17
Sun, Dec

Hakha Khuacuanhnak Tlang Ah Aa Vel I Minung 6 An Tlaihmi Lakah Pakhat Cu Thong An Thlak

Chinland Post| 2017 November 28| November 26 chun, Hakha, Kankaw lamcung ah a ummi khuacuanhnak tlang (view point) ah tleirawl ngakchia minung 20 tluk an i vel. Cu aa velmi lakah minung 6 an tlaih khawh cang hna. Minung pakhat cu sii-inn ah an thlop i pakhat ah thong an thlak tiah kan theih.


“Khuacuanh tlang i aa velmi lakah minung 6 cu kan tlaih khawh cang hna. Anmah paruk lakah minung pali cu sii-inn ah kalpi in an thlop hna i minung pathum cu an chuak colh. Pakhat belte cu fak ngai in aa hliam caah sii-inn ah aa thlop cuahmah lio a si.  Sii-inn ah a ummi chim lo in minung pali cu sianginn a kai liomi an si caah biakamnak (aa-mah-khan) in kan thlah chung rih hna. Asinain sianginn a kai lomi pakhat cu thonginn ah an khumh chung rih. Atu hi a taangmi minung 15 cu tlaih ding in palek nih an kawl, an hlat cuahmah lio hna a si. Minung pahnih cu aho an si, an min hngalh an si cang” tiah Chin ramkulh Sipin Lutlai Director Pu Thla Hre nih The Chinland Post ah a chim.

“Khuacuanhnak tlang ah thilri kan chiahmi, mei kan vanmi tibantuk a hrawktu hi a luancia caan ah minung 7 kan tlaih bal cang hna. An nu le an pa auh in fak nawn te in dan zong kan tat bal cang hna. Tutan aa velmi pawl zong hi a rauh hlan ah tlaih pah dih khawh an si ko lai. Fak nawn in dantatnak pek an si lai. A taangmi 15 kan tlaih khawh hna in biaceih le dantatnak pek an si te lai. Cu tikah cun a herh si le mi zei dah an si timi zong zapi theih in kan phuanchuah te lai” tiah a biapeh ah a chimchih.

Photo Credit: Hakha Post
 

BLOG COMMENTS POWERED BY DISQUS