19
Thu, Oct

Pu Ram Zel Inn Satu Kawlpawl Nam In An I Sawh: Pahnih Sii-inn An Phan

Salai Elvis | 2017 October 8| October 6 zan suimilam 10:30 hrawng ah Thantlang khuachung Market sang ah Pu Ram Zel inn sami Kawlpa Way Lin nih a riantuan hawi minung pahnih nam in a sawh hna caah sii-inn an phan tiah thawng kan theih. 

 

Hi kong he pehtlai in nam sawh a tongmi Min Min Luin (kum 27 an lubik) pa nih, “riantuan kan dih zanlei fatin ti awk in keimah le ka hawipa Win Min Tun (kum 25) tiin kan umnak ah biaruah pah in zuu kan ding tawn. Kan din dih in kan it ko, mah zan zong zuu kan ding pah rih. Nam in a kan sawhtu pa Way Lin nih an kan rem pah lo caah a holh a vun tam. Ka-hin zuu ding hlah u, voidang zong ah rak i ken ti hlah u tiah a kan ti i Win Min Tun he bia an i el tlawmpal ah nam in a paw, a kut orh lei le kehlei ah hmun khat veve in a tuk. Keimah zong an hruaitu lutlai pakhat ka si nak in ka thinhun ve caah ka then hna i kei zong ka liang ah a ka tuk ve. A ruang cu bia i elnak le i hmuhthiam lo nak ruang ah hi thil kan ton hi a si” tiah an haotu Min Min Luin nih TCP ah a chim. 

Zan suimilam 11:30 hrawngah palek an rak phan i nam in a sawhtu hna Way Lin (kum 35 hrawng) cu mah zan lila ah a zam. Riantuati khat hmunkhat ah a itmi an si hna, zuu a din kan hmu bal lo. Amah cu Pathein peng, Pye Myo ah khua a sami a si tiah riantuanti hawi hna nih an chim. 

Nam sawh a tongtu Min Min Luin le Win Min Tun cu Yangon ramthen Tann-hlin myo in a ra mi an si tiah theih a si. 

“Minung pahnih a hliam hna caah Way Lin cu mithah lainawn timhnak upadi 326 le 324 ning in tazacuai a si. Upadi 326 hi thong kumhra si lo ah tangka in a pek khawh ti ah aa tial. Hi pa zong hi an umnak khua le a chung le pehtlaih le hlathlai kan i zuam lio pi a si. Cun khuadang um palek tuanvo ngeitu hna sin zongah thawng kan thanh dih cang hna. A si khawh chungin hi pa hmuhkhawhnak dingah tuanvo kan lak lio a si ko” tiah Thantlang palek bawi U Kyaw Naing Oo nih TCP ah a chim. 

Min Min Luin le Win Min Tun cu Thantlang sii-inn ah an um lio a si. Win Min Tun hi a zual deuh caah Hakha sii-inn ah an lanhpi lai tiah theih a si. +++

 

BLOG COMMENTS POWERED BY DISQUS