19
Thu, Oct

Thantlang Peng Nu Naupawi Bawmhnak Cu Tuthla 17 In Thlahnih Ca Lawng Pek Chung An Si Lai

Salai Elvis| 2017 October 10| June thla in rak thok cangmi Thantlang peng nu naupawi thlakhat ah 15,000 bawmhnak pek a si lai timi cu October 17 ah thlahnih ca lawng pek chung an si rih lai tiah tuanvo ngeitu sin in kan theih. 

 

“Relrem lonak tampi ruangah June thla in rak thok cangmi nu naubawi bawmhmi cu a tu tiang pek an si rih lo. Hi kongah kanmah lila zong an kan hal lengmang tawn. Nain tangka lei kong cu kanmah tlaihmi a si lo tikah tlawmpal ah bawmh a si ko lai titu in kan leh tawn hna. Kanmah tu nih mizapi an hmai kan khap hna lo. Hlen a lo ngaitak, nain tuthla ni 17 in cun pek an si ko cang lai, nain June le July thla ca lawng pek chung an si rih lai. August le September thla ca zong November thla ah pek an si than te lai. Khi pin khin cun thlakhat voikhat pek an si te ko lai” tiah hi kong ah Thantlang peng tawlreltu Thla Lian Kio nih TCP ah a chim. 

“Hi kong cu kaa zumh ti lo, a si zong si hoi bal lai lo, a va si le a tha thiam. Nau pawi ruang ah hi bawmhnak kan hmuh cu a tha tukmi a si ko nain, hi bawmh hi kaa ruah chan lem lo” tiah nutung pakhat nih a chim. 

Hi bawmhnak cu nau an pawi June thla in nau an ngeih an fa le kum hninh an si tiang thla khat ah 15,000 bawmh an si lai tiah theih a si. September thla thok tiang ah nu naupawi bawmhnak pek ding timi cazin a phan cangmi hi minung 629 an si. Hi bawmhnak cu LIFT nih Fund mi a si nain UNOPs nih tangka a tlaih mi a si tiah theih a si.  +++

 

BLOG COMMENTS POWERED BY DISQUS