27
Fri, Apr

Zaangtlang Khuami Nih An Khuabawi An Report 

Zaatlang Khuabawi Pu Za Biak

Politics

Salai Elvis| 2017 September 12| Thantlang peng Zaangtlang khua minung 30 renglo nih an khuabawi Pu Za Biak cu September 11 ah Thantlang penguk zungah report an tuah tiah thawng kan theih.

Atubantuk in report an tuahnak cu cozah le NGO nih khua caah bawmhnak an kan pekmi cu amah nawl in ningcang loin a tuah dih caah le khuami an kan lor hnawh tuk caah khuami minung 30 renglo nih Thantlang ah ra in report kan tuah cu a si tiah Pu Ram Thleng nih a chim.

 

Hi kong he pehtlai in Zaangtlang khuami Pu Ram Thleng nih “A riantuan ning a that lo tuk le khua caah bawmhnak a lutmi vialte a duh paoh in a tuah dih. Cu pin ah khuami a kan hruaining hi zauk phung he aa kalh cang. Hro le cerrum ro in a kan tuah. 

Khuabawi kumkhat le cheu tluk a tuannak chungah khuami nih report kan tuahnak cu; Na-ta-la nih solar mei lung 15 an kan bawmhmi lung 5 lawng khua a phakpi, lung 10 a zuar i amah nih pakhat ai lak, ti-inn saknak caah Hluttaw budget in sing 25 an kan bawmh mi zong sing 16 le thong 30 lawng an kan bawmh tiin khuapi meeting ah a ka in a kan chimh. Ti inn sa loin ti-inn thing kha sii lawng a thuh, Comapany pakhat nih sianginn thutden le cabuai sernak caah sing 5 an kan bawmh mi zong a hlohthlau dih. Cun khuami nih kum chiar te ta-mah zungah tangka kan cawi tawn mi zong tukum cu mizei hmanh kan cawi kho lo, cazin a lak i khuami minung 20 leng min hmang in tangka cu sing 120 a cawi i mi a hlanh hna, a karh zong amah nih aa lak. Khua upa te theih pinak um loin amah nawl in dum a samh, dawng 11 nih dum cu an tuah i dawngkhat 50,000 a hal hna” tiah TCP ah a chim.

Hi kong he pehtlai in an khuabawi Pu Za Biak nih rian ka tuannak chungah palhnak zeihmanh ka ngeih kaa thei lo, iphuhrunnak zong zeihmanh kan ngeih lo pin-ah sualnak zong zeihmanh kan tuah lo tiah a chim. 

“An ka report cang caah thil sining kha zungah ka chim lai i ka sual le suallo kha fiangtein a lang ko lai. Rian ka tuannak chungah palhnak ka ngeihmi zeihmanh ka hngal lo. Cucaah phuhrunnak ngeilo tein zung zong ka phan ve. Tangka bawmhnak le cozah he pehtlaihnak kong zongah keimah nawl in ka tuahmi a um hrim lo. Committee hnatlaknak te he a fawinak in report a ka tuahtu hna he tuah le tuan a si ko. Keimah nawl in thil ka tuahmi zeihmah a um lo caah thinphan thlalau nak ngeilo tein le sualnak ka ngeih lo caah zung zong ka chuah ngamnak hi a si” tiah khuabawi Pu Za Biak nih TCP ah a chim.

“Lo lurelnak meeting tuah ah khuami mizei hmanh kan chuah duh lo caah Lungler palek a kawh hna i hriam he nam he an kan kawh caah meeting cu kan chuak than, Zahnaktlang Youth Associasion (ZYA) mino bu zong nan um na herh lo nanmah lo in rian ka tuan khawh dih a ti hna caah ZYA mino bu cu an chuah tak i khua chiatni/thatni kan ton caan ah mino bu an um tilo caah harnak kan tong” tiah Pu Ram Thleng nih TCP ah a chim.

Zaangtlang khuabawi Pu Za Biak cu Thantlang penguk zung nih a khuabawi sinak in an phuah i khuabawi thar an i thim than lai tiah theih a si. Pu Za Biak cu fanu pahnih le fapa pathum a ngei i an chungkhar in Zaangtlang ah khua a sami an si tiah kan theih.+++

 

BLOG COMMENTS POWERED BY DISQUS