17
Sun, Dec

Cozah Lutlai He Ikomh Ruangah A Rummi Pawl Upat le Zohcho Khi Fih A Nungmi Lungput Asi: Salai Van Bawi Lian

dialogue ah Van Bawi Lian bia a chim lio

Salai NguN San Aung| 2017 Dec 3| KMSS ah rian a tuan liomi Salai Van Bawi Lian nih, Cozah le mizapi pehtlaihnak thawnternak ding kong ceihruahnak ah Cozah lutlai he ikomh ruangah a rummi hna upat le zohcho lungput mizapi nih kan ngeihmi hi fih a nung mi lungput asinak kong a chim.


Salai Van Bawi Liancu, hi ceihruahnak ahhin Cozah an riantuannak ah tuanvo laknak le langhfiannak an ngei tak tak maw timi tlangtaar tangin biachimtu asi. Tutan ah a bik in a chimmi cu, “Chin mizapi hrim hrim nih Cozah lutlai upa he ikomh ruangin a rummi pawl kan upat le zohcho mi hna hrim hi a niamtuk i fih a tlaimi lungput asi. Zeiruangah tiah, Cozah nih tangka pia khat hmanh an ngei lo. Cozah nih cuzat an kan bawmh kha zat an kan bawmh timi zong kan chim awk asilo. A tak ahcun Cozah nih an tlaihmi tangka vialte khi mizapi kan tangka asi ti kan hngalh a herh” tiah a chim.

Cun kan minister le Hluttaw palai pawl mizapi he pehtlaihnak an tuahning kongah le an riantuannak kongah hitihin a chim.
“2015 thimnak ah thimnak zohfeltu (Election Monitoring) in
Laitlang pumpi ka vak. Kha lio  ah ah ka hmuhmi cu mizapi nih a hleihluat tuk in NLD cungah ruahchannak le zumhnak an ngeihmi hi a rak si.
NLD hi Cozah tlai tak tak te hna sehlaw hitluk mizapi nih an iruahchanmi tluk in rian an tuan kho te lai maw ti hi ka rak phang cia. Cun NLD Cozah an hung tlin sin tein, Chief Minister sinah ruahnak peknak ca ka rak tial. Cucu Chinland Guardian zong nih an chuah (Mirang ca in asi). Asinain kha ca kha a rel tal a rel hnga maw ti ka ruat. Nihin Chin Ramkulh Cozah zungah zalong ngai in luhchuah khawh le mizapi nih ruahnak pek mi paoh cohlan phun in an um nain mi an komh tluk in ruahnak pekmi a la lo bik an si men lai ka ti.

Nihin kan hruaitu upa pawl nih hin thanchonak timi zong hi an ifiang tak tak hnga maw ti ka lunghring. Aruang cu thanchonak timi hi (infrastructure)-lamsul le inn le lo lei thanchonak le (Human Development)-Minung thanchonak tiin a um. Minung thanchonak timi cu fimcawnnak, ngandamnak he minung nunning thanchonak lei khi a sawh duh. Kan upa te nih siseh mizapi zong nih thanchonak ti kan theih paoh ahhin inn tha tha le lam tha tha rumro khi kan mitthlam ah cuan ter dawh kan si. A tak ahcun Kachin ram ah inn tha tha le lam tha tha an sak, an tuahmi pawl cu ramchung ral a tho, KIA le Cozah ralkap an ikap ciammam i nikhat zankhat an an rawk dih. Cucaah inn tha tha le lam tha tha cu ngei in, hman a tlaimi fimthiamnak, ngandamnak le daihnak te pawl kan ngeih tung lo ah zeidah san an tlaih lai. Lam le sul te hna tham tham cu Ralkap Cozah zong nih an tuah ve ko cu ta.

Cun nihin tiangah kan ramkulh Cozah nih hin pipa in a hram a fekmi timhtuahnak (Master planning  ) te hna le thanchonak ding caah a fekfelmi mumai (Policy) an tuahmi a um rih lo. Chin State Development Forum zong an rak tuah nain cu Forum cun zei phihma ngai ngai a chuak lo. Cubantuk timhtuahnak le mumai tel loin caansau a nguhmi thanchonak chuahpi khawh tak tak asilo.

Cun thil pakhat an tuah tikah mizapi duhnak lak le zulh an hmang lo. Zapi ca thatnak asi ahcun mi pakhat hnih cu hnorsuan le sungh zatlak phung asiko timi lungput zong hi a dik lo bak mi asi. Cozah an si caah lam pakhat an cawh lai zongah inn pakhat hnorsuan ding asi ahcun felfai tein kha inn ngeipa kha an chimhchawnh i lungtlinnak lak a herh. Atu hi mizapi ca thatnak asi paoh ahcun pakhat hnih ngaihchiat cu a poi lo ti phun in rian an tuan. Timit dinti laknak an tuahmi khuachung tipek kal ning te hna zong khi a nigncang lomi a tam tuk tiah a chim.
Salai Van Bawi Lian cu, Thailand ram khuahlipi Bangkok ah ummi Chulalongkorn University ah International Development Study in Master a dih hnu ah Hakha KMSS zungah rian a tuan liomi asi.+++

BLOG COMMENTS POWERED BY DISQUS