16
Mon, Jul

Chief Minister Salai Lian Luai Kong Tawi

Theme Articles

Chin Digest, Vol. 2/No. 5| Chin ramkulh Chief Minister Salai Lian Luai cu Falam peng Airebual khua ah a chuakmi a si. Yangon University ah upadi in degree (upadi boih) a ngah. Cun biaknak lei degree pakhat a simi Bachelor of Relious in Education (BRE) zong a ngah.

 

Atu lio ah Chinmi nih kan hman ngaimi ‘Salai’ le ‘Mai’ kong ah Yangon University an rak kai lio ah Salai Lian Luai hi a rak ṭang ngai vemi a si. ‘Salai’ ‘Mai’ cu tleicia Salai Tin Maung Oo nih Chin aa timi poh nih hman ding tiah a rak chuahpimi a si i, hi kong ah Salai Lian Luai cu Salai Ram Ling Hmung le Salai Kip Kho Lian te pawl he biatak tein a rak cawlcang vemi an si.

Salai Lian Luai cu upadi in degree ngahmi a si bantuk in upadi zung ah lei ah rian a rak ṭuan; Rangoon Cenral (Bahu) taza-zung, Kalay, Falam, Mindat, Matupi, Mandalay le Amarapura hna ah upadi lei in cozah rian a rak ṭuan bal i Tamu khuapi ah pengkomh (khayang) upadi lutlai in reng sang a tlaimi a si. 

Upadi lei in rian a ṭuan lio ah minṭhatnak laksawng pathum a rak ngah bal. 2015 kum thimnak a phanh lai te ah khan NLD ah a lutmi a si. Falam khuapi in ramkulh hluttaw mee-zung  No. 2 in MP a tling. 

NLD nih hruaimi Chin ramkulh Hluttaw thar a kai hnu in Chin ramkulh a voi khatnak Hluttaw tonpumhnak ah Pu Zo Bawi le Pu Aung Tam hna Hluttaw chariman rian caah biakamnak an tuah lio zong ahkhan Salai Lian Luai nih chairman (Taba-padih) a rak tlaih. 

Salai Lian Luai cu a nupi Pi Run Nei Par he fanu pahnih le fapa pahnih an ngei. An fale min hna cu; Mai Ci Em Sung, Dr. Van Hum (Salai Lal Hum Thang), Mai Zung Len Mawi le Salai Cung Hu Lian hna an si.

Ref: Irrawaddy, Chin World

Note: Hi Chin Minister kong tawi cu Chin Digest Vol 2, No. 5, October 2016 ah chuahmi a si. Online careltu caah kan hun thlah than. ~ Editor 

BLOG COMMENTS POWERED BY DISQUS