17
Sun, Dec

Kum 2016-2020 Tiang Chin Ramkulh Cozah Riantuannak Ding Caah Ruahnak Cheuhnak

Photo: Dr. Tluang Za Thang (FB/Private)

Theme Articles

Dr. Salai Tluang Za Thang; Chin Digest, Vol 2, No. 2| 

(1) Kum 2016-2020 tiang Chin ramkulh cozah a hruaitu ding Chief Minister le Chin ramkulh Hluttaw chairman hna hi NLD in MP a tlingmi an si caah mipi duhnak kha a biapi bik chia in rian an ṭuan lai tiah ruahchannak tampi ka ngei.

A luancia Chin ramkulh cozah nih Chinram ṭhanchonak tampi an tuah ko nain mizapi duhning nak in anmah duhning in rian an ṭuanchuah deuh. A hleikhun in, Chief Minister biakhiahnak le ramkomh cozah duhnak lawng deuh in rian an ṭuan. A luancia cozah term ahcun Chin ramkulh Hluttaw chairman nawlngeihnak hi a tlawm ngaingai. Zeicatiah cun, CM Pu Hung Ngai cu a hlan in Pah-yah-kah chairman a si pin ah Chief Minister a hung si, cu pin ah Chin ramkulh USDP chairman zong a si chih rih tik ah a nawlngeihnak an lonh kho lo. President Thein Sein nih a zumhmi a si fawn caah cunglei nawlngeihnak (centralized administration) bak in a hruai hna i Chin ramkulh minister pawl zong a onh zat lawng in cawlcanghnak le nawlngeihnak an ngei kho. 

A biapimi biakhiahnak tuah tik ah a riantuanṭi hawi (cabinet minister) hna nih a bia an al ngam lo i, CM duhning deuh lawng in biakhiahnak tuah peng a si. CM a zaat venak cu Chin ramkulh kong ah thil sining (Facts and Data) aa cinken khawh pin ah khua kip a pal khawh hna caah a mah tluk in thil hngal an tlawm i, hmuhtonnak tampi a ngeihnak nih minister pawl zong a hip khawhnak hna a si ve. A luancia CM a chambaunak deuh cu meeting le puai tibantuk ah caanhman in a pha kho lo, cu pin ah cu bantuk caan poh ah Chin ramkulh zung rianṭuantu lutlai telter viar an si caah rianṭuannak ah caan thlau ngai a si. Mah cucu atu lio cozah thar nih a herhning in remh khawh aa zuam ding hi an theihhngalh khawh le an ṭuanchuah ding a herh ngai tiah ka ruah. Cun, a hlan CM cu a lenglei mifimthiam hna sin in ruahnak laak le ruahnak hal tibantuk a tuah set lo i, amah pumpak nih a ṭha a tining le cunglei upa hna rianfialnak deuh in rian a ṭuan caah ram le miphun ṭhanchonak ca rianṭuannak ah chambaunak a tam ngai.

(2) Atu lio Chin ramkulh cozah hi NLD nih hruaimi cozah a si i, chim ahcun mipi thimmi cozah an si ti khawh a si. Rian hmanh an ṭuan thok rih lo caah soiselnak tuah colh ding an si lo bantuk in daithlanh in zoh sawhsawh ding zong an si fawn lai lo. Atu lio Chin ramkulh Chief Minister hi mi nunnem le mi ṭha a si an ti cio ko nain kha lawng khan a tlamtling kho lo i, Chin ramkulh nih kan herhmi ṭhanchonak le sifah zorternak hna, fimcawnnak le ngandamnak ṭhanchoter nak hna hi a hleikhun in a ṭuanchuah khawh ding hi a biapi tuk. Cu pin ah, minister hna zong anmah le an rian ah nawlngeihnak le rianṭuan khawhnak thaazaang an ngeih khawhding zong ah tangleimi nawl hei cheuhnak “Decentralized Governance System” a hman a herh i tanglei ruahnak zong lak chihnak “Bottom Up System” hi ningcang tein a hmanter khawh hna a hau. 

General Administration (Htwe Oh) le palek phu zong hi mizapi duhning in uknak le hruainak lei in a mersan hna i a ṭhithruai khawh an herh tuk. Ṭhanchonak lei rianṭuannak le cozah rianṭuantu ding rianpeknak ah langhngan tein tawlrelnak le duhdanhnak ngei loin rianṭuan khawh aa zuammi si a herh. Chin miphun nih kan buaipi tawnmi pengtlang ṭanhnak le miphun hoih lawng papek rianṭuannak zong ningcang te le fimkhur ngai in a ṭuanchuah khawh a herh. A luancia Chin ramkulh cozah rianṭuannak ah langhhngannak (transparency) a tlawm ngaingai ti khawh a si. Tahchunhnak ah, cozah zung saknak, minister pawl inn saknak, Timit ti laknak, khuate lei le pengtlang kip lam kauh le lam cawhnak, cozah zung pawl zung rianṭuantu rian sok le rian peknak, khuate ṭhanchonak rianṭuannak tibantuk ah langhngan tein mipi sin theihternak le tawlrelnak a tlawm ngaingai ko rua tiah ka ruah. Cu vialte cu, atu CM thar caah zuamcawhtu rian pawl an si hna lai.

(3) Chin ramkulh Hluttaw chairman nih a nawlngeihnak le miphunpi nih bochanmi a sinak, NLD chairman a sinak in Chin ramkulh cozah hi a hip khawh hna le, a herh ahcun mizapi duhnak in an chak a merh khawh hna a hau ve. Upadi le by-law an ser tik ah ser sawhsawh siloin zulh le a tak ah nunter ding tiang neh hnu zulh in ṭanlak a herh. Ziknawh le eihmuar a um lo nakding tiang in cozah uktu le rianṭuantu hna kha ralrin peknak le zohfelnak a tuah peng a hau lai i mizapi nih thimmi an si ruang ah mizapi duhnak kha papek in mu le mal, phung le phai kha chan sining in ser le remh kha an ṭuanchuah khawh a herh. Central NLD duhning lawng in rianṭuan siloin Chinram le Chin miphun caah aa tlak bikmi le a ṭha bikmi upadi le zulhphung an ser khawh ding zong a biapi ngaingai.

(4) Chin ramkulh minister hna nih an rian kha dinfelnak le thleidannak um loin an ṭuanchuah a herh i mah pumpak ca huih siloin mizapi ṭhatnak caah biatak tein rian an ṭuan ding kha a biapi tuk. Minister rianṭuan hi chungkhar rumnak caah rianṭuan siloin ram le miphun rumnak le hlawhtlinnak caah rianṭuan a si timi an i fian cikcek a herh i ziknawh le eihmuar cu a biapi bik an doh ding le an ral ah an i chiah ding kha a biapi taktakmi a si. An rian ah luhlinh in theihhngalh duhnak he an ṭuan i an rian a bawm khotu hna ruahnak pekmi zong an cohlan thiam le ruahnak ṭha hmuh khawh ding zong an i zuam a herh.

(5) Atu lio cozah rianṭuannak ah a biapi ngaimi cu Auditor General (Sa-yin-sit-choh) hruaimi tangka cazin cheknak zung (Audit Office) rianṭuannak hi a si. Cozah nih budget an hmannak le ṭhanchonak rian an ṭuannak vialte ningcang te le dawhcah tein a hman le hmanlo a zohfeltu an si caah, cozah le zung kip nih rian an ṭuannak ah budget he cuaichun in ṭuality ngeih le ngeihlo kong ah anmah rianṭuannak hi a biapi taktakmi a si. (Tahchunhnak ah, lam zung nih budget a tlami in kattaya an phah, a hlankan in BṬ (Bill of Ṭuantity) le zeizat dah a dih lai timi a man tuaknak  (cost estimation) an ngeihcia viar. Kattaya an phah hnu i an rian an lim hnu ah cazin cheknak (Audit Office) nih an chek hna. Kattaya an phahmi a ṭha lomi kha a ṭha ko tiah an pompiak hna a si ahcun mah kattaya phahmi lam cu tlawmpal ah aa rawk colh ko lai. Kattaya an phahmi kha a ṭha lo, nan liam awk a si, hi bantuk in tuah ti hlah uh ti bantuk in cazin chektu report ah ralrinpeknak he dingfel tein an rian an ṭuan a si ahcun kan lam le kan suul, kan inn kan lo, kan ti le kan mei vialte (infrastructure) pawl hi ṭuality an ngei lai i, duhsah in kan ṭhancho chin lengmang pin ah zung rianṭuantu hna zong an dingfel chin lengmang lai. Ram le miphun caah hlawknak tampi a chuak ṭhan lai. Cucaah cun, tangka cazin chektu bawi (Auditor General) le cazin cheknak zung (Audit Office) rianṭuantu hna hi an biapi tuk i, ram le miphun caah dawtnak an ngeih zat le an dinfel zat in kan ram ṭhanchonak hi aa pehtlai ti khawh a si.

(6) Chin ramkulh MP hna hi mizapi thimmi an si bantuk in mizapi duhning in upadi le zulhphung an ser khawh a herh i, mah le aiawhmi pengtlang (constituency) zong vehvat i upat peknak le an duhmi chimrelter i an duhnak chimpiak khawh peng ding zong hi a biapi ngaingai. Cu pin ah, zung kip le phu kip he i ton khawh le ruahnak cheuhnak ngeih khawh zong a biapi ngaingai. Mizapi nih ngamh tlak ding in um i, mizapi palai an sinak zong an philh lo ding a biapi tuk.

(7) Mizapi lei zong nih atu lio kan ram hruainak hi a dikfelmi taktakmi democracy a si rih lo, ti hi kan i fian a herh. Zeicatiah, 2008 Phunghrampi ning ah ralkap nih za ah 25 (25%) thutnak an ngah caah mipi thimmi palai hna cu za ah 75 (75%) lawng an si i, thihnak nunnak le a dikfelmi democracy phungning kal khawhnak ah za ah 75 lawng kan kal kho rih i, za (100) ah 25 hi donhkhanhnak kan ngei rih ti hi kan philh lo awk a si. A hleikhun in, Chinmi nih kan i tinhmi le kan duhmi zalong tein mahte khuakhan lairelnak (federal le self-determination) hna hi phunghrampi kan remh khawh hmasa a herh i atu lio cozah lawng siloin mizapi zong nih ralkap pawl an lung kan thlen khawh nakding hi kan i zuam cio a hau. Ziknawh le eihmuar hi mizapi nih kan duh lo bantuk in kanmah lila nih kan tuah ve lo i kanmah kan hlawknak a si poh ahcun a poi lo, ti lungput ngei loin cozah uktu le rianṭuantu hna zong dinnak he kan pehtlaih hna ahcun hmailei kan ram ah dinnak a leng ṭhan lai i ‘Chin miphun cu mifel le miding an si’ an rak ti tawnmi kha kan tharchuah ṭhan khawh ko lai.

(8) Bia donghnak ah, atu lio Chin ramkulh CM le Minister hna, Attorney General le Auditor General hna hi, mizapi thimnak in rianṭuanmi an si caah a hlan cozah rianṭuantu pawl he an sining aa dang deuh ngai. Mizapi duhlo ning le ningcang loin mah zawn lawng ruat le mah ṭaang huih in rian an ṭuan sual ahcun zeitik caan poh ah an rian in dinhter an si kho i, ram le miphun dawtnak le dinfelnak in rianṭuanmi hna cu atu kum (5) term khat lawng si loin a ralaimi 2021-2025 cozah rianṭuannak zong ah mizapi nih rian pehter an si te ko lai tiah ruahnak cheuh ka duh hna.

Bawipa nih Chinram le Chin miphun, a kan hruaitu cozah upa vialte thluachuahnak tampi pe ko hna seh! Amen.

Dr. Salai Tluang Za Thang
Principal
GTI (Hakha)
April 8, 2016 (11:00 AM)

*Hi capar cu 2016 April ah chuahmi Chin Digest Vol. 2, No. 2 chung ah a telmi a si. Chin Digest le Chinland Post Online careltu caah kum 1 fai a rauh hnu ah kan hun in hromh than hna hi a si.-Editor   

BLOG COMMENTS POWERED BY DISQUS