27
Fri, Apr

Thantlang Khuachung Zankhat Bak Ah Mifir Nih Dawrkaan Pali An Bauh

Salai Elvis| 2017 December 9| December 8 zinglei suimilam 2 in 4 hrawng ah mifir nih Thantlang khuachung dawrkhaan pali an bauhpiak hna tiah kan theih.


Hi zankhat chungah dawrkhaan pali an bauh i zunghmun sang ah thil puan dawr, market sang ah suimilam dawr, Biakinn sangah sii dawr le eidin dawr an si. Hi chungah thil puan dawr an firpiak mi hna a tam bik tiah theih a si.

Thil puan dawr ngeitu nih, “Kannih dawr a tlaumi hi angki leng 20,000 man zun ruk, shirt angki 15,000 man a tha mi pawl zun ruk, pa hni a tha mi pawl 8000 man zun ruk, a man tlawm deuh mi 5,000 man zun ruk thiamthiam a si. Angki lum 30,000 man in 40,000 kar zun kua, pa bawngbi zun ruk hrawng- 15,000-18,000 man, kedan le hmai thuh pawl zong an laak rih. Kan dawr an bauh ning hi innka tawh hrenhnak thir kual in a si. Inn pa hna nih an thawngpang kan theih ko nain kan au ngam lo an ti. Zinglei ah palek kan chimh ko hna nain a firtu tak theih khawh lo ah cun zungah nangmah na rat peng a hau a kan ti caah ahmuh ka ong ngam lo” tiah Sui Pi nu nih TCP ah a chim.

Sii dawr ngeitu nih “ka dawr tawh bak in an bauh i hnawmpung ah an rak hlawnh tak. A chung sii Moramin dur ruk (dur khat-17,000 man) le Penamin-G dur ruk- 13000 man , a pa hnih in thlaih mi sii an si. Ka pawng dawr eidin dawr zong an bauh ve i anih cu kuak lawng a tlau a ka ti” tiah Sung Cuai nih TCP ah a chim.

Suimilam dawr ngeitu nu nih “ kannih dawr zong a tawh bo in an bauh ve i suimilam hi 20 in 26 hrawng a tlau, a man hi 6000-7000 pawl an si. Kan dawrkhaan hi a tu in a voi thumnak an bauh a si cang” tiah Sayama Sui Taang nih TCP aha chim.

Hi kong he pehtlai in Thantlang palek bawi nih “dawrkhaan an bauh hi a tlawm ti lo ti cu ho paoh nih nan theih dih, ni nga zan fatin te a si peng fawn. Zan chiar in suimilam 12 hlan le 12 hnu in 4 tiang minung kan i thleng peng ko. Cun an i chok peng ve ko. A ruang cu mifir hi an  zer tuk ve caah, kanmah zong palek thuam aa hrukmi an um i aa hruk lo mi zong kan um. Cu zongah cun kan hmu kho hna lo. A ruang cu hi thil kongah hin palek tha zaang kan tlawm. Cun mifir tlaih khawhnak lam zong kan i zuam tuk ve ko bu ah kan hmu in kan tlai kho ve lo i mizapi nih mawh an kan phurhmi hi an mawh lo. Nain hi kongah palek thazaang lawng si lo in mizapi nih an kan bawmh ngai a hau. Kan theih tawk in mifir tlaih khawhnak kan i zuam ve ko” tiah Thantlang sakhan bawi nih TCP ah a chim.

Thantlang khuachung ah a tubantuk in mifir nih thil an fir hi a tlawm ti lo Cycle le dawrkhaan bauh in thilfir a tam bik tiah theih a si.

BLOG COMMENTS POWERED BY DISQUS