17
Sun, Dec

Hakha Khuacuanhnak ah Cozah Tangka Tello In Pe 36 A Sangmi City Tower An Bunh Cuahmah

Hakha ah an sak liomi tower

Salai Ngun San Aung| 2017 Dec 3| Chin Ramkulh Khuahlipi Hakha, khuacuanhnak tlangbo a laifang ah Khuacuanhnak inn sang (City Tower) cu Cozah tangka fangkhat hmanh tello, khuaruat kho mi nih thawhmi tangka bak in bunh dingah November 30 ah khan inn killung phunnak (foundation chiahnak/innkil lung chiahnak) an tuah cang tiah kan theih.


Hi kongah Chin Ramkulh Sipin Lutlai Pu Thla Hre nih, “Hi hi a tung hi a san pe 36, a kauh pe 18 asi lai. Hlei hi a tumnak le a kainak tiin pahnih kan donh lai. Cun thli a hran lai caah a cungbik khuacuanhnak zawn cu thlalang benh asi lai. Khuacuanhnak durbing kan chiah lai. Hi tuahnak caah Cozah tangka fangkhat hmanh kan hal hna lo. Ramchung ramleng in Chin ram le Hakha a dawmi hna nih an sian tawk an thawhmi tangka bak in sak kan timh. Hibantuk saknak lei thiamsang nih an tuak ning ah sing 700 a dih lai an ti. Tu tiangah kan hmuh cangmi tangka hi Ks. Sing 463 asi cang. Vice President Pu Henry Van Thio nih sing 50 in a hram a kan domh piak” tiah The Chinland Post ah a chim.

City Tower sakding innkillung an phun lio

Cun, “a tangmi tangka zong hi ram chung ramleng rian ngei kan mirum pawl sin in kan hmuh ko lai tiah ruahchannak kan ngei. Foundation hi pe sarih tuk in kan tuah.November 30 zing sml. 8:00 ah khan Chin ramkulh Chief Minister Salai Lian Luai, Chin Ramkulh Hluttaw haotu Pu Zo Bawi, Minister Pu Vui Kaw, Minister Pu Sui Thio, Minister Pu Pau Lun Min Thang, Minister Han Win Aung, Minister Mang Hen Dal le Upadi lutlai Pu Sonny Thang Cung nih hunnak an kan tuah piak. A thawknak ah Chief Minister Salai Lian nih biatawi chimnak angeih, Hluttaw Chairman Pu Zo Bawi le City Tower saknak committee haotu keimah nih lunglawmhnak biatawi chimnak kan ngeih dih hnu ah HBC Senior Pastor Rev. Dr. Stephen Lian Hup Ling nih thluachuah pek le lunglawmh thlacamnak a ngeih” tiah a chim chap.

A donghnak ah hi khuacuanhnak inn sang sak an timh hnawhchan le an saduhthah cu hitihin a chim. “Inn kan sak cun khuacuanhnak tlang khi luhman kan lak cang lai. Cun a hngaktu tha tein kan chiah lai. Cutikah sikvelh le buaibai a um ti lai lo. Thadam tein dinhnak hmun bantuk in tlonlen a duhmi an tlong leng kho cang lai. Innka khi lawng (hlan kan pupa tuahmi kutka) kan tuah lai i cu lawng cun luh khawh a si cang lai. Cu Lawng ahcun Chin miphun hmelchuhnak, vapual, sia, phaw le nam tibantuk kan suai hna lai. Cun Cozah tangka tel lo bak in hi thil kan tuah mi nih hin Chin miphun zeitluk in dah kan lung aa rual i thil ngan kan tuah khawh timi a langhter lai caah hihi a biapi tak tak” tiah Pu Thla Hre nih cun a chim.

Hi rian cu Power Seven Company nih an tuan. Tender in auh siloin zapi thawh chom in tuanmi rian asi i Power Seven Company zong nih hin hi saknak caah sing 50 an hlut lengah engineer lei thiamsang zong a lak tein an kan hlanh tiah kan theih. Cun hi khuacuanhnak inn sang a cungbik dot ah hin Chin Miphun chung min ngei kan pupa hna an zuk, le an tuan bia tawi tial le chiah asi lai lengah hi saknak caah tangka a thawhtu vialte hi an min le an thawhzat cio langhter in lung catial hnu ah upatnak roca zong pek an si lai tiah kan theih.+++

BLOG COMMENTS POWERED BY DISQUS