17
Sun, Dec

World Bank Nih A Leetmi Chinram Lamsul Sersiamnak Rian Tuan Ding In Biakhiahnak A Tuah Than Cang

Chinland Post| 2017 November 23| World Bank nih Chinram lam le sul sersiamnak caah US $ 60 million a cawih i a leet thanmi cu Vice President Henry Van Thio tawlrelnak thawng in November 21 ni ahkhan tuan than ding in World Bank nih biakhiahnak a tuah than cang tiah kan theih.

 


Chinn ramkulh cu Kawlram chung ah lam le sul a chia bikmi ramkulh a si. Cu ruang ah World Bank nih Chinram lam le sul sersiamnak caah US $ 60 billion a cawih. Cu tangka cun Kalay-Falam-Hakha lampi kha nylon kattaza phahpiak dih ding a si. A kong tampi ruang ah World Bank nih US$ 60 million a cawihmi cu a leet than. Cu tikah Vice President Henry Van Thio nih cuti budget sungh ding a si kho lo a ti caah Kawlram ramkomh lam le sul lei pehtlaihnak minister kha ton biaruahnak a ngeih tiah kan theih.

“Vice President nih hi World Bank tangka cawihmi an leet than si cun Chinram thanchonak a pih lai caah hi kong fakpi in kan tawlrelpiak ti in ramkomh lam le sul lei pehtlaihnak minister cu a chimh. Cu tikah ramkomh lam le sul lei pehtlaihnak minister nih November 21 chun, Naypyidaw ah World Bank tuanvo ngeitu bik lutlai cu ton biaruahnak a ngeih. Hi ton biaruahnak an ngeih hlan ah Vice President Henry Van Thio nih Chinram cozah cu Kalay-Falam-Hakha kar lampi cung ah a ummi khuami hna kha lam serpiak kan herh, rak kan ngoltak hlah uh, rak kan bawm uh tiah lungtlin hnatlaknak minthut he cazin rak la hna uh a ti hna. Cuti Vice President nih ruahnak a cheuh hna ruang le a fialmi hna ruang ah minung 14000 hrawng nih min an thut. Hihi Chinram cozah nih a tuah awk zong an hngalh lo lio ah Vice President ruahnak peknak le fialnak thawng in a thami bia phichuak a si. Cu cazin cu Chinram cozah nih ramkomh minister sin ah a caantenh te in an kuat. Cu minthutmi cazin cu ramkomh minister nih World Bank tuanvo ngeitu bik a hmuhsak khawh caah World Bank lei nih US $ 60 million in Chinram lam le sul sersiamnak rian tuan than ding in biakhiahnak an tuah hi a si” tiin Vice President nih a ka chawnh tiah DaNa Facility ah M & E Manager a tuan liomi Salai Tluang Lian Hnin nih The Chinland Post ah a chim.

Chinram lam sining/Photo: CW
 
 

“Vice President tawlrelnak thawng in kan ngah than caah lawmh a um tuk. Vice President hi a chunglei in riantuannak ngei hlah sehlaw kan sungh cikcek ko hnga. World Bank lutlai le ramkomh minister ton biaruahnak tlamtling sual hlah sehlaw Vice President nih a hlankan in ton biaruahnak ngeih ding timhlamhnak a ngei cia cang. Sihmansehlaw atu cu amah nih ton biaruahnak ngeih hau lo, a chunglei in rian a tuanmi kha a tlamtling cang. Hihi a biapi bik cu Vice President Henry Van Thio tawlrelpiaknak thawng in a si. Cun, a pahnihnak cu Chinram cozah,  khuami cung ah aa hngat ve” tiah Salai Tluang Lian Hnin nih a biapeh ah a chimchap.

Hakha Khuanu khuap in hruaitu upa pakhat nih, “Chinram lam le sul sersiamnak ding US$ 60 million leet cangmi le kan sungh cang ti kan ruahmi kan hun ngah than cu kan i lawm taktak. Hihi Vice President Henry Van Thio le Chinram cozah tawlrel piaknak thawng in an si” tiah The Chinland Post ah a chim.

 
 

Kalay-Falam-Hakha lam kauhnak rian ah khua 34 in inn 84 nih kan ngeihmi dum, ngakhur, thlaikheu pawl an hrawh dih pin ah khua 20 nih ti akn laaknak hmun a hrawhmi cung ah sungh zatlaknak zeihmanh kan hmu lo tiah an langhter. Cucaah tangka cawihmi US$ 60 million program cu kan ngol awk a si tiah World Bank nih ramkomh minister sin ah cathluan a kuat. Cu ruang ah World Bank nih Mizzama news sin ah tangka cawihmi an leet thannak cu zapi theih in a hmasa bik an rak phuan.

World Bank nih ramkomh cozah sin ah US$ 200 million a cawih i hi chung ah US$ 60 million cu Kalay-Falam-Hakha lampi nylon kattaza phahnak caah ramkomh hluttaw nih a rak fehter cangmi a si.

BLOG COMMENTS POWERED BY DISQUS