17
Sun, Dec

Minung Pakhat Nih Caan Tha Hi Voi Khat Lawng Maw A Ngeih Tak Ko?

Capar

By, Za Bawi Thawng @ Pabawi 

Chin Digest Vol.2/No.3, 2016 August| Ka ngakchiat lio sianginn ka kainak i ka siang cachim te, nulepa ule hna nih an rak kan chim tawnmi cu ‘minung pakhat nih caan tha kan timi hi voi khat lawng a ngeih’ ti a si. Ngakchiat liote in ka lungah caam rawh cangmi cu si kaw kaa thanpi beh.  

Keimah le keimah biahalnak kaa tuahmi cu ‘si ahteh, minung pakhat nih a nun chung ah caan tha voikhat lawng cu hei ngei tak ko sehlaw hmailei a nun lam thluan ah zeidah a lawh kun hnga? Caan tha voikhat a tolh ruangah a hmailei lamthluan a pit cang tinak maw a si hnga? Asiloah cu caan tha ngah/hmuh than khawh nakding ah  ngakchit lio nun ah maw kir than a hauh kun lai?’ 

 

Ka hnaki le mithmuh in theih lang tawnmi cu mi pakhat nih ai timhmi a tolh/pial (sual) i cu mi nih lungrethei vansang in a um ko lioah ‘na caan tha na tolh ko ne!’. Lungrethei vansang in a um liomi pakhat ‘na caan tha na tolh ko ne’ ti cu i hnemhnak tu si lo in siivai phun khat tu a si deuh ko lai. Cheukhat nih, i zuam rih ko a timi zong an um. Zeikhom si ah, hibantuk hnemhnak le bia theihmi nih hin minung pakhat i a lungretheih lio caan ah van theih chap cu thilrit phurtu men an si kho. 

Pathian nih a kan serpiakmi ni le caan ah ni chia duh nunglo le caan chia ah a kan serpiak bal lai lo. Mah a kan serpiakmi a hmanzia thiamtu ca ah cun zeitik caan paoh kha caan tha ah aa cang dih ko (Catialtu zong a hmanzia thiam mi cu ka si ve lo). Vawleicung ah caan tha a dih caan cu vawlei kan liamtak te ding caan khi si. Vawlei hmanh liamtak hlan ah lung dong mi cu ‘caan tha tolh’ a si ko hnga. Zing a chuak lai i zanlei nitlak tiang nikhat hnu nikhat a caah ni thlum le caan tha a si kho ve ti lo.

Minung pakhat kan taksa pum cu zeitluk a sum ngan in hei lian ko hmanh sehlaw mah kan pumsa cungah nawl a ngei biktu le hmailei kan lamthluan bia a khiak khotu cu kan thinlung hi a si tawn. Thinlung cu a fa te lai nain mah  nih cun kan taksa le ruahnak vialte a tlai biktu tawh pakhat bang a si. 

Chinmi nih Refugee rak tlanh hlanh ah tlanglo rian le kuli rian hi tampi nih cun rak tuan cio a si. Tlanglo rian cu kum fatin amah le hmuh khawh ding tawk te in ruuk ah aa kumh khawh, thancho ding lam cu kawl lo tluk ah a cang ve (tu kan chan ahcun kokek harnak hna a um pah tikah chimawk a har ve cang). Nain, lo a ngei ve lomi ca cun kuli rian an panh. Mi kut tangah kuli rian cun van i thok i rian tuan khawh deuh le hmuh khawh deuh a si tikah sum a lutmi hna a tam pah. Kut cung i SUM lutmi a hung tam cun, kuli rian in chawlet rian ah aa thialmi zong an um. Chawlet rian timi cu thaizing ah ni a chuak lai i zanlei ah a tla than lai ti in chunmang i manh cia khawh a si ve lo. A chel ah chikhat lo pi in mit thep karah a ziam khomi thil an si. Chim duhmi cu, van chiami ca cun suimilaam kar le mitthep karah ngeihmi chawva vialte an lo ziam kho. Mahti a lo ziam mi cu caan tha liamtak cang ti a si lo. Lungdong lo tein hmaiah kal le rak i thonak (kuli) rian khan ithok than a ngamhmi ca cun hmailei lam thluan caah caan tha hmuh than khawhnak ding lam a si. Cu si loin, lung dong le vansang, zeihmanh tuan huam ti lo le kuli rian in ithok ding kan zenh chung paoh cu kan ca ah caan tha timi voi khat lawng a um ti khawh a si hnga. Sungzatlaknak timi hi Pathian nih kanmah liang cung lawngah tla ding in a khinh bal lo, kan pawngkam ah minung tampi nih an ton ciomi thil a si. Mah tu nih itimhnak le zuamnak thinlung ngeitu kha caan tha ser than lengmang a si.   

Joy Bruce nih a chimmi cu “Na tlik tikah voi zeizah na tluk kha a biapimi a si lo, mah nakin a biapi mi cu na tluk tikah tho than i din lo tein na tlik tu kha a biapi deuh” tiah a chim.

Biadonghnak ah, caan tha kan timi cu thut sawh bu le chantling cung in hmuh khawh mi thil a si bal lo. Lung thum in teimaknak a chuahmi ca lawngah caan tha cu hmuh khawh than a si. Caan tha cu voi khat lawng a um bal lo i a dih ziam khomi thil zong a si lo. Kan caan tha a dih tik caan cu vawlei kan kaltak te tik ni khi a si. Pathian nih ni a kan pekmi hi ni chia pakhat hmanh a um lo bantukin ni tha le caan tha lawngte an si dih ko, a hmang thaimtu ca cun!!!

 

BLOG COMMENTS POWERED BY DISQUS