18
Sun, Feb

Ṭuanvo An Lak Ngam A Herh Caan Phan Te Lai 

Capar

Salai Thawng Tha Lian S| 2017 August 25| Cozah uknak tha (Good Governance) timi hi, Nayef Al-Rodhan nih tahfung pariat in a rak chim. Cucu vawlei cung ram tam deuh nih tahfung ah an hman cio. Cu pariat chung in a thawt biknak a taksa pali hi hun char ta ka duh. Cozah uknak ṭha timi ah cun, tlukruannak he mizapi nih teltum cawlcanghnak (participation), zalong tein media cawlcangh khawhnak (freedom of expression), tuanvolak khawhnak (accountability) le tuahṭuanmi langhfiannak (transparency) a umnak ram hi cozah uknak ṭha cu a si, a ti. Hi thil pali a um lo ahcun, cozah uknak ṭha ti khawh a si lo tinak khi a si. Al-Rodan nih, "cozah uknak chia a timi cu ningcang (system) loin a ummi cozah uknak khi a sawh duhmi a si. Ningcang loin a ummi cozah ah cun ziknawh le eihmuarnak a tam kho a ti. 

“Chin ramkulh cu ziknawh eihmuarnak a tambik, a sangbik timi bia hi khuazei nih cazin an lakmi in dah an chim hnga? A felfaimi hngalhpinak an ngeih ahcun a tha ko asinain Cozah soisel le thangchiat duh men ah an chimmi bia a si sual ahcun an bia kongah ṭuanvo an lak ngam a herh caan a phante lai” tiah Chin Ramkulh Cozah phu chimrelnak nawlpekmi Minister Salai Isaac Khen nih a chim. 

Cun, kan hnu naite ah “kan Chief Minister Salai Lian Luai nih Lai media pawl cu a kan tong duh lo _ Kawlrawn lei media pawl lawng a ton duh hna”, tiah The Chinland Post nih a tial hoi. 

Hi bia pawl hi vun letthal ta usih. Kawlrawn media ngan deuh lawng ton duh cu khat lei in cun a thatnak tampi ve ko lai (Central cozah nih Laitlang kan thawngpang thei ve hna sehlaw ṭhatnak tampi a chuahpi lai, ti ruahnak zong si kho men) nain kanmah Laitlang chung ummi media ton duh lo cu kan hrik le ṭhah a hmu dihtu sin ningzah bantuk ah ka ruah. ‘Ṭuanvo an lak ngam a herh caan a phante lai’ timi bia hrim hi cu hmailei ah hohmanh nih chim ngam ti hna hlah seh tiah mizapi tlerhkhonh a si. 2016 lio ah Chin World Media phu pawl cu Minister Isaac Khen nih Chin Ramkulh Cozah phu min in a-auh hna i tazacuai ding dirhmun tiang an rak phan-(a hnu ah cun an irem kho ṭhan). Cu lio ṭhiamṭhiam ah, The Chinland Post a tuanmi ka hawile nih Chin Media Network le Minister Salai Isaac Khen kan ii khuk-khak _ kan funder (bawmtu) simi UNDP he tiang pehtlaih dih a si ii kan buai ngai te, tiah an ka chimh.

A felfaimi thawngpang/cazin lak awk ṭhalo in cun pei mizapi an kan tlerh chel, media an hrem hna chel! Hitler nih, “thawngthanhca (news) pakhat cu ka ral a simi ralkap a thongza leng nakin ka ṭih deuh” a rak ti. Cun, Gen. Ne Win nih a rak hrem i a thah hmasa bikmi cu media pawl an si ve. Lai media kan ingeihmi hna lak ah Laitlang cozah kong a tial bikmi Chin World Media le The Chinland Post tlerhkhonh lengmang an si ahcun Laitlang ah media loin cozah nih rian a tuan tinak a si. Media loin cozah nih rian a tuannak cu ralkap uknak lio dun-le-dan he a dannak um lai lo _ eihmuar zong tam ve kho ko. 

“Chin ramkulh cu ziknawh eihmuarnak a tambik timi bia hi Chin Ramkulh Hluttaw a dotdot rianṭuanmi fianternak le mizapi he Hakha hmailei ṭhanchonak ca saduhthah ruahcaihnak, Carson Hall ah an rak tuah lio ah CBCUSA in Rev. Dr. Thla Awr Bawihrin nih Minister vialte hmai ah a rak chim. Cu hnu ah, Chin State Hluttaw haotu Pu Zo Bawi zong nih a chim ve i, Chin National Democratic Party haotu Pu Zo Zam zong nih a chim chap ve. Hi bia ‘Chinram eihmuarnak kong’ a chimtu hna tampi lak in hi hna pathum hi mi hngalh deuh le kan miphun chungah kan pa le an si” tiah The Chinland Post ah kan hmuh. 

A chunglei thil kalning le sining an theih ve tik ah mizapi he neih deuh (accountability & transparency) in kan ram caah thilṭha chin in kalpi le rianṭuanṭi ding an duhsak piakmi hna a si tiah ka ruah. A silo hmanh ah kan ram sining a theihngal ve mi, a ṭuan cuahmah vemi an si _ ralṭha tein thil dik ah biadik an chim ngam a si. 

Ram hruaitu cu mizapi he neihniam tein um, ruahnak cheuhmi zong cohlan, mizapi an duhnak zong zulh ve, soisel zong in le tuar khawh ve ding a si. Mah siloin; mizapi le media nih ka ṭih hna seh tiphun in tlerhkhonh, a ngamhmi nih ka mei ka tawng hna seh tiphun in ihrocer _ nawlngeihnak kha pumpak langhsernak ah hman a si chung, media loin Cozah nih rianṭuan a timh chung cu, eihmuarnak zong cu a karh deuh ve ko men lai. Atu ah, NLD cozah a kainak kum khat lengpi a si cang, an thawngpang anmah nih Chin mizapi sinah fianternak an tuahmi voikhat lawng ka theih rih. Cuhmanh cu Media nih an nawr lengmang hna hnu ceo ah hmaikhah loin a tuahmmi an lo. Zei vialte dah nan tuah cang, zei bantuk dah tuah ding nan itimhmi an si, khoika dah nan phak cang, timi mizapi sin a phanhter khotu ah cun media hi a ṭhabik si _ a dik bik zong an si lai. Mizapi nih thimmi mizapi cozah cu mizapi nih nan thawngpang fiang tein kan theih a herh ve. Zauk phung ah cun, mizapi nih an aw-an chuahnak nawl an ngeih, cozah soiselnak nawl zong an ngeih, pumpak zong in soiselnak nawl a um, mizapi nih thimmi cu mizapi nih a-uk awk a si ko. 

Soisel cu chim lo, media pawl nih thawngpang hal awk hmanh a tha lomi cozah cu ralkap uknak cozah he a dannak a um lai lo _ eihmuar lei zong ah aa dang theng lo kho ko. Cozah uknak ṭha timi tahfung he zong aa kalh ngaingai caah Laitlang cozah cu cozah uknak ṭha ti khawh a har ngaingai rih tinak a si. Cucaah, 2020 NLD cozah kum a dih tik in Chinram cu eihmuarnak a tam bik pawl ah aa tel ṭhante sual ahcun ṭuanvo an lak ngam a herh caan a phan vete lai _ kan si taktak te sual ahcun anmah ruang ah si te lai.

Thawng Tha Lian S
08/08/2017

Note: Hi ca hi keimah pumpak lawng in a si. Ka riantuannak le a dangdang he zeihmanh pehtlaihnak a ngei lo. 

 

BLOG COMMENTS POWERED BY DISQUS