27
Fri, Apr

2017 Ah Chin Miphun Chung In Thawngpang A Ser Bik Tu Hna (News Maker of the Year-2017)

The Chinland Post| 2018 January 9| The Chinland Post nih Chinmi chung in thawngpang a ser khotu bik le tuanbia thar a tialmi pawl thimnak kan tuah lengmang. Tukum 2017 ca zong kan hun thim than hna. A hmasa bik ah Kawlrawm Vice President Henry Van Thio nih UN ah tuanbia thar a tialnak kong kan hun langhter. Midang kan thimmi hna zong an um caah pakhat hnu pakhat in hun rel khawh an si cio te lai.

 

Vice President Pu Henry Van Thio cu Thantlang peng Amyotha Hluttaw in 2015 thimnak ah MP a tlingmi a si. NLD nih President caah Amyotha Hluttaw ah 2016 March ah an chuahpi i U Htin Kyaw le U Myint Shwe nih thimfung tamdeuh in an tei caah Vice President (2) a ngah. Chin ramkulh tuanbia ah a pakhatnak Kawlram pumpi in riansang bik a tuan hmasami hruaitu ah a hun i chuah.

 

Vice President (2) lawng a si ko nain cozah aiawh in hruaitu rian an pekmi hi Kawlram ramkhel le thanchonak caah biapi taktak mi lawngte an si. August thla 17 tiang ah Kawlram huap in cozah riantuannak committee chung ah Committee 12 cu amah nih haotu (Chairman) sinak in a hruai hna. Cu a tlaihmi biapi chung ah Myanmar Special Economic Zone Central Committee (ျမန္မာအထူးစီးပြားေရး ဇုန္ဆုိင္ရာဗဟုိအဖြဲ႕), National Eco-tourism and Development Central Committee (အမ်ိဳးသား ခရီးသြား လုပ္ငန္း ဖြံ႕ၿဖိဳး တိုးတက္ေရး ဗဟိုေကာ္မတီ) ,Vawlei hmunhma le hmuhma chuh a tongmi zohthannak Committee (လယ္ယာေျမႏွင့့္ အျခားေျမမ်ားသိမ္းဆည္းျခင္းခံရမႈမ်ား ျပန္လည္စိစစ္ေရး ဗဟိုေကာ္မတီ ) hna ah haotu a tuan. Vawlei hmunhma chuhnak kong le lothlo pawl har tongnak cu ahlan ralkap nih an sawksammi le rak chuhmi a tam caah Pu Henry Van Thio le ralkap kar ah tampi i hmuhthiam lonak a chuak lai tiah an ruah. Asinain amah hruainak in ralkap nih hmunhma a chuhmi hna ekah a sing renglo in khirh thanak zong a tawrelpi khawh hna caah tampi an thangthat. Kawlram President pathum lak ah a min lang bikmi le riantuan a thiam ngaimi a si ti zong in an thangthat. A riantuannak ruang ah upat conglawmhnak caah tiin US hrambunh a simi Global Gateway University zong nih minthatnak Doctor January 2017 ah laksawng an pek.

 
 

Rakhine ramkulh buainak ruang ah Kawlram cu vawleicung ram tampi nih sual an phawt. Ram tampi nih Kawlram ah thilcan kong hngalh an duh i Kawlram cozah a riantuanning kong theih a I ngaih lio a si. September 2017 ah kumtin tuah tawnmi UN General Assembly tonpumhnak cu tuah a si. Hi UN Meeting ah vawleicung ram in hruaitu bik Pawl nih an ram kong le hmailei an i timhmi kong biachimnak an ngei cio. Kawlram zong in State Councilor Daw Aung San Suu Kyi cu biachim ding a si nain amah ai-awh in Vice President Pu Henry Van Thio cu zumh ngamhnak he a thlah. American President J. Donald Trump telh in vawleicung ramhruaitu nih biachim an ngeihnak ah Vice President Henry Van Thio cu Kawlram aiawh in bia a chim kho ve. UN General Meeting i hruaitu biachimnak ah Chin miphun nih ram pakhat ai-awh in biachimnak va ngeih hi a um bal lo. Vice President Henry Van Thio nih Kawlram aiawh in bia a chim khawhnak nih Chinmi caah tuanbia a kan tialpiak. Vice President a sinak si lo in 2017 chung ah a riantuannak, a cawlcanghnak pawl hi vawleicung Media nih Kawlram Media zong nih tampi an tial. Zapi nih Pu Henry Van Thio a cawlcannghnak le riantuannak hi cuan le hngalh duh ciomi a si. 2017 kum a cawlcanghnak le a langhnak zoh in News Makers of the Year thimding aa tlak tiah kan ruah caah atu bantuk in The Chinland Post nih kan thimnak hi a si.

Biakilh: The Chinland Post nih kumtin a thimmi news maker of the year cu tukum 2017 ca zong kan hun thim. Vice President Henry Van Thio lawng si lo in midang zong kan thim hna. Pakhat hnu pakhat in kan rak in thanh chap te hna lai.

BLOG COMMENTS POWERED BY DISQUS