17
Sun, Dec

A Langfiangmi, A Thianghlimmi le Mizapi Teltum In Riantuannak Chin Ramkulh Cozah Siding Kan Izuam Cuahmah Lio Asi: Minister Isaac Khen

Salai Ngun San Aung| 2017 Dec 3| Chin Ramkulh Cozah phu chimrelnak nawlngei Sipin Minister Salai Isaac Khen nih Chin Ramkulh Cozah an riantuannak le an itimhmi kong siseh an tonmi harnak le mizapi he pehtlaihnak kong cu CCPR le TCP tuahmi Cozah le Mizapi pehtlaihnak thawnternak ding kong ceihruahnak ah a chim.


“Chin Ramkulh Cozah nih, a langfiangmi Cozah, Athianghlimmi Cozah le Mizapi teltum in rian a tuanmi Cozah si ding kan izuam cuahmah lio asi. Kawlram pumpi nih kum za dengmang kan hngah cangmi Democracy hruaining uknak kha caan sautuk a kal cangmi asi i tu zongah kan duhmi kawltung kan phan rih lo. Kan ram hi aa thleng liomi dirhmun le caan (transition period) ah kan um. Thlennak (transition) timi cu aa peh thliahmah in a cangmi thil (process) asi caah lungsau zong a hau. Hi zawn ah mizapi ah hram a bunhmi asi a herh i mizapi iteltumnak hi a biapi bik in a herh mi asi. Cun a changtu ah mizapi aiawhtu dingin thimmi hruaitu lutlai hna kan si i a pathumnak ah Media le Zatlangbu an si.

Cucaah khat le khat thil ti khawh lonak lawng ihmuh piak le soisel dohkalhnak nak in ruahnak icheuh, idirkamh le riantuantinak nih kan caah a tha deuhmi thil a chuah pi lai. Media le CSO hna nih thlenremhnak caan chungah a cangmi thil kongah faktuk in dohdalh soiselnak an tuah tikah thimmi hruaitu lutlai nak in khan thlenremhnak lamthluan tu kha a hnorsuan deuh i a tuar tu cu mizapi kha an si. A hlei in Media nih hin Cozah hi a doh in doh siloin a tlaih/khalh zia thiam a biapi. Kan ram thlenremhnak lamthluan a pialtertu a hnorsuangtu maw kan si a thawntertu dah ti zong i chekfel a herh ngai ngai.

Kan ram chungah daihnak a um khawhnak dingah Hluttaw lei nih upadi sernak in siseh, hriamtlai phu pawl he daihnak kong ceihkhannak in rian an tuan cuahmah. Kan ram thlenremhnak kongah a biapi bik mi cu Panglong hnatlak 1947 le 1988 siangngakchia buainak asi. Cucaah kumzabu 21 Panglong Conference pi zong tuah lengmang asi. Cubantukin daihnak ser lio caan ah kal tak awk a tha ve lomi cu, minung nih nifathin kan nunnak ah a herhmi eidin tirawl, fenh-aih hnipuan le a dang dang thanchonak hi an si. Cucu Cozah lei nih kan tuan cuahmah ve. Kan ram ah lam kan chunh, Sianghlei ruun kan hal, Vanlawng tumnak kan tuahmi hi hlawknak a chuahpitu thanchonak an sile silo a biapi lo. Kan vawlei thap in kan pupa nih Kawl he biakam an hren i rampi an ser ve mi asi caah kan miphun  hawi dang nih an tin comi thil hi bantuk thanchonak pawl hi kan tinvo ve ding cu ramkhel covo asi” tiah a chim.+++

BLOG COMMENTS POWERED BY DISQUS