19
Thu, Oct

Strategy First Timi Sianginn Nih Hakha ah Chawlehthalnak Lei Kong Cawn Nak An Tuah Lai; Mi Zeipaoh Nih Sok Khawh A Si

Salai Ngun San Aung| 2017 Jan 24| -  Strategy First sianginn nih Chin ramkulh Cozah he i bawm in Chin ramkulh khuapi pali ah Chawlehthalnak kong ninga chung cawnnak an tuah lai.

Strategy First sianginn hi Yangon ah a ummi a si i kumkhat ah siangngakchia 6,000 lengmang an kainak a si. Chin ramkulh chung, Hakha, Tedim, Mindat le Paletwa ah caantawi cawnnak tuah dingin Chin ramkulh cozah he January 24 ah hnatlaknak min an thut cang tiah kan theih.

Hi cawnnak kong he pehtlai in “Chin ramkulh chung ummi hna nih, anmah tein dirhmi pawcawmnak rian pakhat khat an ngeih khawhnak ding a bik in kan i tinh. 2017 ah, Hakha ah voihnih, Tedim ah voikhat, Mindat ah voihnih le Paletwa ah voikhat tiin a dihlak voiruk tuah kan i tim. Cawn dingmi hi phunthum in kan then; Business Management, Innovative on Entrepreneurship le Tourisms and Hospitality an si. Cawn caan hi ninga chung a si lai i cawnpiaktu hi Yangon in an ra lai. Hi caantawi cawnnak in a dihmi hna cu hngalhpinak catlap an pek hna lai i company rian soknak zongah a thathnem lai lengah hmailei ah mah tein rian dirh in pawcawmnak caah a thathnemh hna lai ti zumhnak kan ngei” tiah Strategy First Sianguk  Sayaci U Chit Khin Aung nih TCP ah a chim.

Hi cawnnak kai a duhmi nih, CCU, Hakha College le GTI ah luhnak form cawk khawh a si. Form man ah ks. 1,000 a si. Sianginn luhnak caah Ks. 38000 a si lai nain a kaimi dihlak kha bawmhnak  Ks. 35,000 pek an si lai caah a dih dingmi cu Minung pakhat ah sianginn luhman le form man Ks. 4000 lawng a si lai.  Minung 60 cohlan an si lai. Feb 6 khi a hnu bik form ap caan a si lai. Mikip nih sok khawh a si.

 

BLOG COMMENTS POWERED BY DISQUS