17
Sun, Dec

CCU le CHRO Nih Hmailei Kutsih Riantuanti Ding Hnatlak Minthutnak An Tuah

Salai Ngun San Aung| 2017 Dec 3| Chin Christian University le Chin Human Rights Organization cu 2017 December 2, CCU Main Building ah hmailei rian tuanti ding hnatlak minthutnak sunglawi ngai in an tuah.


Hi hnatlak mithutnak cu kaphnih rian tuantu upa an dihlak ti awk in tlamtling ngai in an itel kho cun siangngakcha leng Chin ramkumh Cozah lei in siseh adang dang in sawmmi minung 100 tluk an itel kho i CCU President Dr. Henry Siang Kung le CHRO Executive Director Salai Bawi Lian Mang nih biatawi chimnak an ngeih ve ve hnu ah anmah pahnih nih hnatlaknak min sen an thut.

CCU President Dr. Henry Siang Kung nih, “Nihin hi CCU caah philh awk a  tha lomi ni sunglawi asi. CCU le CHRO nih rian tuanti ding hnatlaknak min kan thut khawhnak a ruang cu kan miphun caah kan itinhmi thil aa khatmi te te ruangah asi. Tuhlan rian kan tuan timi cungah kan ilawm i hmailei zongah pehtlai tein miphun ca le Pathian sunparnak caah rian tuanti khawh ding kan iruah chan.” tiah a chim.

CCU le CHRO nih riantuanti ding in hnatlaknak min an thut lio

CCU le CHRO nih an itinhmi thil aa khat mi lak in a chimmi pakhat cu, “CCU nih aa tinhmi cu vawlei ahhin Pathian pennak  ser asi. Cucu biadang in chim ahcun Uknak dik tangah Cozah tha hruaimi ram ser kha asi. Cucu nihin tiang ah CHRO zong nih a tuanmi asi” tiah a chim.

CHRO Executive Director Salai Bawi Lian Mang nih, “1990 in harnak tampi pah ding hngal ko na bu tein mit chinh kamseh in kan miphun kan nu le pa hna nih anmah ke cung teah dir in hi sianginn (CCU) pi cu an rak kan dirh piak. Nuhrin Covo kan timi cu minung i a limhang asi. Vawlei cungpi miphun hna hmai ah limhang ngei tein kan dirher khawhnak ve ding, rialdipnak le tihphannak chungin kan chuah khawhnak ding tawhfung cu fimnak asi. Cucu hi sianginn a rak dirhtu kan pu le kan pa hna nih an rak ngeihmi chun mang asi. Cucu nihin Chin Ramkulh Cozah zong nih kan philh piak hin sawh hlah uh. Cu thil cu iseh in hmuitinh aa khatmi phu hnih nih nihin ah rian tuanti ding hnatlaknak kan tuah hi asi” tiah a chim.

Cun CCU Vice President Dr. Luke Sui Kung Ling nih lunglawmhnak biatawi chimnak a ngeih hnu ah zapi zanrian dum tinak siseh zan ah hlasaknak he sunglawi tak tak in caan hmannak ngeih asi. Chin Ramkulh Cozah phu lei in, Minister Mang Hen Dal le Upadi Lutlai pu Sonny Thang Cung an itel kho.+++

BLOG COMMENTS POWERED BY DISQUS