17
Sun, Dec

CCPR Le The Chinland Post Nih Kumhnih Chung NLD Hruaimi Chinram Cozah Riantuanmi Zohfel Ceihmainak An Tuah

 Salai Ngun San Aung| 2017 December 3| Yangon hrambunh Chin Center for Peace and Reconciliation (CCPR) le Hakha hrambunh Fidi Foundation @The Chinland Post ibawm in December 1 le 2, HBA Hall ah nihnih chung Chin ramkulh Cozah le Mizapi pehtlaihnak thawnternak ding kong he pehtlai in NLD hruaimi Chinram cozah nih kumhnih chung a riantuanmi zohfel ceihmainak an tuah.


Hi ceihmainak (Forum) ah Fidi Foundation Operation Director Salai Bawi Uk Thang le CCPR Program Director Salai Duh Hu Thang nih Facilitator an tlaih. Zatlangbu (CSO) Media le Cozah pethlaihning kong ah Chin Civil Society Network Director Salai Jacob Thang le The Chinland Post Editor in Charge Salai Ngun San Aung nih an chim. Kumhnih dengmang a kal cangmi NLD Cozah an riantuannak cungah tuanvo laknak le langhngannak zeitlukdah an ngeih timi tlangtar tangah Chinbridge Institute Founder and Director Salai Van Cung Lian le KMSS in Salai Van Bawi Lian nih chimnak an ngeih.

Salai Jacob Thang nih, “NLD nih hin thimnak an rak luh lioah mizapi bia an kamhmi hna le an hung tlin tak tak tikah an tuah khawhmi aa dang ngai. An biakam an tlolhmi a tam. Cutikah mizapi nih an hmuh hna ning le an ibochan hna ning zor ngai dawh asi. Hluttaw zong nih upadi cu pakhat hnih an ser. Vawlei hmun le ram kong buaibainak zong an remhchun kho tak tak lo. USDP chan nak in NLD chan tu ahhin ziknawh eihmuarnak um deuh dawh in mizapi hmurka a leng. USDP chan ahcun tangka ngei mirum le bawi ikomh in riantuannak, tangka ngei pawl papek nak (Cronyism) a rak um i NLD chan ahcun chungkhat papeknak (Nepotism) a tam. Cozah nih committee an sermi tete ah Zatlangbu chung hruaitu minung an kan telh pah len nain a tak biachahnak ahcun kan aw-aan aa tel kho tak tak lo. Zei asi hmanah ah Democracy ukphung sernak ahhin Media le Zatlangbu nih hin Cozah hi a doh in doh siloin dirkamh le riantuanti khawh kan herh deuhmi asi” tiah a chim.

Salai Van Cung Lian hi Hakha khuachung minung 700 sinah Chin Ramkulh Cozah riantuannak ahhin ningcang lo riantuannak (corruption) a um maw timi hlathlainak (research) a tuah cuahmah liomi asi. Cu a tuah mi chungin Pyidawtha sang ah minung 100 an hal mi hna nih an lehmi kha tutan ah a tlangpi in a chim. Ningcang lo riantuan (corruption) timi cu mizapi nih thimmi hruaitu nih a nawlngeihnak kha pumpak hlawknak caah a hman mi khi asi tiah vawlei cung huap hibantuk lei hlathlainak a tuahmi pawl an chimmi cherhchan in a fianter i corruption hi Khrihfabu chung zongah a ummi thil a si tiah alanghter.

Salai Van Bawi Lian nih, “Thanchonak (development) kan timi hi phun hnih in a um. Minung hram thanchonak timi le inn le lo, lam sul lei thanchonak an si. Minung hram thanchonak timi cu minung nunning santernak, ngandamnak le fimcawnnak tibantuk kha asi. Tu kan cozah hi thanchonak ti an chim paoh ah lam le sul inn tha tha saknak kong lawngte an chim. Thanchonak timi hi an ifiang lo hlah maw ti ka ruat. Nihin tiangah kan cozah nih Chin ramkulh ca rian an tuannak ahhin a fek i a pipuammi timhtuahnak mumai (policy) an ser kho taktak lo. Mi cu a kom ngaimi an lo i ruahnak cheuh zong a duh ngaimi an lo nain ruahnak a la lo bik pawl an si fawn lai dah” tiah a chim.

Salai Ngun San Aung nih, “Nihin tiang ah Chief Minister zong kan tong kho lo. Hluttaw meeting zongah a thok in dih tiang kan um kho lo. Kan MP pawl zong mizapi he tonnak an tuahmi a tlawmtuk, pakhat hnih te cu a tong pahmi zong an um ve ko. Inn kangh le min cimh lawngah a chuakmi MP le Minister ngeih cu a si kho lo. Mizapi he tonnak an tuah i anmah an riantuan mi an duh can an chim hnu ah mizapi lei cu biahalnak caan hmanh pek huaha loin tonnak cu an dih ter. Mizapi zong nih kan thimmi hruaitu pawl an cawlcangh ning ngiatthlai le pehzulh in hlathlai kan chambau. Hruaitu tha kan ngeih khawhnak dingah mizapi kan biapi tuk” tiah a chim.

Hi tonnak ah minung 50 tluk an kai kho. Tedim, Falam, Kalay, Thantlang le Hakha tiin an ra hna. Hi an tuahmi a nihnihnak ah Chin Ramkulh Cozah chimrelnak nawl ngei Sipin Minister Isaac Khen zong nih Chief Minister aiawh in a telpi hna hi biatawi chimnak zong a ngei. CCPR Program Director Salai Duh Hu Thang nih, “hibantuk hi hmailei ahcun thla ruk voikhat tibantuk in tuah khawh kan izuam lai. A herh tak takmi a si” tiah a chim.

A nikhatnak chung tiang sawmmi upa pali nih biachimnak an ngeih hnu ah a kaimi dihlak in phu then in, an chimmi pawl ceihruahnak an tuah. Cu an ceihmi chung cun Cozah sinah ruahnak peknak cathluan pakhat Kawlca in an tial i cucu Chin ramkulh Cozah sinah an pek lai tiah kan theih.+++

BLOG COMMENTS POWERED BY DISQUS