19
Thu, Oct

 Avoi 19nak Tar Upa Hna Upatnak Ni Hakha Ah An Tuah

Salai Chungkuh| 2017 October 1| Avoi 19nak vawlei pumpi tar upa hna upatnak ni cu Hakha Bo Cawn Bik Hall, October 1 nih ah zatlang kong le hmunhma sersiamnak lei zung le Help Age i bawmh in an tuah tiah thawng kan theih.

 

 “Tuni a rak chuak khomi hi minung 51 an si. Asinain, Hakha peng ah tar upa a ummi hi minung 120 leng an si,” tiah Pu Chan Peh nih a chim.

Chin ramkulh ah tar upa lei minung pa zeizah dah an si cu theih fiang khawh a si rih lo. Pengkip nih an tuah dih hnu lawng in theih fiang a si lai tiah a biapeh ah a chim. 

Tutan upa tar pawl upatnak pekmi hi kum 85 cung lawngte an si. Cun, Chin ramkulh chung ah kum upa bik hna laksawng peknak zong an ngei i Surkhua mi Pu Khua Cung (kum 106) le Malsawm khuami Pi Hoi Tang cu upatnak laksawng ks. 25,000 veve pek an si.  

Chin Minister ai-awh in Tangka Le Simanking Minister Pu Vui Kaw nih biachimnak a ngeih. “Upa lei tar hna cu him tein zohkhenh an si lai i, an limhang humhimnak lei upatnak an co awk a si,” tiah Minister Pu Vui Kaw nih a chim.

Hi ni ah Hakha peng in tarnu, tarpa minung 120 cu upat peknak caah minung pakhat ah ks. 25000 cio le laksawng thilri an pek hna. Cun siibawi te nih alak in an zawtnak zohfelnak le thlopbulnak an ngeih hna. 

Hi tar lei upa hna ni ah Hluttaw Speaker Pu Zo Bawi, Minister Pu Vui Kaw le a dang riantuantu hna upa cheukhat zong an i tel kho. Hi tar upa hna upat peknak ni cu Chin ramkulh pengkip ah an tuah cio tiah kan theih. +++

 

BLOG COMMENTS POWERED BY DISQUS