17
Sun, Dec

‘Kan Rum Lo Nain Kan I Nuam Ko’ Timi Catar Thlenremh Kan Tim Lo; Dr. Hmuh Thang

Politics

Salai Elvis| 2017 August 22| Thantlang khuachung ah ‘kan rum lo nain kan i nuam ko’ timi catar ruang ah ramchung ramleng a bik in mino pawl nih duh lonak kong ah tampi a chimmi cu MP Dr. Hmuh Thang nih ‘kan rum lo nain kan i nuam cang’ kan ti bak lo ‘kan rum lo nain kan i nuam ko’ hi catar cu thlenremh kan ti lo tiah a chim.

 

“Kan ram hi sifak hmanh u si law aa nuammi ram ah kan ser awk a si ti hi kan dirpi caah Chin ramkulh cozah le Hluttaw he tonak ah ka chim tawnmi a si. Mi cheu nih cun kan ram ah thilchuak kan ngei an timi zong hi a taktak ah cun kan ngei lo. Rinhchan deuhmi ah motor lam lawng kan ngei. Hi catar kong ah ramleng chuakmi nih kan ti ko hna seh kan let hlei hna lai lo. Micheu nih kan sifah caah ramleng ah hme kan chuah cu ti tehna a tialmi ka hmuh, ti ko hna seh. Mi cheu nih cun ka thlingza ti tehna an chim.  Ramleng um Laimi nih Lairam caah thiltha lei in, cutin khatin kan tuah ah kan ram a tha lai timi ruahnak a chuahpimi an um rih lo. Hi catar cu thlenremh kan i tim lo, a herh ah cun tha deuh le zoh dawh deuh in kan tuah te lai” tiah MP Dr. Hmuh Thang nih a chim. 

Kan si fah hlei i aa nuam lo mi ram si cu a har ngai mi a si. Cucaah kan ram hi aa nuam mi ram ser nak ding ah zeitin kan tuah ah a that lai, timi ruat lo in. ‘Kan rum lo nain kan sifak kan ti bak lo. Hi catar hi inn chungkar in kan thok awk a si. Inn chungkhar in sang le zawl in khuaram tiang kan i nuam lai. Cu bantuk in peng khat le peng khat zong kan i daw hna lai ti kan duhmi a si.  

Mah ca hi kan i tar hna lai i duhsah tein kan kal pi lai ti saduh thah a si. Hi kongah i tlawnkai nak ah lam le sul zong a that hnau. Minung thinlung nuamhnak hi thingkung le ramkung zong aa tel mi an si. Cun tiva kuang te hna ah zuu palang le plastic a tam tuk khi tiang zong nuamh duh ah cun thianhhlimh dih a hau zei paoh aa pehtlai dihmi a si” tiah Dr. Hmuh Thang nih a chim.

Thantlang khua kum 50 tlin lio ah MP Dr. Hmuh Thang nih kan miphun hi aa nuam i a sangmi ram siding kan i zuam a herh tiah a rak chimnak thawng le Hluttaw zi-za committee ah a chimnak thawng in avoi khatnak Thantlang ah a tubantuk in catarnak an tuah hi a si. +++

 

BLOG COMMENTS POWERED BY DISQUS