19
Thu, Oct

Chin Idol Hlasak Zuamnak Tuzan In Kan Thawk Lai; Pastor Dr. Khar Ling

TCP-Hakha| 2017 October 10|Chin Association for Christian Communication (CACC) hruainak in Chin Idol hlasak zuamnak cu tuzan (October 10) in an thawk cang lai. Hlasak i zuam ding in min a pemi zapi hi minung 57 an si tiah kan theih.

 
CACC hruainak tang Zungmawi le Nunphung (art & culture) department in Secretary Pastor Dr. Khar Ling nih, “Chin Idol hlasak zuamnak cu tuzan (October 10) in CACC zung ah kan thawk cang lai. Hlasak i zuam ding ah min a pemi zapi hi 57 an si. Hi chung ah minung 48 cu an i zuam ding aa fiang taktakmi an si cang. Tuzan in kan thawk dingmi hi fingrilh rilhnak (audition- aw hneksak) zuamnak a si lai. Fingrilhrilh zuamnak cu October 10 zan in October 20 tiang, zan sml. 7:00-9:00 tiang lengmang kan tuah lai” tiah The Chinland Post ah a chim.

“Top 10 belte hi cu October 27-29 tiang Carson Hall ah kan tuah lai. Video thlak le zapi hmuh khawh ding in live zong thlah a si te lai. Tutan zuamnak ah min a pemi hi Chinram lawng si lo in Kalay, Yangon, Aizawl, Lawngtlai, Delhi le Malaysia zong in an i tel” tiah a chimchih. 

Tutan Idol ah biakhiaktu (judge) lutlai Saya Hniang Ceu Ling nih, “fingrilh rilhnak (aw hneksak) zuamnak level 1 hi hla fungkhat cio an sa lai. Minung 50 ringlo an si caah zanthum paoh cu kan rau lai. Hi chung in minung 20 hrawng an tla lai i Level-2 zuamnak zong ah hla fungkhat cio an sa than lai. Hlasak an thiam pah si cun Level-3 zong kan kai kho men. Cun, level 2 hlasak zuamnak in minung 10 (top 10) lawng zong tanh an si kho fawn. Tutan zuamnak hi biakhiaktu (judge) nih mark kan pekmi ning hi a thiam/thiam lo (yes or no) in a si lai” tiah The Chinland Post ah a chim.

“Anih cu a tla cang timi zong khi biakhiaktu pathum nih hlasak a thiam tiah kan ruah a si ahcun kaiter khawhnak nawl kan ngei ve lai. Cun, kei nihcun hlasatu hna an performance, expression (mode) le an aw lai le lai lo le a sakmi hlaphantu a hngalh le hngalh lo tibantuk biapi zoh in mark ka pek hna lai” tiah a biapeh ah a chimchih. 

 

Tutan Chin Idol ah biakhiaktu (judge) a tuan dingmi cu; Saya Hnaing Ceu Ling, P. Cung Lian Thawng le Mang Lian Chawn an si lai. Anmah bawmtu (reserved) ah Rev. Lai Ram Hu le Billy Ngun Cung Bik an si lai. Top 10 tik belte ahcun biakhiaktu (judge) hi Cung Aung, Herh Lian le Sung Tin Par an si te lai tiah kan theih.

 

Tutan Chin Idol zuamnak i pakhatnak laksawng cu Chinland News Chief Editor Salai Lung Thli Tum nih ks. sing 50 a hlut. Cucaah, pakhatnak laksawng cu ks. sing 50 le Trophy pin ah hla album chuahpiak. Pahnihnak laksawng cu ks. sing 7 le hla album chuahpiak, pathumnak laksawng cu ks. sing 5 le hla album chuahpiak an si lai. Pakhatnak laksawng hi ks. sing 10 pek ding in bia an khiah nain Salai Lung Thli Tum nih a hlut caah pahnihnak le pathumnak hlasawng he atu bantuk in aa thlau tuknak hi a si tiah kan theih.

Pastor Dr. Khar Ling nih, “Chin Idol hi atu ahcun CACC tawlrelnak in tuah si ko hmanhsehlaw hihi CACC ta le ngeihmi a si lo. Cucaah, Chin Idol hi Chinmi zapi ta le ngeihmi a si ti nan kan ruahpiak thiam ding ka duh. Pakhatnak le pahnihnak le pathumnak laksawng zong hi aa thlau tuk caah atu ning si lo in committee nih an remh than khawhmi zong a si” tiah TCP ah a chimchih. 

Tutan Chin Idol hi Chinram ah CACC nih avoi hnihnak an tuah a si lai. Avoi khatnak tuah lio ah Chin Idol laksawng cotu cu Billy Ngun Cung Bik a si tiah kan theih. 

BLOG COMMENTS POWERED BY DISQUS