tiang hmangmi nih ralrin a herh khun. 

TestOny lawng silo in a dangdang ralrin dingmi App an tam ngaingai. Tahchunnak ah, WellFinger, Vonvon, Nametest.com tbk. pawl hi an si. A ruang cu, hi bantuk App pawl nih hin zeitluk in dah Data pawl hi an humhim khawh lai? Humhim duhnak lungthin tah an ngei taktak maw? Firduh men in maw an tuahmi a si timi hi theih khawh a si lo? Cucaah, Online ah an tuah cio pat tiah tuah ve lo ah a tha. 

Cucaah, na wall ah lang hlah seh, tuah ti hlah ning na ti a si ahcun, TestOny App zawn ahkhan hmet law, "Hide all from testony.com app" timi na hmeh khawh.

A ruang cu, Facebook le online, internet cung ah na chiahmi thil biapi, data, password pawl kha an lak khawh. Cun, ka facebook an ka heck, keimah silo in, an lut timi a um pah theo fawn! Cucaah, a canhlan ah ralrin a tha! Online le Cyber hi a that tuk ko lio ah ralrin zong a rak herh ve....

BLOG COMMENTS POWERED BY DISQUS