19
Thu, Oct

Kalay Le Tedim Kar Ah Motor Pahnih Aa Let I Chinmi 7 An Thi

TCP-Hakha| 2017 October 11| October 10 ni Kalay le Taingen karlak ah motor aa let i minung 7 an thi. October 11 zingka suimilam 10:00 tiang ah minung pahnih cu an ruak an char kho rih hna lo tiah kan theih.

 

Hi kong he pehtlai in Tedim Mino hruaitu Nung Siang Tuang nih, “Tedim peng, Laitui khua in Kalay lei ah a tummi ke ruk ngei thilphor motor pakhat cu Taingen thlang, October 10 zanlei suimilam 3 tluk ah aa let i hmakhatte ah nu pali an thi colh. Minung 9 zong fak tuk in an i khon caah Kalay sii-inn ah atu hi an thlop lio hna a si. October 11 zingka sml. 10:00 ah Kalay sii-inn ah a phanmi nu pakhat a thi chap than. Motor aa citmi zapi hi minung 35 an si” tiah October 11 zingka sml. 9:50 ah The Chinland Post ah a chim.

Motor hi ruahpi a sur i lam a nal tuk pin ah motor pakhat he an i kianhnak vawlei nih a nem/tolh tak i atu bantuk in aa leh hi a si. Hi motor ah aa citmi hna hi Laitui khua ah October 5- 8 tiang tuahmi Chin Khuado puai ah a kalmi Kalay peng Laitui khua pumpululh chuih phu le Laitui khua in siangngakchia pawl an si tiah theih a si.

Cu lawng si lo in Tedim khuami pahnih zong Surf motor he Kalay in Tedim lei an panh lio Taingen thlang thiamthiam ah lamthlang ah a ril i minung pahnih an thi tiah kan theih.

Hi kong he pehtlai in, “October 10 zingka in Pu Kap Sum le Pu Dong Sian cu Kalay in Tedim ah Surf motor an tlung. October 10 zan tiang Tedim an phak lo caah chungkhar le khuami nih an va kawl hna i October 10 ni zanlei motor aa lehnak le minung 4 an thihnak hmun Taingen thlang ah an ruak in an va hmuh hna. An motor zong a sawp dih. October 11, zingka sml. 10:00 tiang an ruak zong laak khawh an si rih lo. Zeitik ah dah motor hi an i leh timi kan hngal kho rih lo. Anmah hi Yangon sii-inn ah aa piah i an rak tlun lei a si” tiah Nung Siang Tuang nih TCP ah a chimchih. 

October 10, chun hnu ah a thimi minung 4 cu an khua Laitui ah an tlunpi hna hi tlamtlingte in an ruak zong fimhlawm an si. Sii-inn ah aa thlop liomi hi an i khonning a fah caah an ngandamnak kong thinphan dailo an si tiah kan theih. 

Chin Khuado puai, pumpululh chuih zuamnak ah hin Laitui khuami nih pakhatnak an laak tiah theih a si. 

 

BLOG COMMENTS POWERED BY DISQUS