18
Sun, Feb

Thil Man Kai Le Sacuai Zor Caan Laitlang Christmas

Hakha market hlun

 Tikhing| 2017 December 5| Ka ngakchiat lio te ah Chin Miphun Khrihfa kan sinak kum 100 tlinnak cu Hakha Baptist Church Biakinn pi ah khin rak tuah a si. Tu hi keimah hmanh kum 28 ka si cang caah Chinmi Khrihfa kan tlinnak hi kum 125 hmanh kan tling cang ko men. Kan tlin rih lo hmanh ah kum khat hnih leng aa duh ti lai lo.


Khrihfa nun zia cu Bible ca ah a um ko lengah Pastor le Evangelist zong nih kan hna tlum loin an ti awk cawn piak kan si. Pathian nih ningcang loin hmuhmi chaw cu a fih i cuai deu cu a huat ti zong Bible a um, kanmah tein kan va rel lo hmanh ah theih lengmang asi ko. Jesuh Khrih a chuah hi zeizong te a tling dihmi vancung kal tak in vawlei ah a chuah asi i cu hmanh ah a niam bik ti khawh asimi Caw inn chung i caw rawl einak kuangah a chuak. Cucu mi sifak hna kan sining aa hrawm khi asi. Nihin kan kiangkap ah thil lum hruk awk a ngei lomi, hmawca, kedan lum, kuthrolh lum, luchin lum, hngawngngerh le zan thawnh puam lum icawk kho loin a um mi an um maw? Docawi le thlaipat in thil lum, thil dawh aa zalhmi an um maw? Christmas lai zarh tha ah zarh sa aa zalh kho lomi an um maw?

Nihin Chinmi thil zuar pawl i ruat than tuah. Sathat pawl iruat than tuah uh. Thil man a kai, sacuai a zor! Cucu kan biakmi Pathian nih a kan duh piak mi lungput a si hnga maw? Sunglawi ngai in kan orhmi Khamhtu Jesuh lungput a si hnga maw?

Cozah rian a tuan i tuanvo ngeitu upa tah thimnak nan luh lai le mizapi thimfung nan hal lio i nan bia pawl kha nan philh maw? Sipin Committee zong zei nan tuah? Ziah mizapi aiawh tu, khuanu khuapa bantuk in kan nu can kan pa can ah a dir dingah kan in thim mi hna nih thimnak nan rak luh lai ah khan Sacuai tling lo cu tlaih bak ding ee cu ee kha ee nan rak ti lo maw kha? Cuai khat 7000 le 8000 in kiap 70 hmanh a tling lomi sa an zuar mi khi tah ziah nan itheihter lo. Sa maw an in hleh lengmang hna hngal hlah.

Kan hnu lei ah AG biakinn hmai ah khin dawr pakhat nih an thil zuar mi chungin zeimawzat cu 50% man thumh in thil an zuar. Zeitluk zohchun awk tlak dah a si? Christmas lai ah ngakchiat zei tuak kho lo nih an nu le pa, chungkhar khuasak ning hngal loin hawi an hngar ruang i an nu le pa an i hauh hna tikah docawi thlaipat in an cawkmi thil puan, an khuasih celh lo ah izalh thil pawl khi zeitin? Sullam ngei lo, a let in na thil man na kai tawn mi le, voidang ah letcian na ti i an zuar khawh timi lo, na thilpuan tiang man fak fak na hauh hna kha zeitin?

Khrihfa kan sinak nih zeihmanh kan nun a remh lo cu kan hrinthan lo, Pathian kan theih tak tak lo caah asi ko lai. Amah bel biaknak inn chungah aa hlok len i a kut phar in Halleluijah voi sawm rel cawk loin a aumi pawl zong chawkawlnak ah sifak mihar zawnruah nan hman lomi kha zeitindah a hei si hnga? Kan ka lawng in Pathian kan biak kan timi nih kan nun a remh lo cu zeiti awk tha hlah. Amah bel Pathian sermi Minung asi ve mi nih cun khua fak deuh in ruah le mi zawn ruahnak te zong ngeih in thil tuak tan deuh cu a herh hringhrin ko. December thla a chuah cun khuate um nu le pa tam deuh le ram leng um hlawhhlang pawl cu zan mitkuh cim lo in lungretheih le dinh mui hmu loin rian kan tuannak ah Christmas hi kan tih cang.+++

BLOG COMMENTS POWERED BY DISQUS