22
Fri, Jun

 Chin Idol Zuamnak Caah Minung 37 Min An I Pe Cang

Salai Ngun San Aung| 2017 Sep 28| Chin Association for Christian Communication (CACC) nih October 27-29, Carson Hall, Hakha ah Chin Idol timi hlasak zuamnak le Music Festival tuah an timh i cu zuamnak ah aa tel dingmi minung 37 min an ipe cang tiah kan theih.

 

“Tutiang ah min aa pemi 37 an si cang. A tambik cu Hakha in an si i pa an tam deuh. Falam, Thantlang le Lawngtlai in maw an si a fiang deuh rih lo, ramri lei cun an si rua min aa pemi zong an um pah. Cu hlasak zuamnak ah itel aa timmi paoh nih September thla dih tiang min pek khawh asi rih. Min pek ding khiahmi nicaan ah a pe lomi cu cohlan an si ti lai lo. September thla dih hlan ah min a pe mi vialte cu CACC zung ah October 9 phak dih asi lai i 9-22 tiang khi vocal lei a thiammi nih hlasak ning an cawnpi hna lai. Cu chung cun Idol ah zuamnak tak tak a lut dingmi a thiambik minung 10 an thim hna lai September 27-29 khi Carson Hall ah hlasak zuamnak cu an tuah te lai” tiah CACC in upa pakhat nih a chim.

Tutan zuamnak ah pakhatnak ca laksawng hi Chinland News a ngeitu Salai Lung Thli Tum nih Ks. 5,000,000 a hlut tiah kan theih. Hi leng in CACC nih a pek dingmi laksawng cu, pakhatnak a hmumi, tangka sing 50 lengah ramdang ah hlasak in khualtawn ding timhtuahpiak a si lai. Pahnihnak le pathumnak cu tapephel chuahpiak le aa tlakmi laksawng pek an si lai. 

Tutan ahhin Nunphung laam a phun phun hmuhsaknak, hlasaknak le hla rem saknak zong a um lai. Hla rem sak dingmi cu Rev. Lai Ram Hu nih a phuah. Cun special talk an ti i biatawi chimnak zong a um lai. Cuticun zing sml. 10:00-4:00 tiang caan hman asi lai. Zan ah hlasak zuamnak in caan hman a si lai. Hla mark petu ah Sung Tin Par, Cung Aung le Herh Lian an si lai.

Hlasak zuamnak ah aa tel dingmi minung 10 nih zuamnak ah an sak dingmi hla i anmah nih an ihngalh cia lai lo, hla mark petu nih anmah duhmi an thim piakmi sak si lai. 

October 27 zing in thok asi lai. Chin Idol and Music Festival Ribbon tannak a um lai, Chin ramkulh Cozah in upa pakhat le CACC upa pakhat nih caan an hman lai i hi puai hi a dihlak ah nithum le zanthum chung asi lai tiah kan theih. +++

 

BLOG COMMENTS POWERED BY DISQUS