17
Sun, Dec

Sianguk H. Lian Tial Cu Kawlram Ramkulh Le Ramthen Aiawh In Upat Conglawmhnak Roca Le Ks. Sing 10 An Pek

TCP-Hakha| 2017 October 11| Sianguk H. Lian Tial cu Kawlram Fimcawnnak Zungpi nih October 5, Naypyidaw ah tuahmi World Teacher Day ah Kawlram chung ramkulh le ramthen aiawh in conglawmhnak (ဂုဏ္ထူးေဆာင္ပုဂၢိဳလ္) Roca le ks. sing 10 laksawng an pek. 

 

Kawlram pumpi fimcawnnak hrampi ah ramkulh le ramthen zapi aiawh in Sianguk H. Lian Tial lawng nih laksawng a co. Fimcawnnak sang (university level) ahcun sianghleirun ah rian a tuanmi professor pawl nih hi upat peknak laksawng cu an co cio ve. Atu bantuk in Sianguk H. Lian Tial nih minthatnak le upatnak laksawng a comi hi Chin miphun in a hmasa bik ah Sianguk Pu Van Ci nih a rak co. Cun, Sianguk Pu Lian Kung, Sianguk Dr. Bawi Hu le Sianguk Pu Hrang Hlun nih an rak co ve tiah kan theih.

Tukum World Teacher Day i conglawmh upat pek ding ah Chin ramkulh fimcawnnak Director Hnin Kyi nih Chinram in Sianguk H. Lian Tial cu ramkomh fimcawnnak zungpi ah a min cazin a pek. Cu bantuk in ramkulh dang le ramthen dang nih minung pakhat cio min cazin an pek ve. Cu lakah ramkomh fimcawnnak zungpi nih Sianguk H. Lian Tial hi pek awk aa tlak bik tiah amah an thimnak hi a si. 

Sianguk H. Lian Tial hi 1968-2008 tiang kum 40 chung cozah rian a tuan hnu ah pension a la. Sianglairun cachimtu dirhmun in rian a awt hmasa bik i sianguk (sayaci) dirhmun, penguk, ramkulh le ramthen lutlai (Director) tibantuk dirhmun tiang dot sarih in a rian a kai. 

Sianguk H. Lian Tial nihcun atu bantuk in conglawmhnak Roca le laksawng pekding ah a kan thimnak a tlangpi cu a tanglei bantuk in an si tiah TCP ah a chim.

1. Riantuannak hmun a kan chiahnak hmunkip ah rian a tuanmi ka si ruang ah

2. Sianginn khar caan ah man lo in zei hmanh a hngal lomi (အသံုးလံုး) ca chimhnak ka tuahmi le ka chimhmi hna ruang ah

3. 1988 ah Siangngakchia Puai (ေက်ာင္းသားပဲြေတာ္) ah catar thlirtu training uktu le nu siangngakchia tlunnak sakhaanhmu felfai te in ka tuan khawhmi ruang ah (hi lio ah central committee nih roca an ka pek)

4. TEO ka tuan lio i Naga le Hakha peng fimcawnnak tuanbia cauk ka tialmi ruang ah (upper Myanmar No.2 Education nih roca an ka pek)

5. Magwe ramthen fimcawnnak lei uktu le chekfeltu rian ka tuan lio ah Sianguk hna i kumkhat chung an riantuannak cauk ka chuahmi ruang ah 

6. Cauk phun 27 ka chuah ruang le capar 100 ka tialmi ruang ah

7. Cahmai 800 leng a simi Chin ramkulh fimcawnnak tuanbia cauk ka tialmi ruang ah (hi cauk ka tialmi ruang ah Chin ramkulh Chief Minister nih 2016 February Chin National Day ah conglawmhnak Roca le ks. sing 2 an ka pek). Atu bantuk in hawi nih an hmuh ballomi ka hmuh ti kaa ruah caah kaa lawm tuk. Ka phu tawk lo in BAWIPA thluachuah ka hmu ko tiah kaa ruah caah BAWIPA sin tu ah hin lawmhnak bia ka chim” tiah The Chinland Post ah a chim. 

Amah hi B.A (Hist); Dip. Ed; BRE; M.Div. in degree a dihmi a si. Amah cu Thantlang peng, Surngen khuakomh- Sentung khuami a si. Thangaw khuami Pi Aye Nwe he fanu pathum le fapathum an ngei. 2008 June thla in pension a laak hnu ah Hakha Laica committee, CARD ah ruahnak petu, Myanmar  Education Foundation ah Chin ramkulh lemsoinak tuahtu committee haotu le UNICEF le Chin ramkulh i bawm in fimcawnnak lei thanchonak le cawisannak lei caah sermi committee chungtel ah rian a tuan cuahmah liomi a si.+++

 

BLOG COMMENTS POWERED BY DISQUS