17
Sun, Dec

Hakha Khua Kauhchap Ding Ekah 100 Chung Ummi Pawl Kong Cozah Phu Nih Biachahnak A Tuah Cang

Politics

 Salai Ngun San Aung| 2017 October 3| Hakha ah sangthar kauhchap ding ekah 100 chungah inn sami 32 le vawlei hmun ka ngei a timi 34 kong cu Chin ramkulh Cozah phu nih Khuapi sersiamnak Committee ruahnak chuahpimi zoh chunh in biachahnak an tuah cang tiah kan theih.

Chin Ramkulh Cozah phu (Cabinet) Meeting 24/17 biachahnak no. (6) ning in Chin ramkulh Cozah phu nih tubantuk biachahnak an tuah hi asi.

Cu biachahnak ah cun, 

 

(1) Ekah 100 chungah a ummi 32 hi sipin upadi ning in tazacuai si hna sehlaw biaceihnak zung nih bia  achah ning in pehzulh si te seh. 

(2) Khuapi sersiamnak Committee nih zulhding a timi phungphai fel tein zul hna seh.

(3) Kan pupa ram a si tiin vawlei hmun a zuarmi minung 4 hi cu hmunthar kan samh tik zongah rulhmi (compensation) vawlei hmun pek si hna hlah seh.

(4) Dumhau caah a tuan liomi inn 10 hna cu an cinthlak mi vawlei hmun tibantuk kha tuanvo ngei nih zoh le cekhlatnak tuah si rih sehlaw a herhning in an kong ceih than si te seh.

(5) Phungsan-1 aa tlaihmi inn 19 hi cu an duh i an sok than a si ahcun ruah piak an tlak le tlak lo zohthan le ceihpiak si hna sehlaw pek an tlak ti a si ahcun sangthar samhnak ahhin papek in inn hmun pek si hna seh. 

(6) Pungsan-7 aa tlaihmi pakhat hi cu lam kan cawhnak nih a inn hmun a hnorsuan ding sile ruahpiak than sisehlaw a hnor suan lo ahcun a vawlei hmun cu  amah ta a si.

Hi vial hi Sangthar samh ding ekah 100 chung ummi le vawlei hmun ngei kongah Cozah nih biachahnak an tuahmi a si. Hi kong he pehtlai in Sipin Minister Salai Isaac Khen nih Hakha sersiamnak Committee meeting ah hitihin a chim.

“Inn 32 hi tazacuai an si lai kan ti tikah an inn hi theh hrimhrim a si lai tinak asi lo bantuk in tazacuai hnu ah cun theh an luat lai tinak zong asi hlei lo. Biaceih zung nih upadi he aa tlak ning tein bia a chah te ko lai. Hi hna hi khuate in a ra mi zong an si, kanmah Laimi te an si. Upadi ning tein anmah zong nih biaceihnak zungah khuhlehnak tuahnak kan onh hna lai.”

Cun sangthar samhnak chung ah inn hmun tahnak le lam cawhnak ding rian lei tuanvo latu committee zong an ser colh. 2017 October 3 ah tuahmi 16/17 Hakha Khuapi Sersiamnak Committee meeting biachahnak ning in Oo Eing I nih cu committee cu an hruai lai i uknak zung, Khuanu khuapa chairman, Dawrthar le Khuathar in khuanu khuapa pakhat ve ve le khuabawi pahnih, simanking, lam lei zung le vawlei tahnak zung in minung pakhat cio an itel lai. Cu hna nih cun hmaizarh Cawn Nikhat in rian an domh colh lai i zarhhnih chungah an tuanmi le hmuhchuah mi cu Ramkulh Cozah phu sinah ca an tial than lai tiah theih asi. +++

 

 

BLOG COMMENTS POWERED BY DISQUS