16
Mon, Jul

Nu Pawl Hi Kum Zeizat An Si Ahdah Nau Pawi An I Fawih Bik?

Health and Beauty

Kan hnu May thla dongh zarh khan US ram siibawi thiam sang hna nih cithlatnak an tuahmi ah nu hi a bikin kum 30 in a cunglei an si hnu ah nau pawi an i fawih bik tiah an hmuh chuah i, kum 30 cunglei hin nu pawl an nauinn zong a thawn saling a si tiah an chim.

 

Nu tampi cu Kum 25-29 kar ah fai an pawi tawn ko hna nain kum 30-34 kar i nau a pawimi minung zat lawmmaam cung vawleicung hin an tam lo ti zong US siibawi thiamsang hna nih cun an chim. 

2014 kum lio i cazin rak lak lio khan cun nu kum 26 an si ah fa a pakhatnak ngeih ding a pawimi an tambik tiah an rak chim. Nain 2017 kum cun kum 30 leng i fa khatnak a pawimi an tam deuh ti a si. 

Nu nih kum 30 in cunglei an phak hnu lawng ah nau an pawi ah hin anmah ca an ngandamnak ding zong a tha khun. US ram i kum 27 tang fa ngei cangmi bia an hal hna tik hna ah ‘fa kan ngeih rawh cang hnu cun kum 40 kan si cang ti tluk in kanmah le mah kan i chia’ tiah a chimmi an tam caah kum no tuk i fa ngeih nih hin thinlung no zong tampi a zorter deuh caah kum 30 hnu in fa ngeih cu a tha deuh khun ti zong US siibawi lei nih cun an chim chih. 

US siibawi lawng si lo in US ram ah sianghleiruun pakhat i ca a chimmi nu Elizabeth Gregory nih a tialmi “Why Women are Embracing the New Later Motherhood” cauk zong ah kum 30 cunglei i fa a ngeimi nu cu nu puitling ding in a tha ngaimi a si tiah a tial. 

Tu ah cun vawleicung ram thangcho tampi i an hmuhchuahmi cu fa khatnak ngei nau pawimi nu cu kum 30 in cunglei an si ah an tam bik i a changtu ah kum 40-45 kar an si. Kum 20 cung lawng i fa ngeimi cu an zor ngai cang ti a si. 

Mah hi cu vawleicung ram thangcho hna nih an hmanmi le an zulhmi a si.

Ref: Health 

 

BLOG COMMENTS POWERED BY DISQUS