16
Mon, Jul

Theihternak: Atanglei cakuat hi Bawmram, Bangladesh in December 9, 2016 ah Bawmmi upa pakhat nih The Chinland Post ah chuahding in a kan kuatmi a si. Editorial Board nih a cakuat a fian lo caah chuah rih lo siseh law thawngfiang halchap hnu ah chuah siseh tiah bia kan chah. December 9 ah The Chinland Post nih ca kan kuat than nain nihin tiang lehnak a kan tuah rih lo. Nihin (December 12) ah Paletwa peng ah AA le Kawl cozah ralkap kahnak a chuah tikah hi cakuat hi careltu nih theih awk aa thlak ko tiah kan ruah caah atu kan hun langhter thannak hi a si. Cakuat tialtu min kan langhter lo -- Editorial Board, The Chinland Post

Atu lio Paletwa peng Pikhiang Khuami le Bangladesh Ramri ummi Bawm khuami kan konglam ka vun in theihter duh hna.

Tuanbia

AA (Arakan Army) bantuk in Rakhine hriamtlai a simi ALA (Arakan Liberation Army) le ALP (Rakhine Liberation Party) nih an kan hnahnawhnak hi 1996 kum in aa thawk. Khuami ramtang ah hramhram in an kan kalpi, kan rak kan hrem tawn. I tlanhnak ah tangka an rak kan hal. Fahnak le intuarnak phunphun an kan pek. Atu AA timi Arakan Army an hun chuak. Anmah AA hi atu kanmah Bawm kan umnak ah a um vemi Marma timi phun tlawmte a simi he aa naihniammi an si. Marma miphun hi atu kan umnak ramri ahhin kanmah Bawmmi nakin an tam deuh. AA hi kanmah Bawm umnak, Bangladesh ram cung ah an ra i an um tawn. Tikah, AA le anmah he aa naihniammi pawl hi Bangladesh palek nih tlaih le khih an i huah lengmang. Cheukhat cu nihin tiang Bangladesh thong-inn ah tampi a um rih.

Atu lio dirhmun

Ahlan Rakhine hriamtlai pawl bantuk in 2016 kum April thla thawk in hnahnawhnak le harnak tampi AA nih an kan pek than. Bawmmi pakhat cu AA nih April thla an hruai i atu hi khoika a um ti thawng kan hngal lo. Athih le a nun zong kan thei lo. Fa pathum le nupi he khua a sami a si. Anupi cu atu harsa ngai in a fale a zohkhenh hna. AA nih an hruaimi pa hi mitha a si. Thatlonak riantuan a hmangmi a si lo.

Atu kan khua hi Bawmram ah khualtlawngmi (Tourist) an rat tawnnak a si i hmunhma zong Tourist Sight ah ser a si. Cun Bangladesh ram a sang bik tlang ah aa telmi a si. Khual tamdeuh cu Bangali an si. April thla ah Bangali pathum cu khual an rak tlawng. Thil tamtuk an cawk i an phor kho lo. Khuami cu tangka pek in phorhpi ding in bawmh an hal hna. Kan khua in khuapi an kal lio ah AA nih lampi ah an tlaih hna. Nihin tiang cu hna cu khoika an um ti kan hngal ti hna lo.

Bangladesh ralkap he zong an i kap tawn. Bangladesh ralkap zong tampi an thi. Ruak hi an kan kawlter tawn. Ruak kan hmuh kho tawn dih hna lo. Hi bantuk ruang ah kan ngaih a chia pin ah tampi kan temtuar.

(AA Ralkap nih ralzam bawmhnak facang an pek hna lio -- Hmanthlak: Cakuat tialtu)

November 2016 kum ah a cangmi

1. AA nih lampi ah Bomb an tar. Paletwa peng in Chinmi pakhat cu aa lamh sual i Paletwa sii-zung ah kan kuat. Paletwa siizung a phak hlan ah a thi. Anih hi Bawmmi he i cawhnak Paletwa peng Pikhiang khuami a si.

2. Midang pakhat zong Bomb aa lamh sual ve i nihin tiang kan khua ah thlop a si peng ko.

3. Atu hi Pikhiang khua cu thingphang in an um. AA ralkap an rak phan. Kawl ralkap an rak phan. Cheukhat nih CNA zong an rak phan tiah an ti. A caancaan meithal thawng hna kan theih i a thimi an um ti zong an ti. Nain ralkap an phanh lawng kan hmuh tawn nain an i kap taktak cu kan hmuh fiang lo. Pikhiang khua ahcun ralkap phunkip cawh in an lut chuak lengmang.

Pikhiang khua ah AA le Kawl ralkap i kahnak a chuah ruang ah AA nih khuami (Bawmmi tam deuh an um) cu khua in i thial uh an ti hna. Chaihkhiang khua (Bawm khua), Bangladesh ah an thialter hna.

Pikhiang ah a um ve mi Bawmmi cu an thilri zong pakhat hmanh an i ken lo. Chaihkhiang khua ah an um i an zuatkhalhmi caw, na, ar, vok le a dangdang facang, cinthlak in an ngeihmi eidin zong an kaltak dih.

Atu hi AA nih Pihkiang khuami cu nikhat ah facang 500 grams an pek tawn hna.

AA nih Paletwa cu kanmah ram a si an ti. Pikhiang ah Bawmmi umter an kan duh lo. Khua hrawh an timh tiah kan ruah. Atu hi AA nih khuami 7 cu an kawl hna. Khoika an zam ti kan thei lo, nain AA nih an thah ko hna tiah khuami nih cun kan ruah.

Atu hi Bangladesh ummi Bawmmi nih hnipuan, facang le tangka kan kholh i Pikhiang Bawmmi kan tawlrel cuahmah hna. Hmaizarh chung ah bawmhnak tlamtlingte in an sin kan phakter dih lai. Chin miphun dihlak bawmhnak kan herh ko.

Paletwa peng ummi Chinmi phun caah kan lungre a thei. Atu Paletwa peng Bawmi le Chinmi kan umnak pawl hi AA nih an kan chuh ahcun khoika dah kan kal ti lai. Lungre theih le kal umnak kong ah tihphannak tampi kan ngei ko.

Chin ramkhel hruaitu hna nih hi kan kong hi biatakte in kan ruahpiak uhlaw kan duh ko. Chinmi zapi le hruaitu nih Paletwa peng ummi Chinmi, Bawmmi le Bangladesh ramri ummi Bawmmi kan dirhmun theihnak ding ah mah ca ka vun tial hi a si.

Lawmhnak he
Bangalesh le Paletwa Ramri ah a ummi Bawm khuami upa

BLOG COMMENTS POWERED BY DISQUS