17
Sun, Dec

Rung Lian Ceu Nih Kumhnih Peh In World Paih Championship Laksawng A Co

Chinland Post| 2017 November 26| USA- Indianapolis ah tuahmi World Paih Championship ah Hakha peng in Chuncung khuami Rung Lian Ceu nih bual a co. 2016 kum lio zong amah nih a co caah tukum he hin kumhnih peh in bual a co a si cang.

 



World Paih Championship committee tawlrelnak in tuahmi paih cu Chin Kumthar he fonhchih in Indianapolis ah sunglawi ngai in an tuah. A donghnak bik champion zuamcawhnak cu November 25 zan (US caan in) ah an tuah.

“Zatlang paih ah minung 54 hrawng an i pai i Hakha Khuahlun in Sui Chan Ceu (tleicia Pu Za Cung fapa) nih bual a co. Laksawng ah taisawm le US$ 3000 an pek. Zuamcawh paih ah minung 16 an i pai. A donghnak bik ah Hakha Khuahlun in Tial Uk le Hakha Khuathar in Tial Cung Thang (Pu Tawk Cem fapa) an i pai. Tial Cung Thang nih voikhat a tengh i Tial Uk nih a chuahtak caah Tial Cung Thang nih taisawm le US$ 2000 laksawng a co. World Paih Championship cu nikum (2016 kum) bual a comi Hakha peng, Chuncung khuami Rung Lian Ceu le Hakha peng, Hniarlawn khuami Uk Ling Thang an i pai. Rung Lian Ceu nih voihnih khelte a thlak (a tengh) i championship laksawng taisawm, Trophy le US$ 5000 a co” tiah a hmun ah paih a zohmi upa pakhat nih The Chinland Post ah a chim.

Uk Ling Thang voihnih khelte a hun tei bak ah Rung Lian Ceu nih lawmh bia a chim lio
 



Rung Lian Ceu le Uk Ling Thang cu minute 20 tiang an i paih chung ah voikhat hmanh an i thlu in an i teng kho veve lo. Minute 25 chung an hun i paih ahkhin tangkomh bak in an paihter hna i chikkhat lo te ah Rung Lian Ceu nih voikhat a hun tengh colh. An vun i la than i Uk Ling Thang nih a hun thlak ve nain relh lo ah a tla, a thlu kho taktak lo. Cun an vun i la than i Rung Lian Ceu nih chikkhat lo te ah khin dawh taktak in a voihnihnak a hun thlak than. Cuti cun Rung Lian Ceu nih voihnih khelte a thlak khawh caah championship laksawng cu a co tiah kan theih. Mah zan an i paih ah hin Uk Ling Thang cu a liang aa khawn i a celh pah lo bu in aa paih chih.

Uk Ling Thang nih taisawm le US$ 2000 laksawng a co ve. 2018 World Paih

 

Championship cu tukm ah bual a comi Rung Lian Ceu le zuamcawh paih ah bual a comi Tial Cung Thang an i pai te lai tiah paih tlangtlatu hna sin in kan theih.

Rung Lian Ceu nih paih a dih cangka in a facebook ah, “BAWIPA kaa lawm. Mizapi nih thazaang fakpi nan ka pek i kaa lawm tuk” tiah a tial colh. Cun, Rung Lian Ceu cu Uk Ling Thang avoi hnihnak a hun tengh bak ahkhin a khuk aa bil i lawmhbia a chim colh.

2017 Paih champion ship aa paimi Rung Lian Ceu le Uk Ling Thang
2017 zuamcawh paih ah bual a comi Tial Cung Thang
Photo Credit: Salai Lung Thli Tum, Chin Cable Network Channel
BLOG COMMENTS POWERED BY DISQUS