17
Sun, Dec

‘Kan Rumlo Nain Kan I Nuam Ko’ Catar Kongah Thantlang Peng NLD Zung Nih Cathanh An Chuah

Politics

Salai Elvis| 2017 September 19| August 12 ah Thantlang khualuhnak ah rak tar mi pengukzung, MP Dr. Hmuh Thang, TYA, Khrihfa bu le khuanu/pa hna thithruainak in ‘Kan Rum lo Nain Kan i Nuam Ko’ timi catar kongah Thantlang peng NLD zung nih September 12 ah cathanh an chuah tiah theih a si.

 

Cu cathanh an chuahmi cu hitihin asi.

“Hi ca robia tarmi hi ramchung/leng mitampi thinlung ah ruah a rem lo caah, Thantlang peng NLD zung nih kan ruahnak kha atanglei bantuk in cathanh kan chuah.

1. Minung kan nunning ah rum le nuamh hi aizul deuh i sifah retheih le nuamh lo hi ai zul deuh ve.

2. Lai mi cu mirum kan tlawm 

te i sifak rethei mi lawngte ngawt kan si/Rampumpi ram then (14) chungah a sifakbik ram then ah an kan chiah. A bik in Thantlang peng hi  a sifak bik kan si. A bik in fimcawnnak lei ah sianginn tha kan ngeih lo ruangah tangka tampi dihin hmun dangdang ah harsa ngai in an kai. A cheu an kai khawh lo caah nuamlo ngai in an um hna. Cun ngandamnak lei ah sii-inn tha kan ngeih lo ruangah har sat thih lohnak le nuamh lo nak tampi kan tong tawn.

3. Kan Lai ram a buaituk le kan sifah harsat ruangah kan fanau tampi hna cu fimnak hmanh tlamtling cawngmanh loin ramkip ah rianhrang tuanding in an kal phah.

4. Kan sifah le kan harsat tuk ruangah pei vawlei lei caah siseh, Biaknak lei ah siseh, ramkip um kan fanau sinah mithmai khap loin bawmhnak zong kan hal lengmang hi.

5. Atu ah micheukhat inn lo tha kan sa, mawtaw, Cycle le zeidang duh herh thilri tete kan vun ngei kho. Hi hna hi ramdang um kan fa le kutke ngawt asi. Rethei harsa ngaiin an hmuh mi hi nuamngai in kan i nunpi awk a si lo.

6. Nuamh timi hi pumsa le thinlung nuamh a um. A tu ah ei-din, um kal, thutdirnak inn le lo kong, zawtfah dam lonak kongah ramdang sining kan phan naisai rih lo. Hi bantuk tlamtlin lo nak ruangah pumas le thinlung in nuamh  lonak tampi kan tong.

7. Uknak ai thleng kan ti ko nain Democracy tlamtling zong kan phan kho rih lo, kan thinlung zong kan i thleng kho hlei rih lo i, remdaihnak tlamtling zong a um kho rih lo. Cucaah hnangamnak, lawmhnak, nuamhnak tlamtling kan ngei kho rih lo.

8. Kan si a fah i kan tlam a tlin rih lo caah cozah lei in siseh, NGO lei in siseh, midang sinin siseh bawmhchanh hau peng kan si rih. Kan i nuam ko hih kan ti ahcun bawmhhau ti lo zongah ruah kan fawite.

9. Kan Lai phungthluk ah ‘mahfak le dimzu’ ti a si. Mah le mah i fak hi thildawh a si lo. Cucaah mah le mah kan i fak nak cun minih kan fak hna seh law a tha deuh tiah kan ruah.

10. Signboard catar timi cu: mipi nun a kan chim kho tu, thanchonak, lawmhnak , nuamhnak a kan pe kho tu a si awk a si. Sihmahsehlaw ‘Kan rum lo nain kan i nuam ko’ kan timi nih, hi hna hi a chuahter khawh lo pinah thluachuah zong a kan kham tu a si sual lai ti kan phang.

11. Cu caah hi catar hi kan nih Thantlang NLD nih cun tha pek lo le hmailei ah tharchuah ti lo dingin kan duhnak a  si.” tiah Thantlang peng NLD zung nih cathanh an chuah mi a si.”

 Biakilh:  Hi cathanh an chuahmi hi TCP nih a cazong kan chap in kan let mi a um lo.+++

 

BLOG COMMENTS POWERED BY DISQUS