18
Sun, Feb

Hakha Khua Sipin Area 43.9 Sq Miles Kauhchap Ding Lamzawh In Duhlonak An Langhter Lai

Hakha View Point

Salai Ngun San Aung| 2017 Dec 7| Chin Ramkulh Khuahlipi Hakha Sipin Area 43.9 sq miles in kauhchap ding ti mi cu lothlo, ramngei le satil zua tibantuk pawl vawlei hmun aa tel dih caah Hakha khua mi nih December 11 ah lam zawh in an duhlonak langhter ding an i tim tiah kan theih.


Hi lamzawhnak ah an i put ding catar le an au ding biatlang 11 a si:  (1) Khua kauhchapnak rian ngol ding, (2) Rule of law (Upadi nawlngeihnak), (3) Lothlo mi covo runvennak le nunning santernak, (4) Lothlo pawl vawlei ngeihnak humhim ding, (5) Lothlo pawl vawlei phungning lo in chuh buainak a rang bik in remh ding, (6) Pupa ram a um lo a ti mi paoh kan ral, (7) Rikhiah cang mi Sipin Area ekah 5000 chungah chan he aa tlak ii a thianghlim mi khua sersiam ding le (8) Vawlei chuh mi remhchunnak 2017 Ramkomh upadi runvennak, (9) Tlanglo vawlei upadi ser khawhnak,(10) Chin Ramkulh chung ziknawh eihmuarnak a tuahmi Cozah zung riantuan paoh doh ding, le (11) Kawlram chung ziknawh eihmuar a hmang zung riantuan dihlak doh ding.

Hi lamzawhnak ah haotu cu Pu Khen Dum a si lai i cozah zung lei ah thawngthanhnak le tlangtlatu ah Pu Run Peng a si tiah kan theih. Pu Run Peng nih lam an zawh hnawhchan he pehtlai in an i tinh mi le lam an zawh hnawhchan pawl cu TCP ah a tanglei bantuk in a chim.

“Yangon khi minung nuai 6 leng an um. Sipin area 38 st miles lawng a si. Hakha hi 70,000 hmanh kan tling lo. 7. 94 stm ah kan i tlum tuk rih. Mah chung ah hin a tlawm bik inn 2000 hrawng sak khawh a si rih. Mah chung tu ah hin a thianghlim i chan he aa tlakmi khua ser hna seh ti kan duh. Mizapi Cozah timi NLD chan ahhin ningcang lo in mi zeihmanh an vawlei kha a man liamh loin chuh lo ding ti mi a um. Cozah nih a herh ahcun lothlo pa kha tha tein a chimhchawnh hnu ah a liamh lai i a vawlei cu mizapi ca ah a hman lai.  Atu cu vawlei ngei lothlo pa kha chimhchawnh lo in an duhning paoh in vawlei an tah, an duh mi paoh an pek hna. Cun a tu Sipin Area 43.9 stm chung ah hin, Hakha minung, kan lei, kan tlanglo, kan dum, kan thinghlamnak hmunhma, kan satil zuatnak vawlei a zapi te in a lut dih. Kha vawlei kha Hakha minung lothlo nih kan pawcawmnak ca ah kan hman mi an si. Mah vawlei Sipin nih an kan chuh ahcun pawcawmnak kan ngei ti lo. Hihi Lothlo pawl cu thi uh ti he zong aa lo cun Hakha khua in thawl he zong aa lo. Liamh lo in pungning lo vawlei chuh kha zeitinhmanh in kan duh lo. Hmailei, hi hnu kum tampi ah Hakha minung sing tam pi kan si te le a herh ning zohchun in ttuanvo ngeimi nih sipin area cu an kauh te ko lai. 43.9 St miles chung ahhin minung sing 30 tluk khua hei sa usilaw zei ti dah kan din lai i zei rawl dah kan ei lai.

Mah tiang kha ruah a herh. Khua lawng kauhchap i a um ding minung pawcawmnak le a herh mi ca ruah lo cu sullam ngei lo khuakhan a si.
Hakha ah mi nih kan pem hna hlah seh kan ti duhnak a si hrimhrim lo. Phung ning loin vawlei chuh an kan timh i kan pawcawmnak a dih ding a si tik ah cucu kan duh lo mi asi. Atu i vawlei an kauhchap mi hi mirum pa deuh caah a si tiah kan hmuh. Zeicaah tiah Hluttaw Chairman Pu Zo Bawi hrimhrim nih, “Mirum pawl sing 30 in kan zuarh hna lai” tiah a  chim. Cozah nih lothlo vawlei chuh i mirum zuarh timi hi Kawlram upadi ah kan thei rih lo.

Lam kan zawh lawng silo in Cozah nih tu i kan langhter mi kan duhnak an kan zulh lo sual zong ah kan vawlei himnak ding runven cu kan nun chung kan rian a si ko. Kan duhnak kan langhter mi, 7. 94 st miles chung hi chan he aa tlak i a thianghlimmi khua ah kan ser piak hna sehlaw kan khah te asi le a thar in kauhchap si te ko seh ti hi kan saduhthah a si.

Khualai fang i cozah cinthlaknak dum le kohti (Golf) tuknak hmun khi mizapi ca ah hmun an hun i inn an sak ahcun inn aa peh lai i khua zong aa dawh lai. Cucu Hakha mizapi nih an chimceih cio mi asi. Hakha Post i ‘Hakha Khua Kauh ding mi kongah Hakha khuami nih lamzawh in duhlonak an langhter lai’ timi kha khua kauh duh lo silo in phungning lo in vawlei hmun chuh in sipin area kauhchap kan duh lonak kan langhter ding mi tu a si.”

Hi lamzawhnak cu 2017 December 11, zing sml. 10:00 in Khuathar Pu Tin Cung inn hmai ah i ton a si lai i sml. 11:00 in lamzawhnak an thawk lai tiah kan theih. An i ruahning ah minung 300 kan si lai an ti. Lamzawhnak ca nawlhalnak hi, Upadi thar ah lamzawh hlan suimilam 48 chung ah thawngthanh ding ti lawng a si cang. Nawl hal ding timi a um ti lo. Cozah lei sinah thawng cu an thanh cang caah lam zawh ding in timhcia an si cang tiah kan theih.

BLOG COMMENTS POWERED BY DISQUS