18
Sun, Feb

Hakha Sang Thar Samhmi Ekah 100 Chungah Inn Hmun Sok Khawh A Si Cang 

Salai Ngun San Aung| 2017 Dec 12| Hakha ah ekah 100 kau in sangthar an samhmi chung ah 2017 December 12 in 2018 January 12 tiang inn hmun sok cio khawh a si cang.

 

Hi kong ah Hakha City Master Planning Committee haotu a si mi Sipin Minister Salai Isaac Khen nih, “December 12 in January 12 tiang Hakha sangthar samhmi chung ah inn hmun sok cio khawh a si cang. Inn hmun pek dingah phunthum in kan then: (1) Cozah zung, (2) Biaknak le Zatlang bu zung (3) Mizapi tiin an si. Inn hmun pek ding ah tahfung panga kan ngeih. (1) Hakha ah kum caan sau pi khua a sa cang nain inn hmun a ngei rih lomi nuhmei ngaktah, (2) Pensen a la cangmi ralkap tel in cozah rian tuan pensen mi harsa deuh pawl, (3) Hakha khuachung Khrihfabu ah caantling pastor a tuan i inn hmun ngei lo mi, (4) Hmun dang um cang mi  khua ram an hruai i inn hmun a ngei lomi le (5) Hi chung ah aa tel lo nain khuanu khuapa le sang khuabawi, committee pawl nih pek awk a tlak bak, pek si ko seh tiah an timi an si lai. 

Hakha sangthar samhnak kong ceihmainak le fianternak an tuah lio/Photo: TCP

 

Hi hi zei hoih deuh papek ding ti siloin hi phun nga chung ah aa tel mi nih sok khawh a si ti nak tu a si. Cun sok tikah, Pastor a si ahcun a tuannak Khrihfabu le HCMF tibantuk nih hngalhpinak ca tial mi a herh lai. Cun pensen pawl cu an pensen cauk le an rian tuannak he aa pehtlai mi zung hngalhpi nak siseh, a dang pawl caah Sang khuabawi le khuanu khuapa tibantuk hngalhpi nak a herh lai” tiah a chim.

Sok tikah tu hlan bantuk in uknak zung (Htwe Oh) ah sok siloin Hakha City Master planning Committee haotu Sipin Minister Salai Isaac Khen sinah sok a si lai. Zung caah a sok mi pawl cu pek an tlak le tlak lo Cozah nih a chekhlat lai i pumpak a sok mi pawl cu khuanu khuapa, a dang dang zohfeltu committee le sangkip khuabawi nih pek an tlak taktak le tlak taktak lo zohfel a si lai tiah kan theih.

“Tuanvo pek mi upa nih tlamtling tein an zohfel hnu ah ramkulh cozah sinah pek a tlak tiin kan hmuhmi vialte kha an soknak catlap kan pekpiak hna lai. Cun cozah phu nih an zoh ve lai i a tlak ko an ti si le an fehter lai. Tu thok in inn hmun tahnak le riruat ser kan thok lai. Cun number kan pek dih lai. Cun pek a tlak timi vialte kha zapi hmai ah inn hmun cu meek an zuhter hna lai. Inn hmun chiat that ning hoih in tuanvo ngei nih a man cu an khiah te lai. Tu lio Hakha inn hmun man nak cun a awl deuh hrim hrim lai. Miharsa nih cawk khawh dingmi in kan tawlrel ko lai” tiah Sipin Minister Isaac Khen nih cun a biapeh ah a chim.

Tutan ekah 100 chung inn hmun phawtzamhnak a dih in hin thipnak zong hmun dang ah zoh than le sangthar samh than ding timhtuahnak an ngei tiah kan theih.+++

 

BLOG COMMENTS POWERED BY DISQUS