27
Fri, Apr

Way Luh Kyaw Foundation Nih Nivea Ram An Cinmi Hi Dumngeitu Rev. Biak Kung Nawklekmi Asi: Pu Chan Fiang 

Politics

Salai Ngun San Aung| 2017 Sep 14| Chin Ramkulh Khualipi Hakha ah Motor Dinhnak Gate hmunhma tha kan ngeih lo caah tu tiang Vomtumaung Certual kiangkap ah remrel lo ngai in kan thutdir lioah Chin Ramkulh Sipin Minister tuanvo peknak in Khua Nu/Pa nih Ruavazung Rev. Biak Kung dum cu an zoh hnu ah Sii-khanh le Sipin Committee zong nih Cozah sinah ca tial asi cang. Nain Satil rawl ram phunkhat Nivea timi ram cinnak caah Way Luh Kyaw Foundation nih vawlei an cawh i ram ci zong hneksaknak caah tlawmpal an cin cang.

 

Hakha penguk Pu Chan Fiang nih, “hi dum hi Rev. Biak Kung dum asinain a tak ahcun vawlei ngeihnak catlap ah pungsan 1 lawng a si. Dumhau tuahnak ca license sawh asi. Cozah nih mizapi caah aherh ati ahcun zeitik paoh ah a lak khawhmi asi. Asinain amah Rev. Biak Kung kan ton i hi ka chungah hmunhma kan in pek ve lai i khuapi thanchonak asi ko caah ekah 6 na kan pek lai tiah kan ti. Kaphnih lungtlinnak tein chawnhbiak le riantuan kan timh lio ah cunglei upa lutlai he hawikom, theihhngalh kan si ti phun in Way Luh Kyaw foundation he ram an cinmi hi a kan nawklek bia asi. Ram tham cu khuazei paoh ah cin khawh asi ko cu ta. Car Gate caah khi tluk hmunhma tha Hakha nih kan ngei ti lo. Kannih nih a tha bik lam kan kawl lio ah tubantuk in an kan nawnnok ahcun a herh ning paoh in rian kan tuan ko lai” tiah TCP ah achim.

Khua Nu Khua Pa chungin Pu Ral Kham nih, “ram an cin ti kan theih le cangka Rev. Biak Kung cu ka chawnh colh. Zeihmanh ka hngallo tiah aka leh” tiah TCP ah achim.

Thantlang nih Car Gate tha tein an ngeih cang lio ah Khualipi asimi Hakha ah Car Gate a um rih lomi cu ruah awk a um ngai ngai. Tulio Hakha ca Car Gate tuahnak dingah hmunhnih an zoh. Sipin zung lei nih Gangaw lam ah an zoh i ekah 9.15 a kau tiin Cozah sinah ca an tial, a tuannak ca zongah Ks. Sing 400 a um cang tiah Sipin Lutlai Pu Thla Hre nih TCP ah a chim. Khua nu khua pa le motor ngei pawl(gate tlaitu) nih cun Ruavazung hi hmunhma tha deuh asi an ti ve.

Hi kongah gate lei tuanvo ngei upa pakhat nih, “Rungtlang lei tham cu vawlei umtuning zohnak lei thiamsang nih pei hmunhma fek asilo thingkung tam piin cing uh an kan ti cu. Cubantuk hmunhma ah Car Gate tuah cu a sullam um lo. Ruavazung cu kanmah nih kan duh deuh” tiah TCP ah a chim.

Gate lei tuanvo ngei upa dang pakhat nih, “sing 400 cun zei car gate dah an sak lai? Kankaw lam caah khin cun a hmun remhnak hmanh ah sing 400 cu a dih lai. Cun hmailei ca pi tiang kan zoh asi ahcun, tu Ruavazung tham cu Falam lam he hlatnak ding lam cawh a fawite, a nai te. Cun India le Chawlehnak lampi a orh lai. Cu hnu ah Paletwa-Matupi-Hakha lam hi Surkhua lei nak in a hnu ahcun Hnaring in Thantlang in Hakha ah tiin an lutchuak deuh te lai. Cu vialte cu pei kan zoh a herh cu. Kankaw lam tham cu Kankaw lam in a lutmi motor ca lawng pei a si lai cu” tiah TCP ah achim. 

Car Gate cu hmunhnih zongah kan ngeih ah a tha ko. Tangka a um cia mi Kankaw lam hi kan tuan ko lai i Ruavazung zong cu kan tuan ve te  ko lai tiah Pu Thla Hre nih TCP ah a rak chim bal. Hi kongah Gate lei tuanvo ngeitu nih hitihin an chim.

“Hakha ah Gate pahnih ngeih cu zei ah dah kan ituahnak lai. Innkhan zong kan caw kho lai lo. Gate hngaktu minung (vuanthan) zong kan chia kho lai lo. Cucaah hmailei ca pi tiang a tha deuh dingmi hmun pakhat kha kan tuah awk a si ko.”

Hakha khuanu khuapa le motor ngei pawl nih, Ruavazung i Way Luh Kyaw Foundation nih ram an cinmi cu ngolter ding in le Car Gate caah Cozah nih tuanvo lak le sak colh dingin chimrel dingah timhtuahnak an ngeih liopi asi tiah kan theih.+++

 

BLOG COMMENTS POWERED BY DISQUS