17
Sun, Dec

Lakhruak In Chin Ramkulh Hluttaw Tonpumhnak An Auh; RE Le BE Budget Kong An Ceih Lai

Chin ramkulh hluttaw tonpumhnak

Chinland Post| 2017 November 23| Lakhruak in Chin ramkulh hluttaw tonpumhnak cu November 27 ah tuahding in an auh. Hi lakhruak tonpumhnak ah budget lei kongkau ceihmainak an ngei lai tiah kan theih.

 


“Tutan lakhruak tonpumhnak ah ceih kan timhmi cu Chin ramkulh nih a hmanciami le a hman dingmi budget zapi kongkau a si. Caanhmaan tonpumhnak i ceih awk tha dingmi thil a si lo ca le a biapi tukmi budget kong ceih zokzok a herh caah atu bantuk in lakhruak tonpumhnak kan auh hi a si” tiah Chin ramkulh hluttaw Speaker Pu Zo Bawi nih The Chinland Post ah a chim.

Chin ramkulh hluttaw caanhmaan tonpumhnak avoi 10nak zong November 29-30 ah tuahding in palai pawl thawng an thanh dih cang hna. Hihi tukum chung ah a donghnak bik hluttaw caanhman tonpumhnak an ngeih a si cang lai tiah kan theih.

 

Tutan lakhruak tonpumhnak kawhauhmi kong he pehtlai in atu bantuk in Chin ramkulh hluttaw haotu chang Pu Aung Taan nih The Chinland Post ah a chim.

“Tutan lakhruak tonpumhnak ah budget kong kan ceih lai. Budget ahhin RE timi le BE timi a um. RE Chinram cozah caah 2017-18 budget a si, BE cu Chinram cozah caah thlaruk hmanmi budget a si. 2017 April thla khan September thla dongh tiang Chinram cozah nih BE budget a hmanmi zohfelnak le a taangmi thlaruk ca hman dingmi kong ceihmainak a si lai” tiah The Chinland Post ah a chim.

BLOG COMMENTS POWERED BY DISQUS