19
Thu, Oct

Thantlang Caah KBZ Nih Motor Bawmhmi Pekchanhnak Ah Chin ramkulh Vuanci Dihlak An Sawm Hna Lai

Salai Elvis| 2017 October 10|  October 14 (niruk ni) ah tuah dingmi KBZ nih Thantlang caah tiphurnak motor pahnih a bawmhmi cu hlunghlai tak in pekchanhnak tuah timh a si i mah ni ah Chin ramkulh vuanci dihlak sawm an si lai tiah thawng kan theih. 

 “Mah ni ah KBZ zungpi in a pathumnak Director U Tin Win zong sawm a si, mah pin ah Chin ramkulh cozah zong kan sawm dih hna lai. Aho dah a ra kho lai ti cu fiang in theih a si rih lo. Lunglawmhnak caah tiin khuanu/pa tawlrelnak in rawldanghnak kan tuah lai i Sia kan thah lai. Hi ti phurhnak motor zong a hmannak ding caah Committee kan ser cang. Hi chungah khuanu/pa chairman le Secretary, Sipin Committee le sangchung khuabawi pathum kan si lai. A hman ning cang phung le phai cu kan ceih rih lo” tiah sipin Committee chairman Pu Ram Khar nih TCP ah a chim. 

Hi kong he pehtlai in motor pakhat cu sii-inn rak kan pe ve u tiah an hal hna tiah theih a si. Hi kongah pek phung a si lo kan pe hna lai lo, nain an herhnak caan paoh ah an hman khawh, anmah lawng si lo ka dang zung zong, mizapi zong nih hman khawh tu a si ko lai. Hi motor cu sipin kut ah a um lai i sii-inn ca cu duh sah in budget dang hna in hal khawh a si te lai” tiah Pu Ram Khar nih a chim. 

Mah motor cu Pu Thang Iap (Shan ramkulh zaanglek bawi) nih Thantlang khuapi ti an har a theih i amah nih KBZ a pehtlaihnak hna thawng in bawmhnak an hmuh hi a si. Hi motor pahnih cu a man in sing 900 a si tiah kan theih.  +++

 

BLOG COMMENTS POWERED BY DISQUS