19
Thu, Oct

Kalaymyo Sii-innpi Ah Hngakchia Tlangrai In A Zawmi An Tam Tuk Rih

TCP-Kalay| 2017 October 9| Kalaymyo ah June thla dongh in October thla tiang hngakchia le upa tlangrai in a zawmi an tam tuk rih. Hngakchia rai tihnungmi tolbo (Tuai-lun-toh-kuai) zawtnak in October thla tiang an thi rih ko tiah Kalaymyo sii-innpi in thawng kan theih.

 

“A ruang cu nikhua caan a that lo tuk zong a si pah. Nikhua a linh caan ah hin 34’C in 36’C tiang a si tawn. Cun ni linh le ruahsur aa tong. Cheukhat hna cu a linh celh lo ah Chun ni linh caan ah Ti kholh sualmi le zan ah angki hruk lo in aa um i cumpi le tlangrai nih aa tlak tawn hna. A bik in tu lio ni khua cu hngakchia le upa kum 60 cung nih an celh tawn lo. Cun nihlawh riantuanmi hna cu Pumsa nih celh lo tiang in rian a tuanmi hna le pum nih a herhmi vitamin an chambau ruang ah an zaw bik” tiah Sibawi pakhat nih The Chinland Post sin ah a chim.

Kalaymyo sii-innpi hi ihkhum 300 umnak sii-inn a si caah mizaw zohnak ah Hngakchia zohnak, Nau ngeih ternak, Mit lei zohnak, Accident mi hna zohnak, HIV-AIDS rai pawl zohnak, Medical ward zohnak, Pumkip rai (General ward) zohnak, Ruh lei zohnak le a dangdang zohnak phun 12 tiang umnak le Specialist (Paraku) siibawi tampi umnak zong a si.

A tubantuk furpi tlangrai a tam lio caan ah cun hngakchia ihkhun 60 lawng aum nain mizaw an tam tuk ruangah Nau ngeihternak ward ihkhun tiang hngakchia mizaw umter a si hlei ah sii-inn a lenglei kap Varedar le zun inn lei kalnak tiang mizaw an um tawn.

Nikhum 2016 kumkhat chung hngakchia zohnak ward ah  mizaw 4487 an um i, a thimi 13 an si. Mizaw an tam cem cu July thla ah 613, August thla ah 596 le September thla ah 587 an si tiah an langhter.

Hngkachia zawtnak kong ah “Kei ka fale hi pa 3 an si i an zawt caan ah hngakchia Paraku Sibawi sin voikhat zohternak ah ks. 7000-9000 kar a tlawmbik a dih. An zual lo tuk zong ah a tlawmbik voithum zohter a hau. Nu le pa kan lungre a theih pin ah fale an tuar tuk. Cucaah tukum 2017cu July thla hramthok in Vatimin C aa telmi (ORS-dinmi) nikhat durkhat in July to October thla hramthok tiang cu an pathum te in an din peng caah Pathian dawtnak in an zaw ti lo” tiah upa pakhat nih TCP sin ah a chim. +++

 

BLOG COMMENTS POWERED BY DISQUS